ރާއްޖެއާ އެއް ބޯޑާ ލައިނެއްގައިވާ ގައުމުތަކާ އެކު މަސައްކަތް ކުރަން ރާއްޖެއަށް މަޖުބޫރު ކަމަށް އެމްއެންޑީއެފް ކޯސްޓް ގާޑްގެ ކޮމާންޑާ ބްރިގޭޑިއާ ޖެނެރަލް އަލީ ޒުހައިރު ވިދާޅުވެއްޖެއެވެ.
ކޯސްޓްގާޑް ބިލްޑިން ގައި މިއަދު އެމްއެންޑީއެފުން ބޭއްވި ނޫސް ވެރިންގެ ބައްދަލު ވުމުގައި ޒުހައިރު ވިދާޅުވީ، ރާއްޖޭގެ ސަލާމަތާ ރައްކާތެރި ކަމަކީ، ރާއްޖެއާ އެއް ބޯޑާ ލައިނެއްގައިވާ ގައުމުތަކަށް މުހިންމު ކަމެއް ކަމަށާ، އެ ގައުމުތަކު ގެ ސަލާމަތާ ރައްކާތެރި ކަމަކީ، ރާއްޖެ އަށް ވެސް މުހިންމު ކަމެއް ކަމަށެވެ.
އަދި ޒުހައިރު ވިދާޅުވީ ރާއްޖެއަށް އެހީތެރިކަން ފޯރުކޮށް ދެނީ އެންމެ ގައުމަކުން ނޫން ކަމަށާ، ދުނިޔޭގެ އެހެނިހެން ގައުމުތަކުންވެސް އެމްއެންޑީއެފުން ބޭނުންވާ އެހީތެރިކަން ފޯރުކޮށް ދެމުން ދާކަމަށެވެ. އޭނާ ވިދާޅުވީ ހާއްސަ ގޮތެއްގައި ރާއްޖޭގެ ސަރަހައްދުތައް ބެލެހެއްޓުމުގެ ކަންތައްތައް ކުރިއަށް ގެންދަނީ، ދުނިޔޭގެ އެހެން ގައުމު ތަކެކޭ ވެސް އެއްފަދައިން "މިލިޓަރީ ޓް މިލިޓަރީ" ކޯޑިނޭޝަނަކާ ކޯޕަރޭޝަނެއްގެ ދަށުން ކަމަށެވެ.
މީގެ އިތުރުން ރާއްޖޭގެ ކަނޑުގެ ސަރަހައްދު، ވައިގެ މަގުން ބެލެހެއްޓުމުގެ ނިޒާމެއް، ގާއިމު ކުރުމު މަސައްކަތް ކުރަމުން ދާ ކަމަށާ، އެކަމުގައި އެހީތެރިވާ ގައުމުތަކާ އެކު އެކަން ކުރަމުން ގެންދަވާނެ ކަމަށް ޒުހައިރު ވިދާޅުވިއެވެ. އޭނާ ވިދާޅުވީ ރައްޖޭގެ ސަލާމަތީ ކަންކަން ބަލަހައްޓަން ޖެހިވަޑައިގަންނަވާ ކަމަށާ، އެކަން ކުރެވޭނީ، ރާއްޖެއިން އެކަމަށްޓަކާ މަސައްކަތް ތަކެއް ކޮށްގެން ކަމަށެވެ.
ޒުހައިރު މި މޭރުމުން މިއަދު ވާހަކަ ދައްކަވާފާ ވާއިރު، އިންޑިއާއިން ރާއްޖެއަށް ހަދިޔާ ކޮށްފައިވާ ދެ ހެލިކޮޕްޓަރު އޮޕަރޭޓް ކުރަން ކަމަށް ބުނެ އެ ގައުމުގެ އަސްކަރީ ސިފައިން ރާއްޖޭގައި ހަރަކާތްތެރި ވަމުން ދާތީ، އިދިކޮޅު ފަރާތްތަކުން ދަނީ ކަންބޮޑުވުން ފާޅު ކުރަމުންނެވެ. އިންޑިއާ އިން ދިން ދެ ހެލިކޮޕްޓަރު އޮޕަރޭޓު ކުރުމަށްޓަކާ ރާއްޖޭގައި އިންޑިއާގެ 50 ސިފައިން އެބަ ތިބި އެމްއެންޑީއެފުން ބުނެއެވެ.
