ގާޒާގައި ހަތިޔާރު ބެހެއްޓުމާ ގުޅޭ ގޮތުން އެކުލަވާލާފައިވާ ޕްލޭނަކަށް ހަމާސްއާއި ފަލަސްތީނުގެ އެހެން ޖަމާއަތްތަކުން އެއްބަސްވެއްޖެއެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ މިއީ ސުލްހައާއި ސަލާމަތްތެރިކަން ގާއިމުކުރުމަށް އެޅުނު ވަރަށް މުހިންމު ފިޔަވަޅެއް ކަމަށް ސިފަކުރައްވާފައެވެ.
މި އެއްބަސްވުމުގެ ކޮޕީއަކާ ހަވާލާދީ އަލްޖަޒީރާއިން ރިޕޯޓުކޮށްފައިވާ ގޮތުގައި، ހަތިޔާރު ބެހެއްޓުމުގެ މަގުޗާޓު 14 ދުވަހުގެ ތެރޭގައި އެކުލަވާލަން ޖެހެއެވެ. އަދި ބައިނަލްއަގުވާމީ މޮނިޓަރިން ކޮމިޓީއެއްގެ ރުހުމާއި ހުރިހާ ފަރާތްތަކެއްގެ އެއްބަސްވުމާއެކު މި މުއްދަތު އިތުރުކުރުމުގެ ފުރުސަތު އޮންނާނެއެވެ.
ހަމާސްގެ ނެގޯޝިއޭޓިން ޓީމުގައި ހިމެނޭ ގާޒީ ހަމަދު އަލްޖަޒީރާއަށް މައުލޫމާތު ދެއްވަމުން ވިދާޅުވި ގޮތުގައި، މި މަޝްވަރާތަކަކީ ވަރަށް އުނދަގޫ މަޝްވަރާތަކެކެވެ. ނަމަވެސް އިޒްރޭލުން އެމީޙުންގެ ޒިންމާތައް އަދާނުކުރާ ނަމަ، އެއްބަސްވުމުގެ އެއްވެސް ބައެއް ހަމާސްއިން ތަންފީޒުނުކުރާނެ ކަމަށް އޭނާ ވިދާޅުވިއެވެ. ހަމަދު ފާހަގަކުރެއްވި ގޮތުގައި ހަތިޔާރު ބެހެއްޓުން ބިނާވެފައިވަނީ ގާޒާއިން އިޒްރޭލު ސިފައިން ފޭބުމާއި، ގާޒާ އާރާސްތުކުރުމުގެ މަސައްކަތް ކުރިއަށްދާ މިންވަރެއްގެ މައްޗަށެވެ. މިކަމާ ގުޅޭ ގޮތުން އިޒްރޭލުން އަދި ވަކި އެއްޗެއް ބުނެފައެއް ނުވެއެވެ.
ޓްރަމްޕް ވިދާޅުވި ގޮތުގައި މިއީ ގާޒާގެ ކަންކަން ބެލެހެއްޓުމަށް އުފައްދާފައިވާ 'ބޯޑް އޮފް ޕީސް' އަށް ލިބުނު ކާމިޔާބީއެކެވެ. މި އެއްބަސްވުމުގެ ދަށުން ގާޒާގެ ވެރިކަން ފަލަސްތީނުގެ އާ ސަރުކާރަކާ ހަވާލުކުރެވޭނެ ކަމަށާއި، އެ ސަރުކާރުން ބޯޑް އޮފް ޕީސްއާއެކު ގާތުން މަސައްކަތްކުރާނެ ކަމަށް ޓްރަމްޕްގެ 'ޓްރުތު ސޯޝަލް' ޕްލެޓްފޯމުގައި ލިޔުއްވާފައިވެއެވެ. އަދި މީގެ ސަބަބުން އިޒްރޭލަށް ސަލާމަތްތެރިކަން ލިބި، ގާޒާއަކީ ހަމަލާތައް ދޭ މަރުކަޒަކަށް ވުން ނިމުމަކަށް އަންނާނެ ކަމަށްވެސް އޭނާ ވިދާޅުވިއެވެ.
އެއްބަސްވުމުގައިވާ ގޮތުން، ހަތިޔާރު ބެހެއްޓުމުގެ މަރުހަލާ ފެށޭނީ ފަލަސްތީނުގެ ގައުމީ ކޮމިޓީއަކާއި ބައިނަލްއަގުވާމީ ސްޓެބިލައިޒޭޝަން ފޯސްއެއް ގާޒާއަށް ވަނުމަށްފަހުއެވެ. ހަތިޔާރުތައް ގުދަންކުރުމުގެ ކަންކަން ބަލަހައްޓާނީ ގައުމީ ކޮމިޓީންނެވެ. މި މަރުހަލާ ކުރިއަށްދާނީ ބައިނަލްއަގުވާމީ ކޮމިޓީއެއްގެ ބެލުމުގެ ދަށުން، ފަލަސްތީނުގެ ޖަމާއަތްތަކުގެ ބައިވެރިވުމާއެކުގައެވެ. އަދި ހަތިޔާރު ބެހެއްޓުން ގުޅިފައިވަނީ އިޒްރޭލު ސިފައިން ގާޒާއިން ފޭބުމާއެވެ. އެއްވެސް ހަތިޔާރެއް އިޒްރޭލާ ނުވަތަ ފަލަސްތީނު ނޫން އެހެން ފަރާތަކާ ހަވާލުނުކުރާނެ ކަމަށާއި، ގާޒާގައި ހަތިޔާރު ގެންގުޅޭނީ ހަމައެކަނި ގައުމީ ކޮމިޓީން ކަމަށްވެސް އެއްބަސްވުމުގައި ބަޔާންކޮށްފައިވެއެވެ.
