މާލޭ ރަސްފަންނު ސަރަހައްދުގައި ހުރި ރުށްތަކުން ހުއްދަނެތި ކުރުނބާ އެޅި ކަމުގެ ތުހުމަތުގައި 56 އަހަރުގެ މީހަކު ހައްޔަރުކޮށް، އޭނާގެ ބަންދަށް ކްރިމިނަލް ކޯޓުން 7 ދުވަސް ޖަހައިފިއެވެ.
ސ. ހިތަދުއަށް ނިސްބަތްވާ މި މީހާ ހައްޔަރުކޮށް ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ގާޒީ މުޒައްމިލް ނާސިރު ނެރުއްވި އަމުރުގައި ވަނީ އޭނާ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެތީ ބަންދުގައި ބަހައްޓަންޖެހޭ ކަމަށެވެ. އަދި އޭނާއަކީ މީގެ ކުރިންވެސް ކުށުގެ ރެކޯޑް އޮތް މީހެއްކަން ކޯޓު އަމުރުގައި ފާހަގަކޮށްފައިވެއެވެ.
ކޯޓުގައި އޭނާ ބުނެފައިވަނީ ރަސްފަންނުގައި ހުންނަ ރުށްތަކުން ކުރުނބާ އެޅުމަކީ މަނާ ކަމެއްކަން އޭނާއަށް ނޭނގޭ ކަމަށެވެ.
މި ހާދިސާއާ ގުޅޭ ރިޕޯޓް ފުލުހުން ކޯޓަށް ހުށަހަޅާފައިވާއިރު، އޭނާ ކުށްކުރި ކަމަށް ބާރު ލިބޭ ބައެއް ހެކި ހުރި ކަމަށް ކޯޓުން ވަނީ ބުނެފައެވެ. ނަމަވެސް އޭނާ އެ ރުށްތަކުން އެޅީ ކިތައް ކުރުނބާ ކަމެއް ކޯޓުން އާންމުކުރި މައުލޫމާތުން އެނގޭކަށް ނެތެވެ.
މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.
