ރާއްޖޭގެ ފުރަތަމަ އަންހެން ޓުއަރގައިޑް ލައިސަންސް އައިޝަތު ޝީނާއަށް ދީފިއެވެ.
މިކަން ހާމަކޮށްފައިވަނީ މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަނުން މިއަދު ނެރުނު ބަޔާނެއްގައެވެ. މިއީ ރާއްޖޭގެ ފަތުރުވެރިކަމުގެ ތާރީހުގައި ދިވެހި އަންހެނަކަށް މި ލައިސަންސް ލިބުނު ފުރަތަމަ ފަހަރެވެ. މީގެ ކުރިން މި ދާއިރާގައި ޓުއާގައިޑުންގެ ގޮތުގައި ހަރަކާތްތެރިވަމުން އައީ ހަމައެކަނި ފިރިހެނުންނެވެ.
ޓޫރިޒަމް މިނިސްޓްރީން ބުނީ މިކަމާ ގުޅިގެން ޓޫރިޒަމް މިނިސްޓަރު މުހައްމަދު އަމީން ވަނީ މިއަދު ޝީނާއާ ބައްދަލުކުރައްވާ، ރަސްމީ ޓުއާގައިޑް ފާސް އޭނާއާ ހަވާލުކުރައްވާފައިކަމަށެވެ.
މި ބައްދަލުވުމުގައި މިނިސްޓަރު ވަނީ ސަރުކާރުގެ ނަމުގައި ޝީނާއަށް މަރުހަބާ ވިދާޅުވެ، ފަތުރުވެރިކަމުގެ ސިނާއަތުގައި އޭނާ ހޯދި މި ކާމިޔާބީ ފާހަގަކުރައްވާފައެވެ.
ރާއްޖޭގައި ޓުއާގައިޑެއްގެ ގޮތުގައި މަސައްކަތްކުރެވޭނީ މިނިސްޓްރީން ގަބޫލުކުރާ ޓުއާގައިޑް ކޯހެއް ފުރިހަމަކުރުމަށްފަހު، ރަސްމީ ފާހެއް ހޯދައިގެންނެވެ.
މި ފާސް ދޫކުރަނީ ކުށުގެ ރެކޯޑު ސާފުކުރުމަށްފަހު، ވަކި ޝަރުތުތަކެއް ފުރިހަމަވާ ދިވެހިންނަށެވެ. އަދި ފަތުރުވެރިންނަށް ހިދުމަތް ދޭއިރު މި ފާސް ފެންނަން އޮންނަ ގޮތަށް ހަރުކޮށްފައި ބެހެއްޓުމަކީ ގާނޫނީ ގޮތުން ލާޒިމުކަމެކެވެ.
އދ އިން 2025 ވަނަ އަހަރު އާންމުކޮށްފައިވާ ތަފާސްހިސާބުތައް ދައްކާ ގޮތުން ރާއްޖޭގެ އިގުތިސާދުގެ އެންމެ ބޮޑު ހިއްސާއެއް އޮންނަ ފަތުރުވެރިކަމުގެ ދާއިރާގައި މަސައްކަތްކުރާ މީހުންގެ ތެރެއިން ދިވެހި އަންހެނުންގެ ނިސްބަތަކީ އެންމެ 3 އިންސައްތައެވެ.
އަދި 2022 ވަނަ އަހަރުގެ ތަފާސްހިސާބުތަކަށް ބަލާއިރު ރިސޯޓުތަކުގައި ވަޒީފާއަދާކުރާ 55،874 މީހުންގެ ތެރެއިން 89 އިންސައްތައަކީ ފިރިހެނުންނެވެ. އާއިލީ ޒިންމާތަކާއި އިޖުތިމާއީ ގަބޫލުކުރުންތަކުގެ ސަބަބުން މި ދާއިރާގައި އަންހެނުންނަށް ގިނަ ގޮންޖެހުންތަކަކާ ކުރިމަތިލާންޖެހޭ ކަމަށް ދިރާސާތަކުން ދައްކައެވެ.
