ސަރުކާރު ކޯލިޝަންގެ މައި ޕާޓީ އެމްޑީޕީން މަޖިލީހަށް ހުށަހަޅާ ގާނޫނީ އޮނިގަނޑު "އެޖެންޑާ 19" ގެ ދަށުން ކޮންމެ ރައްޔިތަކަށް ވެސް ގެދޮރު ބިނާ ކުރުމަށް ލުއި ލޯނެއް ލިބިވަޑައިގަންނަވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީ ޓިކެޓްގައި ލ. އިސްދޫ ދާއިރާއަށް ވާދަކުރައްވާ ކެންޑިޑޭޓްގެ ކެމްޕޭން ޖަލްސާގައި ވާހަކަ ދައްކަވަމުން ނަޝީދު ވިދާޅުވީ އެމްޑީޕީގެ އަމާޒަކީ ރާއްޖޭގެ ރައްޔިތުންނަށް ބޯހިޔާވަހިކަން ފޯރުކޮށްދެއްވުން ކަމަށެވެ. އަދި މިވަގުތު ރާއްޖޭގެ ބޯހިޔާވަހިކަން ލިބެނީ 40،000 ގެއިން ކަމަށާއި، އެއީ ވަރަށް މަދު އަދަދެއް ކަމަށް ނަޝީދު ވިދާޅުވިއެވެ. އަދި އެއަށްވުރެ މީހުން މާ ގިނަވެއްޖެ ކަމަށާއި، އެންމެ މަދުން މީހުން ދިރިއުޅޭ ގެތަކުގައި ވެސް 10 މީހުން ނުވަތަ 6 މީހުން ދިރިއުޅެމުންދާކަމަށާއި، ގެއެއް އިމާރާތްކުރަން ޖެހޭ ހަރަދާއި، އުފުލަންޖެހޭ ތަކުލީފަކީ ފެންނަމުންދާ ހަގީގަތެއް ކަމަށް ނަޝީދު ވިދާޅުވިއެވެ.
"އެޖެންޑާ 19 ގެ އެންމެ މުހިންމު އެއް ބޭނުމަކީ ބޯހިޔާވަހިކަން ފޯރުކޮށްދިނުން. ލޯނެއްގެ އިމާރާތް ކުރުމަށް، ލުއި ލޯނު ރާއްޖޭގެ ހުރިހާ ރައްޔިތުންނަށް އިރާދަކުރެއްވިއްޔާ ހޯދައިދެވޭނެ. ތިބޭފުޅުން ބޭނުންވެލައްވާ ގެދޮރު ތިބޭފުޅުންނަށް އިމާރާތް ކުރެވޭނެ" ނަޝީދު ވިދާޅުވިއެވެ.
އެޖެންޑާ 19 ގައިވާގޮތުން ބޯހިޔާވަހިކަން ބިނާކުރާނެ ތަނަވަސްކަމެއް ނެތް ފަރާތްތަކަށް ދިގު މުއްދަތަކުން ދައްކާ ހަލާސްކުރާ އުސޫލުން ކުޑަ އިންޓަރެސްޓެއްގައި ލުއިލޯނު ލިބޭނެ ގޮތް ފަހިކޮށްދިނުމަށް އެ ގާނޫނު ލާޒިމްކުރާނެ ކަމަށް ބުނެފައިވެއެވެ. އަދި މި ލޯނު ދޫކުރުމުގައި މާލެއާއި ރާއްޖޭގެ އެހެން ރަށްތަކާއި ތަފާތު ނުކުރާނެ ކަމަށް ބުނެފައިވެއެވެ.
ގެދޮރު ބިނާކުރުމަށް ލުއި ލޯނެއް ދިނުމުގެ އިތުުރުން ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުތަކުގެ މަސައްކަތް ވެސް ކުރިއަށް ދާކަން ފާހަގަކުރައްވަމުން ނަޝީދު ވިދާޅުވީ އެ ޕްރޮޖެކްޓްތައް ޓެންޑާ ކުރެވި ކޮންޓްރެކްޓަރުންނާއި ހަވާލުކުރުމުގެ މަސައްކަތް މިހާރު ކުރިއަށްދާ ކަމަށެވެ.
