ކުރީގެ ރައީސް އަބްދުﷲ ޔާމީން ދައުލަތުން ވައްކަންކޮށްފައި ވަނީ އެންމެ ގޮތަކަށް ނޫން ކަމަށާއި، ތިން ގޮތަށް ދައުލަތުން ވައްކަން ކޮށްފައިވާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީން ހއ. މުރައިދޫގައި ބޭއްވި އެމްޑީޕީގެ ކެމްޕޭން ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ، ދިވެހި ދައުލަތުގެ ހަޒާނާއިން ރައީސް ޔާމީންގެ ސަރުކާރުގައި ވައްކަން ކޮށްފައި ހުރި މިންވަރަށް ދުވަހަކުވެސް ދައުލަތުން ވައްކަން ކޮށްފައި ނެތް ކަމަށެވެ. އަދި ޔާމީން މި ވައްކަން ކޮށްފައިވަނީ ތިން ގޮތަކަށް ކަމަށާއި، އެއީ ސަރުކާރު ހިއްސާވާ ކުންފުނިތައް މެދުވެރިކޮށް ކޮށްފައިވާ ވައްކަން ކަމަށެވެ.
"އޭގެތެރެއިން ފެންނަން އޮޮތީ އެމްއެމްޕީއާރުސީގެ ވާހަކަ އެކަނި ފާޅުކަން ބޮޑު ގޮތެއްގައި. އެހެންނަމަވެސް އެ ކުންފުނި އެކަންޏެއް ނޫން. ފެނަކަ އަދި ޕޯޓް އޮތޯރިޓީ ވެސް. ދެން އޮތް ސަރުކާރުގެ ހުރިހާ ކުންފުނިތައް ހިންގަމުން ގެންދިޔައީ ޖަރީމާތައް. އަދި ކޮންޓްރެކްޓްތައް ދެމުން ގެންދިޔައީ މަޖިލިސް މެންބަރުންނާއި ގުޅުން ހުރި ކުންފުނިތަކަށް" ނަޝީދު ވިދާޅުވިއެވެ.
އެމަނިކުފާނު ވިދާޅުވީ ޔާމީންގެ ސަރުކާރުން މަސައްކަތް ހަވާލުކުރި މަޖިލިސް މެންބަރުންގެ ކުންފުނިތަކުން އެ މަސައްކަތް ކުރުމުގެ އެއްވެސް ތަޖްރިބާއެއް ގާބިލްކަމެއް ހުނަރެއް ލިބިފައި ހުރި ކުންފުނިތަކެއް ނޫން ކަމަށެވެ. އަދި ރާއްޖޭގެ އެކިއެކި ކަންކޮޅުތަކުގައި މަސައްކަތްތައް ފެށި ނުނިމިވާކަން ނަޝީދު ފާހަގަކުރެއްވިއެވެ.
މުރައިދޫގައި ވާހަކަފުޅުދައްކަވަމުން ނަޝީދު ވިދާޅުވީ މިދިޔަ ސަރުކާރުގައި އެމްއެމްޕީއާރުސީން އެކަނި 1.4 ބިލިއަން ރުފިޔާ ވަގަށް ނަގާފައިވާއިރު، އެއީ މުރައިދޫ ރައްޔިތުން ބޭނުންވާ ހުރިހާ ކަމެއް ހަތަރު ފަހަރަށް ކުރެވޭނެހާ ފައިސާ ކަމަށެވެ.
"ތިބޭފުޅުންގެ ފެނާއި ނަރުދަމާ، ތިބެފުޅުންގެ ބަނދަރުގެ ފައިކަށި، ތިބޭފުޅުންގެ މަދުރަސާ، ތިބޭފުޅުންގެ ހެލްތް ސެންޓަރު، ތިބޭފުޅުންގެ މަގުތައް، ތިބޭފުޅުންގެ ބޯހިޔާވަހިކަން، ތިބޭފުޅުންގެ މާރުކޭޓް، ތިބޭފުޅުންގެ ކަރަންޓު. މި ދެންނެވި ހުރިހާ ކަމެެއް ކުރަން ނުދާނެ އެއް ބިލިއަން ރުފިޔާ" ނަޝީދު ވިދާޅުވިއެވެ.
މި ޖަލްސާގައި ނަޝީދު ވަނީ މުރައިދޫ ހިމެނޭ ބާރަށު ދާއިރާގެ މިހާރުގެ މެންބަރު އަދި ޕީޕީއެމްގެ ކެންޑިޑޭޓަށް، އެމްއެމްޕީއާރުސީގެ ހިޔާނާތުގެ ފައިސާގެ މައްސަލައިގައި ތުހުމަތުގެ އިނގިލި ދިގުވާކަމަށް ބުނެ ފާޑު ވިދާޅުވެފައެވެ. އަދި ސަރުކާރު ކެންޑިޑޭޓް ކަމަށް އޭނާ ދައުވާ ކުރާއިރު، ސަރުކާރު ކެންޑިޑޭޓަކީ ކާކުކަން ރައްޔިތުންނަށް ސާފުވާނެކަމަށް ނަޝީދު ވިދާޅުވިއެވެ.
ދަ ދަންނަބޭކަލު ދޯ މިއީ... ބޭކާރު ވާހަކަ ނުދައްކާ ކޯޓުގައި ސާބިތުކޮށް ދީބަލަ. ދައްކާ ވާހަކައަކުން ޔާމީން ދާނީ ގެއަށް އަދި ޕާޓީ އޮފީހަށް. ކޯޓުގައި ސާބިތުކުރީމަ ދޯ ޖަލުގައި އޮންނާނީ.
ކޮބާ ރައީސް އިބޫ މީނަ ލައިދީބަލަ ތި ހަދައިގެން އުޅޭ ކޮމިޝަނައް. ހުރިހާ އެއްޗެއް އިގޭނެ. އަފުރާޝީމު މަރާލި މީހާވެސް މީނަ ބުނީ މިހާރު ވީ ރަށުން ބޭރުގައޭ. އެއީ ކުޑަކުއްޖެކޭ.