ބޯޑް އޮފް ޕީސްގެ ފަރާތުން ގާޒާއަށް ކަނޑައަޅާފައި ހުންނަވާ މަންދޫބު ނިކޮލޭ މިލާޑެނޯވް ވިދާޅުވި ގޮތުގައި، މި އެއްބަސްވުމަށް އާދެވުނީ އެތައް މަހެއްގެ އުނދަގޫ މަޝްވަރާތަކަކަށް ފަހުއެވެ. އެއްބަސްވުން ތަންފީޒުކުރުމާއި މޮނިޓަރކުރުން ހަރުދަނާވާން ޖެހޭނެ ކަމަށާއި، ހަތިޔާރު ނެގުމާއި ސިފައިން ފޭބުން ކުރިއަށްދާންވާނީ އެއްވަރަކަށް ކަމަށް އޭނާ ފާހަގަކުރެއްވިއެވެ.
އަސްކަރީ ތަޖުރިބާކާރެއް ކަމަށްވާ ނިދާލް އަބޫ ޒައިދު އަލްޖަޒީރާއަށް މައުލޫމާތު ދެއްވަމުން ވިދާޅުވި ގޮތުގައި، އެއްބަސްވުމުގައި "ހަތިޔާރު ނެގުމުގެ" ބަދަލުގައި "ގުދަންކުރުން" ބޭނުންކޮށްފައިވުމަކީ މުހިންމު ތަފާތެކެވެ. އޭނާ ފާހަގަކުރެއްވި ގޮތުގައި ހަތިޔާރު ގުދަންކުރުމުގެ މަސައްކަތް ތިންވަނަ ފަރާތަކުން ކުރިއަށްގެންދާއިރު، އެއީ ދުޝްމަނުންނަށް ވާކަށް ނުޖެހެއެވެ. ނަމަވެސް ހަތިޔާރު ނެގުމުގެ މަސައްކަތް އާންމުކޮށް ކުރަނީ ދުޝްމަނުން ކަމަށްވާތީ، ފަލަސްތީނުގެ ޖަމާއަތްތަކުން އެކަމަށް އެއްބަސްނުވާނެ ކަމަށް އޭނާ ވިދާޅުވިއެވެ.
ޓްރަމްޕް ވިދާޅުވި ގޮތުގައި މަރުހަލާތަކަކަށް ބަހާލައިގެން ކުރިއަށްގެންދާ މި ކަމަކީ، އޮކްޓޯބަރު މަހު އޭނާ މެދުވެރިވެގެން ގެނައި ހަމަލާތައް މެދުކަނޑާލުމުގެ އެއްބަސްވުމުގެ ބައެކެވެ. ގާޒާގައި އިޒްރޭލުން ހިންގަމުންދާ ހަނގުރާމައިގައި މިހާތަނަށް 73،000 އަށް ވުރެ ގިނަ މީހުން ވަނީ މަރުވެފައެވެ. އަދި ހަމަލާތައް މެދުކަނޑާލުމުގެ އެއްބަސްވުމާ ހިލާފަށް އިޒްރޭލުން ދިން ހަމަލާތަކުގައި 1،200 އަށް ވުރެ ގިނަ މީހުން މަރުވެފައިވާ ކަމަށް ރިޕޯޓުތައް ބުނެއެވެ.
މި އެއްބަސްވުމާ ގުޅޭ ގޮތުން މިސްރުގެ ގާހިރާގައި އިތުރު މަޝްވަރާތަކެއް ބޭއްވުމަށް ވަނީ ހަމަޖެހިފައެވެ. ނަމަވެސް ގާޒާގައި ހަރަކާތްތެރިވާ އެހެން ޖަމާއަތެއް ކަމަށްވާ ޕަލަސްޓީނިއަން އިސްލާމިކް ޖިހާދުން ބުނި ގޮތުގައި، އެއްބަސްވުމަކަށް އާދެވިފައިވާ ކަމަށް ބުނެ ފަތުރަމުންދާ ހަބަރުތަކަކީ ސައްހަ ހަބަރުތަކެއް ނޫނެވެ. އަދި ދައުރުވަމުންދާ ލިޔުމުގައިވާ ބައެއް އިބާރާތްތަކާ މެދު ކަންބޮޑުވުންތަކެއް ހުރި ކަމަށް އެ ޖަމާއަތުން ބުނެފައިވެއެވެ.
