ގައުމުގެ ފައިދާއަށް މަސައްކަތް ކުރާ މީހުންނާއެކު، މޯލްޑިވްސް ރިޕޯމް މޫވްމަންޓް (އެމްއާރްއެމް) އިން އަބަދުވެސް ސާބިތުވެ ތިބޭނެ ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެއެވެ.
އިއްޔެ އޮތް ރައްޔިތުންގެ މަޖިލީހުގެ އިންތިހާބުގައި ވެރިކަން ކުރާ ޕާޓީ އެމްޑީޕީން ހޯދި ބޮޑު ކާމިޔާބީ ފާހަގަ ކުރައްވާ ރައީސް މައުމޫން ކުރެއްވި ޓްވީޓެއްގައި ވިދާޅުވީ ގައުމުގެ ފައިދާއަށް މަސައްކަތް ކުރާ ކޮންމެ މީހަކަށް ވެސް އެމްއާރްއެމް އިން ތާއީދު ކުރާނެ ކަމަށެވެ. އަދި އެމްޑީޕީއަށް ލިބުނު ފާހަގަ ކޮށްލެވޭ ވަރުގެ ބޮޑު ކާމިޔާބީގެ ސަބަބުން ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅުތައް ފުއްދުމަށް ފަސޭހަ ވެގެން ދާނެ ކަމަށް ވެސް ރައީސް މައުމޫން ވިދާޅުވިއެވެ.
މައުމޫންގެ ދަރިކަލުން ފާރިސް މައުމޫން ވަނީ އެމްއާރްއެމްގެ ފާރާތުން، މަޖިލިސް އިންތިހާބުގައި ވާދަ ކުރައްވާ ނާކާމިޔާބު ވެ ވަޑައިގެންފައެވެ. އެކަމަކު ޕީޕީއެމްގެ ފަރާތުން އިންތިހާބުގައި ވާދަ ކުރައްވައިގެން ޣައްސާނު މައުމޫން ވަނީ އިންތުހާބު ކާމިޔާބު ކުރައްވާފައެވެ.
