އިއްޔެ ބޭއްވި މިއަހަރުގެ ރައްޔިތުންގެ މަޖިލީހުގެ އިންތިހާބުގައި ވާދަކުރެއްވި ރޮޒައިނާއާއި ހިސާންގެ ދެކަނބަލުންނަށް (ދެ ޖޯޑު) މަޖިލިސް ގޮނޑި ކަށަވަރު ވެފައި ވާކަން ވަގުތީ ނަތީޖާއިން ހާމަވެއްޖެއެވެ.
އޭގެ ތެރެއިން އެއް ޖޯޑަކީ ކުރީގެ ރައީސް މުހައްމަދު ނަޝީދު ގެ ގާނޫނީ ވަކީލް ހިސާން ހުސައިން އާއި އޭނާގެ ފިރިކަލުން އިބްރާހިމް ނާޒިލް އެވެ. ދެވަނަ ޖޯޑަކީ އައްޑޫ މީދޫ ދާއިރާގެ މެންބަރު ރޮޒައިނާ އާދަމާއި ފިރިކަލުން މުހައްމަދު ނާޝިޒެވެ.
ހިތަދޫ ދެކުނު ދާއިރާ ގެ ގޮނޑި ނާޒިލް ކާމިޔާބު ކުރައްވާފައި ވާއިރު އަނބިކަނބަލުން ހިސާން ކާމިޔާބު ކުރެއްވީ ތުޅާދޫ ދާއިރާގެ ގޮނޑި އެވެ. އަދި ކިނބިދޫ ދާއިރާގެ ގޮނޑި ނާޝިޒް ކާމިޔާބު ކުރެއްވި އިރު އަނބިކަނބަލުން ރޮޒައިނާ ވަނީ އަނެއްކާވެސް އައްޑޫ މީދޫ ދާއިރާގެ ގޮނޑި ކާމިޔާބު ކުރައްވާފައެވެ.
މި ހަތަރު ބޭފުޅުންނަކީ ވެސް ވެރިކަން ކުރާ އެމްޑީޕީއަށް ނިސްބަތްވެ ވަޑައިގަންނަވާ ހަތަރު ބޭފުޅުންނެވެ. މި ފަހަރުގެ އިންތިހާބުގައި އެ ޕާޓީ އަށް ވަރަށް ފުރިހަމަ ކާމިޔާބީއެއް ލިބިފައި ވެއެވެ. މަޖިލީހުގެ ސާފު 'ސުޕަ މެޖޯރިޓީ' އެމްޑީޕީއަށް މިހާރު ވެސް ވަނީ ކަށަވަރު ވެފައެވެ.
