ތަސައްރަފު ނުފުދޭ، ފުއްދުންތެރިިކަން ނެތް މީހަކު މަޖިލީހަށް ހޮވުމުން އެމީހުން ފުރާނީ އަމިއްލަ ޖީބުކަމަށާއި، މަޖިލީހަށް ހޮވަންވީ ފުއްދުންތެރި މިލިއަނަރުން ކަމަށް ޖުމްހޫރީޕާޓީގެ ރައީސް ގާސިމް އިބްރާހީމް ވިދާޅުވެއްޖެއެވެ.
ޖޭޕީޕގެ ޓިކެޓްގައި މަޖިލީހުގެ ދަނގެތި ދާއިރާއަށް ކުރިމަތިލެއްވި ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމްގެ ކެމްޕޭން ޖަލްސާގައި އދ. ދިގުރަށުގައި ވާހަކަ ދައްކަވަމުން ގާސިމް ވިދާޅުވީ މަޖިލީހަށް ހޮވާނީ ކޮން މެންބަރެއްތޯ ކާކުތޯ ހޮވާނީ ރައްޔިތުން ކަމަށެވެ. އަދި ޖޭޕީ ތެރޭގައި ތަސައްރަފު ނުފުދޭ ކުޑަކުއްޖަކު ނެތް ކަމަށާއި، ޖޭޕީން ކުރިމަތިލާފައި ވަނީ ތަޖުރިބާހުރި ގާބިލް ތައުލީމީ ފުއްދުންތެރި މީހުން ކަމަށް ގާސިމް ވިދާޅުވިއެވެ.
ގާސިމް ވިދާޅުވީ އަމިއްލައަށް ކައިބޮއިގެން އުޅޭވަރުގެ މީހުން މަޖިލީހުގެ ގޮނޑިތަކަށް ކުރިމަތިލައިގެން ހޮވުމުން ދެން ވާނީ ކިހިނެއްތޯ ވިދާޅުވެ ސުވާލު އުފައްދަވާފައެވެ. އަދި މުއްސަދިންނާއި، މަހުޖަނުންނާއި، މިލިއަނަރުން ތިބެންވީ އެތަންތާގައި [މަޖިލީހުގައި] ގައި ކަމަށާއި. އެއިރުން ރިޝްވަތެއް ނަގައިގެން ވިކިގެނެއް އަދި ވިކޭ ގޮނޑިއަކަށް ނުވާނެ ކަމަށް ގާސިމް ވިދާޅުވިއެވެ.
"އެކަމަކު ތަސައްރަފް ނުފދޭ އަދި ފުއްދުންތެރިކަމެއް ނެތް މީހާ ކިހިނެއްތޯ ވާނީ. އަމިއްލަ ޒިންމާއެއް ނެތް މީހާ ކޮންކަމެއްތޯ މަޖިލީހަށް ގޮސް އެހެން މީހުންނަށް ކޮށްދޭނީ. ނޯންނާނެ. އެމީހާގެ އަމިއްލަ ޖީބު ފުރޭތޯ ބަލާނީ ނުވަތަ އަމިއްލަ ކަމެއް ކުރެވޭތޯ ބަލާނީ. ގައުމަށްޓަކައި ހިދުމަތްކުރަން ހަވާލުކުރަންޖެހޭނީ ގިނަ ޒިިންމާވެ، ގިނަ މަސްއޫލިއްޔަތު އަދާކުރާ ގިނަ ކަންތައްތަކެއް ބަލަހައްޓަން ޖެހިފައިވާ މީހާ. އޭނާއަށް އިނގޭނީ އުނދަގޫތަކާއި ރަނގަޅުކަންތައްތަކާއި ހެޔޮކަންތައްތަކާއި ނުބައިކަންތައް ހުރި މިންވަރު" ގާސިމް ވިދާޅުވިއެވެ.
މަޖިލީހުގައި މިލިއަނަރުން ތިބެންޖެހޭކަމަށް ގާސިމް ވިދާޅުވެފައިވާ އިރު، ކޯލިޝަންގެ މައި ޕާޓީ އެމްޑީޕީން އަންނަނީ މަޖިލިސް މުއްސަދިންގެ ނުފޫޒުން ސަލާމަތް ކުރަންޖެހޭކަމަށް ވިދާޅުވެ، ނުސީދާ ގޮތެއްގައި ގާސިމަށް ފާޑު ވިދާޅުވަމުންނެވެ.
ގާސިމަށް މަޖިލީހުގެ ހަ ގޮނޑި ވެސް ކާމިޔާބު ނުކުރެވޭނެކަމަށް ކުރީގެ ރައީސް މުހައްމަދު ނަޝީދު ވިދާޅުވި ވާހަކައަށް ރައްދު ދެއްވަމުން ގާސިމް ވިދާޅުވީ "ފުރިފައި ހުންނަ އެއްޗެއް ގުޑުގުޑެއް ނާޅާނެ" ކަމަށެވެ. އަދި އެ ފާޑަށް ވާހަކަ ދައްކަވަނީ އެމްޑީޕީ އަށް ޔަގީންކަން ނެތުމުން ކަމަށާއި ހަ ގޮނޑި ލިބޭނީ އެމްޑީޕީ އަށް ކަމަށް ގާސިމް ވިދާޅުވިއެވެ. އަދި މަޖިލިސް ގޮނޑި ދޭނެތޯ ނުވަތަ ނޫންތޯ ނިންމާނީ ރައްޔިތުން ކަމަށާއި އެ ނިންމުން ޖެހޭނީ ގަބޫލު ކުރަން ކަމަށް ވެސް ގާސިމް ވިދާޅުވިއެވެ.
"ރައްޔިތުން ނިންމީމަ އެނގޭނެތާ ދެއްތޯ ހައެއްތޯ، ތިނެއްތޯ، ދެއެއްތޯ، އެކަކަށް ވެސް ވެދާނެ. އަޅުގަނޑު ވެސް މާދަން ހިނގައިދާނެ. ސުމަކަށް ވެސް ވެދާނެ. އެކަމަކު އެ ހިސާބުންތާ އެކަން އެނގޭނީ ދެއްތޯ. ރައްޔިތުން ނިންމާނީ. ހިތުން ރުހުނަސް ނުރުހުނަސް ޖެހޭނީ ގަބޫލު ކުރަން. އެ އޮތީ ނިންމާފަ ބޮޑު ނިންމުން. އޭގެ މައްޗަށް ނޯންނާނެ ނިންމާނެ ބޮޑު ނިންމުމެއް" ގާސިމް ވިދާޅުވިއެވެ.
މަޖިލިސް އިންތިހާބުގައި އެމްޑީޕީން މަޖިލީހުގެ އެންމެ ދާއިރާއެއް ފިޔަވައި ހުރިހާ ދާއިރާއަކަށް ކުރިމަތިލާން ނިންމި ހިސާބުން ޖޭޕީއާއި އެމްޑީޕީއާއި ދެމެދު ނުތަނަވަސްކަން އުފެދި، އެ މައްސަލަ މިހާތަނަށް ހައްލުވެފައި ނުވެއެވެ. އަދި ދާދި ފަހުން ޖޭޕީން ވަނީ އެ ޕާޓީން ވާދަ ނުކުރާ ނަމަވެސް، އިދިކޮޅު ޕީޕީއެމް ޕީއެންސީން ވާދަކުރާ ދާއިރާތަކަށް ތާއިދުކުރާނެކަން ހާމަކޮށްފައެވެ.
