ކުރީގެ ރައީސް އަބްދުﷲ ޔާމިންގެ ވެރިކަން ބަދަލު ކުރެވުނީ ފަންޏަކުން ކަމަށާއި، އެއީ ކުރީގެ ނައިބު ރައީސް އަހުމަދު އަދީބު ވަޒީރު ކަމަށް ގެންނަވައިގެން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ މިއަދު އެމްޑީޕީން ނ. ކުޑަފަރީގައި ބޭއްވި ކެމްޕޭން ޖަލްސާގައި ވާހަކަފުޅު ދައްކަވަމުންނެވެ. ޔާމީންގެ ސަރުކާރުގައި އަދީބު ވަޒީރަކަށް ގެންނަން އެމްޑީޕީގެ މެންބަރެއް ވޯޓު ދެއްވި ވާހަކައާއި، އެއާއެކު ޔާމީންގެ ސަރުކާރުގައި ރެނދުލި ގޮތް ކިޔައި ދެއްވަމުން ނަޝީދު ވިދާޅުވީ މިއަދު އެމަނިކުފާނު ކުޑަފަރީ ރައްޔިތުންގެ ގާތުގައި އެ ހުންނެވެނީ ރައީސް ޔާމީންގެ ވެރިކަން ބަދަލު ކުރެވުނީމައި ކަމަށެވެ. އަދި އެ ވެރިކަން ބަދަލު ކުރެވުނީ އެ ވެރިކަމުގެ ތެރޭގައި އެއިރު އެމްޑީޕީން ރެނދެއް އެޅުވީތީ ކަމަށެވެ.

"ދެން ފަހުން އެހެން ރެނދެއްވެސް ފެނުނު. ދެން އެހެންނަމަވެސް އަޅުގަނޑުމެންގެ ރެނދު، ރައީސް ޔާމީންގެ ވެރިކަމުގައި އެޅުވި ރެނދަކީ ދުރު ވިސްނާ އަޅުގަނޑުމެން ކުރި ކަމެއް. އެކަމުގެ ޝިކާރައަކަށްވީ އީސަގެ ގޮނޑި" ނަޝީދު ވިދާޅުވިއެވެ.

ރައީސް ޔާމީންގެ ވެރިކަމުގައި ޓޫރިޒަމް މިނިސްޓަރު ކަމަށް އަދީބު އައްޔަން ކުރުމަށް މަޖިލީހުގައި ނެގި ވޯޓުގައި އެމްޑީޕީން ވޯޓު ނުލާނެ ކަމަށް ވިޕްލައިނެއް ނެރެފައި ވަނިކޮށް، އެފަހަރު އެމްޑީޕީގެ ކެނދިކުޅުދޫ ދާއިރާގެ މެންބަރު އަހުމަދު އީސާ ވޯޓު ދެއްވިއެވެ. އަދި އަދީބު ވަޒީރަކަށް އައްޔަން ކުރަން ފާސްވީ އީސަގެ ވޯޓާއެކުގައެވެ.

ނަޝީދު ވިދާޅުވީ އަދީބަށް ވޯޓު ދެއްވަން އީސައަށް އިރުޝާދު ދެއްވީ އެމަނިކުފާނު ކަމަށެވެ. ކުޑަފަރީ ރައްޔިތުން ކުރި ސުވާލަކަށް ޖަވާބު ދެއްވަމުން ނަޝީދު ވިދާޅުވީ އަދީބަށް ވަޒީރުކަން ދިނުމަށް އީސަ ވޯޓުދެއްވީ އެމަނިކުފާނު ވިދާޅުވެގެން ކަމަށެވެ.

"އެއީ އަޅުގަނޑު ކައިރީގައި ތޮޅެންދޫ ހަސަން ގާސިމް ވެސް އަދި ކުޑަފަރީ ކަލޭފާނު ވެސް އަދި މީދޫ ކަލޭފާނު ވެސް، ވަރަށް ގިނަ އަޅުގަނޑު ދަންނަ ދޮށީ އުމުރުގެ މީހުން ބުނެފައި އޮންނަ ވާހަކައެއް އެއީ. އަނެއްކާ އިހަށްދުވަހު އަޅުގަނޑު ކައިރީގައި މީހަކު ބުނެއްޖެ ރާއްޖެގެ ޓޫރިޒަމް މިނިސްޓަރަކަށް ހުންނެވީ ދެއަތުން ކާ ކުއްޖެކޭ. ދެން އަޅުގަނޑު ހިތަށް އެެރި އެއްޗަކީ އެހާ ރަނގަޅު ފަންޏެއް އެ ވަޒީރުންގެ މަޖިލީހުގައި އެޅުވެން އޮތް އިރުގައި އަދި ރައީސް ޔާމީންގެ ވެރިކަމަށް ލޮޅުމެއް ގެނެވެން އޮތީ އެ ވެރިކަން ބައިކޮށްގެން ކަމަށްވާތީ، އެ ވެރިކަމުގެ ތެރޭގައި އަޅުގަނޑު ފަންޏެއް އަޅުވައިގެން ކަން، ގުޑުމެއް ގެނެސްގެން ކަން" ނަޝީދު ވިދާޅުވިއެވެ.

