ރާއްޖޭގެ ތަރައްގީއަށް ކުރަން ނިންމާފައި ހުރި ކަން ކަން ފުރިހަމަ ކޮށްދިނުމަށްޓަކައި ކުރިއަށް އޮތް ލޯކަލް ކައުންސިލް އިންތިހާބު ކާމިޔާބު ކުރުމަކީ މި ސަރުކާރަށާއި ރައީސުލްޖުމްހޫރިއްޔާއަށް މުހިންމު ކަމެއް ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު ޕީއެންސީގެ ޕީޖީ ލީޑަރު އިބްރާހިމް ފަލާހް ވިދާޅުވެއެވެ.
ފަލާހް މިހެން ވިދާޅުވެފައިވަނީ މިރޭ އާޓިފިޝަލް ބީޗުގައި އޮތް ޕީއެންސީގެ ދަ ގްރޭޓާ އައްޑޫ ކެމްޕެއިން ޖަލްސާގައި ވާހަކަ ދައްކަވަމުންނެވެ.
ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގެ ކެމްޕެއިން މެނޭޖަރު ފަލާހް ވިދާޅުވީ، ރާއްޖޭގައި ބޭއްވޭ ލޯކަލް ކައުންސިލް އިންތިހާބަކީ އެންމެ ބޮޑު އިންތިހާބު ކަމަށާއި، ރައްޔިތުންނަށް ހިދުމަތް ކުރަން ބޭނުންވާ ކޮންމެ ވެރިއަކަށް މި އިންތިހާބު ކާމިޔާބު ކުރަން މުހިންމު ވާނެކަމަށެވެ. ފަލާހް ވިދާޅުވީ ކައުންސިލްތަކަކީ އެއިރެއްގެ އޮންނަ ސަރުކާރަކުން ހިންގާ ތަރައްގީގެ މަޝްރޫއުތަކަށް އެންމެ ބޮޑު އެހީތެރިކަމެއް ދޭން ތިބޭ ބައެއްކަމަށެވެ.
ފަލާހް ވިދާޅުވީ ރައްޔިތުންނަށް ހިދުމަތް ކުރަން ބޭނުން ނުވާ ވެރިޔަކަށް ކައުންސިލް އިންތިހާބު ކާމިޔާބު ވިޔަސް ނުވިޔަސް ހެޔޮވާނެކަމަށެވެ.
ލޯކަލް ކައުންސިލް އިންތިހާބު ކާމިޔާބު ކުރުމަށް މި ސަރުކާރަށާއި ރައީސުލްޖުމްހޫރިއްޔާއަށް މުހިންމުކަން ފާހަގަ ކުރައްވަމުން ފަލާހް ވިދާޅުވީ އިންތިހާބު ކުރަން މުހިންމުވަނީ ރާއްޖޭގެ ތަރައްގީއަށް ރާއްޖޭގެ އެކިކަންކޮޅުތަކުގަ ފައްޓަވާފަ ހުރި މަސައްކަތްތަކާއި، ރައްޔިތުންނަށް ރައީސް ވެވަޑައިގަންނަވާފައިވާ ވައުދުފުޅުތައް ޑެލިވާ ކޮށްދިނުމުގެ ބޭނުމުގައިކަމަށެވެ.
މިރޭގެ ޕީއެންސީގެ ދަ ގްރޭޓާ އައްޑޫ ކެމްޕެއިން ޖަލްސާގައި ރައީސް ޑރ. މުއިއްޒު، ފަސްޓް ލޭޑީ ސާޖިދާ، ކެބިނެޓް މިނިސްޓަރުންނާއި، ޕީއެންސީގެ މަޖިލިސް މެންބަރުންގެ އިތުރުން އައްޑޫ ސިޓީ ކައުންސިލަށާއި، ޑަބްލިއުޑީއަށް ޕީއެންސީގެ ކެންޑީޑޭޓުންނާއި، ޕީއެންސީގެ މެންބަރުން ބައިވެރިވިއެވެ.
