އިއްޔެ ބޭއްވި ރައްޔިތުން މަޖިލީހުގެ ވޯޓުގެ ވަގުތީ ނަތީޖާ ދައްކާ ގޮތުން މި ފަހަރު މަޖިލީހުގައި ތިއްބަވާނެ ކަމަށް ބެލެވެނީ ޖުމްލަ ހަތަރު އަންހެން މެންބަރުންނެވެ. އަދި އެ ހަތަރު މެންބަރުންނަކީ ވެސް އެމްޑީޕީ ތަމްސީލުކުރާ މެންބަރުންނެވެ.
މަޖިލިސް 19 ގައި އެތައް އަންހެން ކެންޑިޑޭޓުންނެއް ބައިވެރިވެފައިވީ ނަމަވެސް ވޯޓުން ކުރި ހޯދައި ކާމިޔާބީއެއް ލިބިފައި ވަނީ އެމްޑީޕީގެ 4 މެންބަރުންނަށެވެ. އެއީ ތުޅާދޫ ދާއިރާއަށް ވާދަކުރެއްވި ހިސާން ހަސަނާއި، ހިންނަވަރު ދާއިރާއަށް ކުރިމަތިލެއްވި ޖީހާން މަންދޫހްގެ އިތުރުން ކުރިންވެސް އައްޑޫ މީދޫ ދާއިރާއަށް ކުރިމަތިލެއްވި ރޮޒައިނާ އާދަމް އަދި ގަލޮޅު އުތުރު ދާއިރާއަށް ކުރިމަތިލެއްވި އީވާ އަބްދުﷲއެވެ.
މި މަޖިލިސް އިންތިހާބް ރޮޒައިނާ ކާމިޔާބު ކުރައްވާފައި ވަނީ އަމިއްލަ ގޮތުން ބައިވެރިވި ކެންޑިޑޭޓް އަބްދުލް ރަހްމާން އާ ވާދަކޮށް 10 ވޯޓުގެ ކުޑަ ތަފާތަކުން ކަމަށް ވަގުތީ ނަތީޖާ ދައްކައެވެ. އަދި އީވާ ކާމިޔާބު ކުރައްވާފައި ވަނީ އަމިއްލަ ގޮތުން ބައިވެރިވި ކެންޑިޑޭޓް އިބްރާހިމް ހަމްޒާ ހަލީލާ ވާދަކުރައްވާ ގާތްގަނޑަކަށް 900 އެއްހާ ވޯޓުގެ ތަފާތުންނެވެ.
ރޮޒައިނާ އާއި އީވާ އަކީ ކުރިންވެސް މަޖިލީސް ތަމްސީލް ކުރައްވާފައިވާ މެންބަރުންނެވެ. ނަމަވެސް ހިސާން އަދި ޖީހާނަކީ މަޖިލީހަށް މުޅިން އަލަށް ކުރިމަތިލެއްވި ދެ މެންބަރުންނެވެ. ތުޅާދޫ ދާއިރާއިން ހިސާން ކާމިޔާބީ ހޯއްދަވާފައި ވަނީ ޕީޕީއެމް ތަމްސީލުކުރި ކެންޑިޑޭޑް މުހައްމަދު އަތީފާ ވާދަކުރައްވާ ބޮޑު ތަފާތަކުންނެވެ. ހިސާނަކީ ކުރީގެ ރައީސް މުހައްމަދު ނަޝީދުގެ ގާނޫނީ ވަކީލުވެސް މެއެވެ.
ޅ. ހިންނަވަރު ދާއިރާއަށް ކުރިމަތިލެއްވި ޖީހާން ވެސް ވަނީ އެ ދާއިރާއަށް ކުރިމަތިލި ޕީޕީއެމްގެ ކެންޑިޑޭޓް އަބްދުﷲ ނާޒިމް އިބްރާހިމާ ވާދަކުރައްވާ ބޮޑު ތަފާތަކުން ކާމިޔާބީ ހޯއްދަވާފައެވެ. ޅ. ހިންނަވަރަކީ ރައީސް އިބްރާހިމް މުހައްމަދު ސޯލިހު 25 އަހަރު ވަންދެން ތަމްސީލު ކުރެއްވި ދާއިރާ އެވެ. ދެން އެ ދާއިރާ ތަމްސީލު ކުރައްވާނީ ޖީހާނެވެ.
18 ވަނަ މަޖިލީހުގައި ތަމްސީލުކޮށްފައިވާ އަންހެން މެންބަރުންނަށް ބަލާލާއިރު، ރޮޒައިނާ އާއި އީވާގެ އިތުރުން އަދާލާތު ޕާޓީގެ ފަރާތުން އަނާރާ ނައީމް އާއި މިހާރުގެ ޑިފެންސް މިނިސްޓާ މާރިޔާ އަހުމަދު ދީދީ އަދި މާފަންނު މެދު ދާއިރާ ތަމްސީލު ކުރެއްވި އަސްމާ ރަޝީދު ހިމެނެއެވެ. މަޖިލިސް 18 ގައި ފަސް އަންހެން މެންބަރުން ކުރިމަތިލި އިރު އޭގެތެރޭގައި ހިމެނެނީ އަދާލާތު ޕާޓީގެ މެންބަރަކާއި ޕްރޮގްރެސިވް ޕާޓީގެ މެންބަރަކާއި އެމްޑީޕީގެ ތިން މެންބަރުންނެވެ.