ނަޝީދު ވިދާޅުވީ ވެރިކަމެއްގައި ރެނދު ލައިފި ނަމަ އެ ވެރިކަމެއް ނިމިގެން ދާނެ ކަމަކީ އަބަދުވެސް ދެކެވަޑައިގެންފައި ވާ ހަގީގަތެއް ކަމަށެވެ. އެގޮތުން އެމަނިކުފާނު ދެކެވަޑައިގެންނެވި ގޮތުގައި އަދީބު ވަޒީރު ކަމަށް ގެނެވިއްޖެ ނަމަ، "އޭނާ އިންތިހާއަށް ކޮރަޕްޓް ވާނެ، އަދި އެ އޮއިވަރުގައި ރައީސް ޔާމީން ރަނގަޅަށް ޖެހިވަޑައިގަންނަވާނެ" ނަޝީދު ވިދާޅުވިއެވެ.

ނަޝީދު ވިދާޅުވީ ވަގުތުގެ އަޖަލުގައި ޖެހިފައި ތިބޭ އިރުގައި ބޮޑު މަންޒަރެއް ފެނިވަޑައި ނުގަންނަވާނެ ކަމަށެވެ. އަދި ދެން ވާން އޮތްގޮތެއް ވެސް ފެނިވަޑައި ނުގަންނަވާނެ ކަމަށާއި، ދެން ވާން އޮތްގޮތް އަޅުގަނޑުމެން ހިތަށް ގެނެވި މިއަދު ނުވާކަމުގެ މައްޗަށް އަމަލު ކުރެއްވުމުން ސިޔާސީ ނަތީޖާ ލިބިވަޑައިގަންނަވާ ކަމަށެވެ. "އީސަގެ ވޯޓުން ވެގެންދިޔަ ގޮތަކީ އަދީބު ވީ ވަޒީރަކަށް. އަދީބު ވަޒީރަކަށް ވީ ދުވަހު ނޫން އަނެއް ދުވަހު ރާއްޖޭގައި އޮތްހާ ފަޅަކާއި ގިރިއަކާއި ހަލަކާ އޭނާ ނަގައިފި. މި ރާއްޖޭގައި ސަރުކާރު ހިއްސާވާ ކުންފުންޏެއް އޮތިއްޔާ އެވެސް އޭނާގެ އަތަށް ނަގައިފި" ނަޝީދު ވިދާޅުވިއެވެ.

ނަޝީދު ވިދާޅުވީ އަދީބު މިހުރިހާ މަސައްކަތެއް ކުރެއްވީ ސީދާ ރައީސް ޔާމީންގެ އިރުޝާދުގެ ދަށުން ކަމަށެވެ. އަދި އަދީބުގެ އަތްޕުޅަށް ވަތް އެއްޗެއް އޮތްހެން ހީފުޅު ނުވާކަމަށާއި، އެ އުމުރުގައި އެހެންވެސް ވެދާނެ ކަމަށެވެ.

"އަދީބު އަޅުގަނޑަކަށް ހިޔެއް ނުވޭ އަތަށް އެއްޗެއް އެއްކުރާ ގޮތަކަށް ހެން ހުންނެވީ ވެސް. އަދި އަދީބުގެ އަތަކަށް އަޅުގަނޑަކަށް ލަފައެއް ނުކުރެވޭ މާ ބޮޑު އެއްޗެއް ލިބޭ ކަމަކަށް ވެސް. ކޮންމެއަކަސް ގޯނި ގޯނީގައި ގެން ގޮސް އެޅި ތަންތަން އެ ގޯނި ގޯނީގައި ގެންދިޔަ ކުދިން މާ ތަފްސީލު ބަޔާނުގައި ކިޔާދީފައި ވޭ" ނަޝީދު ވިދާޅުވިއެވެ.

ފަހަކަށް އައިސް އެމްޑީޕީން ބާއްވަމުން އަންނަ ކެމްޕޭން ޖަލްސާތަކުގައި ނަޝީދު ގެންދަވަނީ ޔާމީނަަށް ވަރަށް ބޮޑަށް ފާޑު ވިދާޅުވަމުންނެވެ. އަދި އެމްއެމްޕީއާރުސީގެ މައްސަލައިގައި ހުރިހާ ގޯހެއް ހެއްދެވީ ޔާމީން ކަމަށް ވިދާޅުވެ، އެކަމުގެ ރިޕޯޓްތައް އެމަނިކުފާނުގެ އަތްޕުޅުގައި ހުރިކަމަށް ވިދާޅުވެފައި ވެއެވެ.

ސިޔާސީ