އަންނަ މަހު ބާއްވާ ރައްޔިތުންގެ މަޖިލީހުގެ އިންތިހާބުގައި، ސަރުކާރު ކޯލިޝަނަށް މެޖޯރިޓީ ނުލިބިއްޖެ ނަމަ، އަނެއްކާވެސް އަނިޔާކަން އިޔާދަވާތަން ފެނިގެންދާނެ ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
މައުމޫން މިހެން ވިދާޅުވީ އެމަނިކުފާނުގެ ދަރިކަލުން އަދި މިހާރު މަޖިލީހުގެ ދިއްގަރު ދާއިރާގެ މެންބަރުކަން ކުރައްވަމުން ގެންދަވާ ފާރިސް މައުމޫންގެ ކެމްޕޭން ޖަލްސާގައެވެ. މައުމޫން ވިދާޅުވީ ކުރީގެ އަނިޔާވެރިކަން އިއާދަވުމަކީ ދިވެހިން އަލުން ދެކެން ބޭނުންވާ ކަމެއް ނޫން ކަމަށެވެ. އަދި ކޯލިޝަން ޕާޓީތައް ނޫން އެހެން ޕާޓީތަކަށް މެޖޯރިޓީ ލިބިއްޖެ ނަމަ، ކުރީގެ އަނިޔާވެރިކަން އަނބުރާ އަންނާނެ ކަމަށާއި، އެއްވެސް ކުށެއް ނެތް އެތައް ބަޔަކު ޖަލަށް ދާން ޖެހޭނެ ކަމަށް މައުމޫން ވިދާޅުވިއެވެ.
"އޭރުގެ އަނިޔާވެރިކަން އެއީ އަޅުގަނޑުމެން އިތުރަށް ދެކެން ބޭނުންވާ ކަމެއް ނޫން. އަޅުގަނޑުމެންގެ މި ކޯލިޝަންގެ ހަތަރު ޕާޓީ ނޫން އެހެން ޕާޓީތަކަށް މެޖޯރިޓީ ލިބިއްޖެއްޔާ އެއްކަލަ އަނިޔާ ވެރިކަން އަނބުރާ އަންނާނެ. މީހުންގެ ވަޒީފާތައް ގެއްލޭނެ. މީހުން މަގުމަތިވާނެ. މީހުންގެ ހައްގުތައް ގެއްލިގެންދާނެ. އެއީ ބޭނުންވާ ކަމެއް ނޫން" މައުމޫން ވިދާޅުވިއެވެ.
މައުމޫން ވިދާޅުވީ އޭރު [ކުރީގެ ރައީސް ޔާމީންގެ ވެރިކަމުގައި] ރާއްޖެ އޮތް ހާލަތަށް ދާން ދެން ބޭނުންފުޅުނުވާ ކަމަށާއި، ބޭނުންފުޅުވަނީ އެންމެންނަށް އަމާން ކަމާއި އެކު ހަމަޖެހިގެން ދިރިއުޅެވޭނެ މާހައުލެއް ގާއިމް ވެފައި އޮތުން ކަމަށެވެ.
މައުމޫން ވިދާޅުވީ ކޯލިޝަން ޕާޓީތަކުން މަސައްކަތް ކުރަމުންދަނީ ރައިސް އިބްރާހީމް މުހައްމަދު ސޯލިހުގެ ސަރުކާރު ދަމަހައްޓަން ކަމަށެވެ. އަދި ރައްޔިތުން ހޮވަން ޖެހޭނީ ކޯލިޝަން ކެންޑިޑޭޓުން ކަމަށާއި، ކޯލިޝަންގައި ހިމެނޭ ޕާޓީތައް ނޫން އެހެން ޕާޓީއެއްގެ މެމްބަރުން އިންތިހާބު ކޮށްދިނުމަކީ އެމަނިކުފާނު އެދޭ ގޮތް ނޫން ކަމަށް މައުމޫނު ވިދާޅުވިއެވެ.
މައުމޫން ވިދާޅުވީ ރައީސް ސޯލިހު ތާއީދު ކުރައްވާނީ ހަމައެކަނި އެއް ޕާޓީއެއްގެ ކެންޑިޑޭޓުންނަށް ނޫން ކަމަށާއި، ކޯލިޝަންގެ އެހެން ކެންޑިޑޭޓުންނަށް ވެސް ރައީސް ތާއިދުކުރައްވާ ކަމަށް މައުމޫން ވިދާޅުވިއެވެ.
" އަޅުގަނޑަށް އެނގޭ އެމަނިކުފާނު [ރައީސް އިބްރާހިމް މުހައްމަދު ސޯލިހު] ތާއިދު ކުރައްވާނީ ހަމައެކަނި އެމްޑީޕީ ކެންޑިޑޭޓުންނަށް ނޫންކަން. އެ ވާހަކަ އަޅުގަނޑު ގާތު ވަނީ ވިދާޅުވެފައި. އަދި އެމަނިކުފާނު ކުރައްވާ ހުރިހާ ކަމަކުން އެކަން އެނގޭ. އެމަނިކުފާނަކީ ތިބޭފުޅުންނަށް އެނގިވަޑައިގަންނަވާނެ ފަދައިން އަޅުގަނޑުމެން އެންމެން ކުރި މަސައްކަތުން ހޮވި ވަޑައިގެންފައިވާ ރައީސް" މައުމޫން ވިދާޅުވިއެވެ.
މައުމޫން ވިދާޅުވީ ރައީސް އިބްރާހިމް މުހައްމަދު ސޯލިހަކީ އެންމެން ކުރި މަސައްކަތުން ހޮވިވަޑައިގެންނެވި ރައީސެއް ކަމަށެވެ. އަދި އެމަނިކުފާނަކީ ވެރިކަން ކުރާ ކޯލިޝަންގެ މައި ޕާޓީ އެމްޑީޕީގެ ނުވަތަ ވަކި ޕާޓީއެއްގެ ރައީސެއް ނޫން ކަމަށެވެ.
"އެމަނިކުފާނަކީ [ރައީސް އިބްރާހިމް މުހައްމަދު ސޯލިހު] އަކީ އަޅުގަނޑުމެން ކޯލިޝަންގެ ރައީސް" މައުމޫން ވިދާޅުވިއެވެ.
