މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން، ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް އޮތް ސަރަހައްދު ހެދުމުގެ އަމަލީ މަސައްކަތް ފެށުމަށް މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އަާބަން ޑިވެލޮޕްމަންޓުން ތައްޔާރުވެއްޖެއެވެ.
މިނިސްޓްރީން ކުރި އިއުލާނެއްގައި ބުނެފައިވަނީ މަޝްރޫއުގެ އަމަލީ މަސައްކަތް ފެށުމަށް ޓަކައި ސުނާމީ ބިނާއިން ފެށިގެން އެމްޕީއެލްއާ ހަމައަށް ބޮޑުތަކުރުފާނު މަގުގައި ބަހައްޓާފައިވާ އެންމެހާ ތަކެއްޗާއި ސުނާމީ ބިނާ ސަރަހައްދުގައި އަޅާފައިވާ އުޅަނދުފަހަރު 3 އޮކްޓޫބަރު 2026 ވާ ހޮނިހިރު ދުވަހުގެ ރޭގަނޑު 11:00 ގެ ކުރިން ނަގައި ނިންމަންޖެހޭނެ ކަމަށެވެ.
އަދި އެ ތާރީހުގެ ފަހުން މަގުމަތީގައި ނުނަގާ ހުންނަ ތަކެއްޗާ ސުނާމީ ބިނާ ސަރަހައްދުގެ ފަޅުތެރޭގައި އަޅާފައިވާ އުޅަނދުފަހަރުތައް މިނިސްޓްރީގެ ފަރާތުން ނަގާނެކަމަށް މިނިސްޓްރީގެ ބަޔާނުގައި ބުނެފައިވެއެވެ.
ބޮޑުތަކުރުފާނު މަގު އަލުން ތާރުއަޅާ ފުޅާކޮށް، ފެންހިންދާ ނިޒާމު އިސްލާހުކުރުމުގެ ބޮޑު މަޝްރޫއަކީ މާލޭގެ ތޮއްޖެހުން ކުޑަކުރުމަށާއި ދަތުރުފަތުރުގެ ނިޒާމު ހަރުދަނާކުރުމަށް ސަރުކާރުން ކުރިއަށްގެންދާ މަޝްރޫއެކެވެ.
މި މަޝްރޫއުގެ ދަށުން އުތުރު ފަރާތު ބޮޑުތަކުރުފާނު މަގުގެ ބޮޑު ބައެއް (ހެންވޭރު ފެރީ ޓާމިނަލް އިން ފެށިގެން އެމްއެމްއޭ ސަރަހާއްދާ ހަމައަށް) ވަނީ ތާރުއަޅާ ޒަމާނީ ފެންވަރަށް ނިންމާ އާންމުންނަށް ހުޅުވާލާފައެވެ.
މި މަޝްރޫއު ފުރިހަމަވެގެންދާއިރު މާލޭގެ ވަށައިގެންވާ ބޮޑުތަކުރުފާނު މަގަކީ ދަތުރުފަތުރަށް ފަސޭހަ، ފުޅާ އަދި ފެންބޮޑުވުމުގެ މައްސަލައަށް ދާއިމީ ހައްލެއް ލިބިގެންދާނެ މަގަކަށް ވެގެންދާނެކަމަށް މިނިސްޓްރީން ބުނެފައިވެއެވެ.
