ފާއިތުވި ދޮޅު މަސް ދުވަހުގެ ތެރޭއިން 72.2 މިލިއަން ރުފިޔާގެ މަސްތުވާތަކެތި އަތުލައިގެންފައިވާކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
މިއަދު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ، ރާއްޖޭގައި ޑްރަގްގެ ސަޕްލައި މަދުކުރުމަށް ކުރަމުންދާ މަސައްކަތުގެ ތެރެއިން ފާއިތުވި ދޮޅު މަހެއްހާ ދުވަހުގެ ތެރޭގައި 83،450 ގުރާމުގެ މަސްތުވާތަކެތި އަތުލައިގަނެވިފައިވާ ކަމަށެވެ.
މިނިސްޓަރު ވިދާޅުވި ގޮތުގައި މަގުމަތީ އަގަށް ބަލާނަމަ އެއީ 72.2 މިލިއަން ދިވެހި ރުފިޔާގެ މަސްތުވާތަކެއްޗެވެ.
އެތަކެތި އަތުލައިގަނެވިފައިވަނީ ފުލުހުންނާއި ކަސްޓަމްސް ގުޅިގެން ފާއިތުވި ދޮޅު މަހެއްހާ ދުވަހުގެ ތެރޭގައި ހިންގި ތަފާތު އޮޕަރޭޝަންތަކުގެ ތެރެއިން ކަމަށް މިނިސްޓަރު ވިދާޅުވިއެވެ.
މީގެ އިތުރުން ވެސް 7،000 ވޭޕް ސްޓިކާއި ދެ މިލިއަނެއްހާ ސިނގެރޭޓް ކަސްޓަމްސްއިން އަތުލައިގެންފައިވާ ކަަމަށް ވެސް މިނިސްޓަރު ފާހަގަ ކުރެއްވިއެވެ. އަދި ހަމަ އެހެންމެ ރާއްޖޭގެ ގާނޫނާގައި ގަވައިދާ ހިލާފަށް އެތެރެކުރަމުންދާ ތަކެތި އަދި ރާއްޖެއަށް އެތެރެކުރަން މަނާތަކެތި ހިފެހެއްޓުމަށް ކަސްޓަމްސްއިން ބުރަ މަސައްކަތްތަކެއް ކުރަމުން އަންނަ ކަމަށް މިނިސްޓަރު ވިދާޅުވިއެވެ.
ރާއްޖެއަށް ވޭޕް އާއި ވޭޕް ކުރުމަށް ބޭނުންވާ ތަކެތި އެތެރެ ކުރުން ވަނީ ނޮވެމްބަރު 15، 2024 އިން ފެށިގެން މަނާކޮށްފައެވެ. ދި އެ އަހަރުގެ ޑިސެމްބަރު 15 ވަނަ ދުވަހުން ފެށިގެން ރާއްޖޭގައި ވޭޕްގެ ވިޔަފާރިކުރުމާއި އެ ބުއިންވެސް މަނާކޮށްފައި ވެއެވެ.
މަސްތުވާތަކެއްޗާ ދެކޮޅަށް ވެސް މި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން، ރާއްޖެއަށް މަސްތުވާތަކެތި އެތެރެކުރާ މީހުންނަށް މަރުގެ އަދަބު ދޭ ގޮތަށް، މަސްތުވާތަކެއްޗާބެހޭ ގާނޫނަށް ގެނައި އިސްލާހު މިދިޔަ އަހަރުގެ ޑިސެމްބަރު މަހު ރައީސް ޑރ. މުޙައްމަދު މުއިއްޒު ވަނީ ތަސްދީގު ކުރައްވާފައެވެ. އެ ގާނޫނަށް އަމަލުކުރަން ފަށާނީ، އެ ގާނޫނު ސަރުކާރުގެ ގެޒެޓުގައި ޝާއިއުކުރާ ތާރީހުން ފެށިގެން ތިން މަސްދުވަސް ހަމަވާ ދުވަހުން ފެށިގެންނެވެ.
