އަންނަ މަހުގެ ހަ ވަނަ ދުވަހު ބާއްވާ 19 ވަނަ ރައްޔިތުންގެ މަޖިލީހުގެ އިންތިހާބު ލަސްކުރުމަށް އިދިކޮޅު ޕީޕީއެމުން މަސައްކަތް ކުރަމުންދާ ކަމަށާއި، އެކަން ކުރުމުގެ ފުރުސަތު ނުދެއްވާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީ ޓިކެޓްގައި ހަނިމާދޫ ދާއިރާއަށް ވާދަކުުރައްވަ ކެންޑިޑޭޓްގެ ކެމްޕޭން ޖަލްސާގައިި ވާހަކަފުޅު ދައްކަވަމުން ރައީސް ވިދާޅުވީ ކެމްޕޭންގެ އެންމެފަހު ވަގުތުކޮޅު ކުރިމަތިލަމުން އަންނަ އިރު، ތަފާތު އަޑުއަޑު އިވިވަޑައިގަންނަވާ ކަމަށެވެ. އެގޮތުން އިންތިހާބު ފަސްކުރުމަށް މިހާރު އިދިކޮޅުގައި އޮތް ޕީޕީއެމުން މަސައްކަތް ކުރަމުންދާކަން އެނގިވަދައިގަންނަވާ ކަމަށާއި، މިއީ އެބޭފުޅުން ވެރިކަމުގައި ތިއްބެވި އިރު ވެސް މަސައްކަތް ކުރަމުން ގެންދިޔަ ގޮތްކަމަށް ރައީސް ވިދާޅުވިއެވެ.
"އެހެންނަމަވެސް އަޅުގަނޑުމެން މިތިބީ ވަރަށް ސަމާލުވެގެން. އިރާދަ ކުރެއްވިއްޔާ އިންތިހާބު ބާއްވަން އިލެކްޝަންސް ކޮމިޝަނުން ކަނޑައަޅާފައި އޮތް ހައެއް އެޕްރީލްގައި އިންތިހާބު ބޭއްވިގެންދާނެ" ރައީސް ވިދާޅުވިއެވެ.
ރައީސް ވިދާޅުވީ ކުރިއަށް އޮތް މަޖިލިސް އިންތިހާބުގައި ރައްޔިތުން ހޮއްވަވާ މީހަކާ ދޭތެރޭގައި ސަމާލުވާންޖެހޭ ކަމަށެވެ. އަދި މި އިންތިހާބު ފެށިގެން އައި އިރުގައި އެމަނިކުފާނު ހުންނެވީ މަޑުކޮށްލައިގެން ބައްލަވަން ކަމަށާއި، އެހެންނަމަވެސް އިންތިހާބުގެ ކެމްޕޭނުގެ މިސްރާބު ދާދިމާލުން އަނެއްކާ ވެސް ރާއްޖެ ކުރިން އޮތްތަނަށް ހިނގައިދާނެ ކަމުގެ ބިރު ހީފުޅުވާކަމަށް ރައީސް ވިދާޅުވިއެވެ.
"އަޅުގަނޑުގެ ވާޖިބެއް އަދި މަސްއޫލިއްޔަތެއް ތިބޭފުޅުން އަޅުގަނޑާ ހަވާލުކުރި މަސައްކަތްތައް ފުއްދައި ދިނުމަށް މަސައްކަތް ކުރުން. އަޅުގަނޑަށް ގަބޫލުކުރެވުނީ މި ކެމްޕޭނުގައި އަމަލީގޮތުން ބައިވެރިވެ ސަރުކާރުގެ ވައުދުތައްކަށް ތާއިދިކުރާ، އެމްޑީޕީގެ ސިޔާސަތުތައް ގަބޫލުކުރާ ތިބެފުޅުންގެ އަޑު އިއްވާނެ ރައްޔތިުންގެ މަޖިލީހުގެ މެންބަރުން ހޮވުމަށްޓަކައި އަޅުގަނޑު ކުރަންޖެހޭ މަސައްކަތް ކުރަން ޖެހިއްޖެކަން" ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު ހަނިމާދޫ ދާއިރާއަށް އައިސް ހުންނެވީ އެ ސަބަބަށްޓަކައި ކަމަށާއި، ހަނިމާދޫ ދާއިރާއަށް އެމްޑީޕީން ކުރިމަތިލައްވައިގެން ހުންނެވި ކެންޑިޑޭޓަކީ ސަރުކާރުގެ ވައުދުތައް ފުއްދުމަށްޓަކައި އަދި އެމްޑީޕީގެ އެޖެންޑާ 19 ފުއްދުމަށްޓަކައި ރައްޔިތުންގެ މަޖިލީހުން ފާސްކޮށްދެއްވުމަށްޓަކައި، އަދި ތިބޭފުޅުންގެ އަޑު މަޖިލީހުގައި އުފެއްލެވުމަށްޓަކައި އެންމެ އެކަށީގެންވާ ކެންޑިޑޭޓް ކަމަށެވެ.
