ނިމިގެންދިޔަ މަޖިލިސް އިންތިހާބުގައި ލިބިވަޑައިގެންނެވި ނާކާމިޔާބީއާއި ގުޅިގެން ޖުމްހޫރީ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް ގާސިމް އިބްރާހިމް އެ ޕާޓީގެ ކައުންސިލް މެންބަރުންނަށް ހޫނު ރައްދުތަކެއް ދެއްވައިފިއެވެ.
ޖޭޕީގެ ވަޓްސްއެޕް ގްރޫޕުގައި ގާސިމް ވިދާޅުވީ 2009 ވަނަ އަހަރު ބޭއްވި މަޖިލިސް އިންތިހާބުގައި ވެސް އެ ޕާޓީން ޓިކެޓު ދީގެން އެއްވެސް ބަޔަކާ ބައިވެރި ނުވެ 30 މީހުންނަށް ހަރަދު ކުރެއްވުމުން ހޮވިވަޑައިގެންނެވީ އެމަނިކުފާނު އެކަނި ކަމަށެވެ. އަދި ބަޔަކު ވާހަކަ ދެއްކިޔަސް ނުސިހޭނެ ކަމަށް ވިދާޅުވެ ގާސިމް ވަނީ ކައުންސިލް މެންބަރުންނަށް ރައްދު ދެއްވާފައެވެ.
"އެއިރު ޖޭޕީއަށް ގިނަ ގޮނޑިތަކެއް ކާމިޔާބު ނުވީ ކޮން ވަގަކު ހުރީމަތޯ" 2009 ވަނަ އަހަރުގެ މަޖިލިސް އިންތިހާބަށް އިޝާރާތްކުރައްވާ ގާސިމް ވިދާޅުވިއެވެ.
ވަގަކު ހުރިކަމަށް ބުނެ ޖޭޕީ ކައުންސިލް ވަޓްސްއެޕް ގްރޫޕުގައި ހޫނު ބަހުގެ ރައްދުތަކެއް ދީފައިވަނީ، ޖޭޕީގެ ރައީސް އަދި ސަރުކާރުގެ ޓުއަރިޒަމް މިނިސްޓަރު އަލީ ވަހީދު ކުރެއްވި ޓްވީޓަކާއި ގުޅިގެން ކަމަށް ބެލެވެއެވެ. އަލީ ވަހީދު ކުރެއްވި ޓްވީޓުގައި ވިދާޅުވީ، ޖޭޕީއަށް ލިބުނު ބޮޑު ނާކާމިޔާބީ އަކީ ރައްޔިތުން 23 ސެޕްޓެމްބަރުގައި ބޮޑުތަކުން ނޫނެކޭ ބުނި ކުރީގެ ރައީސް އަބްދުﷲ ޔާމީނާއި ބައިއަތު ހިފުމުން ލިބިވަޑައިގެންނެވި ނާކާމިޔާބީއެއް ކަމަށެވެ.
"ކަަނޑުފޭރޭ މީހުން ޖޭޕީ ހިސޯރު ކުރުމުން ޖޭޕީގެ ކެންޑިޑޭޓުންނަށް ގެއްލުންވެ ޖޭޕީ ސަލާމަތެއް ނުވި. އެހެނަސް ރައްޔިތުން ގައުމު ސަލާމަތް ކޮށްދީފި. އިބުރަތެއް" ޖޭޕީއަށް ލިބުނު ނާކާމިޔާބީއާއި ގުޅިގެން އަލީވަހީދު ކުރެއްވި ޓްވީޓުގައި ވިދާޅުވިއެވެ.
އަލީ ވަހީދު ވަނީ އެމްޑީޕީން މަޖިލީހުގެ ސުޕަ މެޖޯރިޓީ ނެގުމުގެ އުފަލުގައި ރޭ ބޭއްވި ކުއްލި އެއްވުމުގައި ބައިވެރިވެވަޑައިގެންފައެވެ. އަލީ ވަހީދުގެ އިތުރުން ޖޭޕީގެ ޓިކެޓްގައި ކޯލިޝަން ސަރުކާރުގެ ނައިބުރައީސް ފައިސަލް ނަސީމް ވެސް ބައިވެރިވެވަޑައިގެންނެވިއެވެ.
ގާސިމް ޖޭޕީގެ ވަޓްސްއެޕްގައި ކައުންސިލް މެންބަރުންނަށް ރައްދު ދެއްވާފައި ވާއިރު، އެ ޕާޓީގެ ޗީފް ސްޕޯކްސްޕާސަން އަލީ ސޯލިހު ވެސް ވަނީ ނާކާމިޔާބީއާއި ގުޅިގެން ހިތްހަމަނުޖެހުން ފާޅުކުރައްވާފައެވެ. އަލީ ސޯލިހު ކުރެއްވި ޓްވީޓުގައި ވިދާޅުވީ "ވަގެއްގެ އަތުގައި ނުހިފަން ކުރި އާދޭސް ބަލައި ނުގަނެ އެ އަތުގައި ހިފުމުން ލިބުނު ނާކާމިޔާބަށްޓަކާ ލަދުވެތިވެ ހިތާމަ ކުރަން. މަރުހަބާ މިރޭ ކާމިޔާބު ކުރި ކެންޑިޑޭޓުންނަށް."
ޖޭޕީގެ ކައުންސިލްގެ މެންބަރުންނަށް ރައްދު ދެއްވައި ގާސިމް ވަނީ މި އިންތިހާބު ކާމިޔާބު ކުރަން ކޮށްދެއްވި ކަމެއް އެބައޮތްތޯ ގްރޫޕުގައި ސުވާލު ކުރައްވާފައެވެ. އަދި ކަމެއް ކޮށްނުދީ ތިބެގެން ފާޑުފާޑުގެ ވާހަކަ ދެއްކުމުގެ ބޭނުމެއް ނެތް ކަމަށް ގާސިމް ވިދާޅުވިއެވެ.
ގާސިމް ވަނީ އިންތިހާބަށް ދެ ދުވަހަށް ކައިރިވެފައިވަނިކޮށް "ރުފިޔާ އޮއްސާލީ ވާރެ ވެހޭ ހެން" ކަމަށް ވިދާޅުވެ ތުުހުމަތުތަކެއް ވެސް ކުރައްވާފައެވެ.
"އަނެއްކޮޅުން އަހަރުމެންގެ ތެރެއިން ޖޭޕީ އަށާއި ގާސިމަށް ބަވަމުން ދިޔައީ އަހަރުމެންގެ ތެރެއިން ނޫންބާ؟ މިހާރު ވެސް ތިޔަ ބަވަނީ ގާސިމަށް ނޫންތޯ؟ މާ އަޑުގަދަކުރައްވާނެ ކަމެއް ނެތް، ތިޔަބޭފުޅުންނަށް ފެންނަ ގޮތަކަށް ކަންކަން ކޮށްލައްވާ،" ގާސިމް ފޮނުއްވި މެސެޖުގައި ވިދާޅުވިއެވެ.
