ދިވެހީންގެ ތެރޭގައި އެކި ބާވަތްކުގެ ހެދިކާ އާއި ތަފާތު ވައްތަރުގެ ޑިޝްތައް ތައްޔާރު ކުރުމުގައި ބޭނުންކުރާ މައިގަނޑު އެކައްޗަކީ އަލުވިއެވެ. މިއީ ކުދި ބޮޑު އެންމެންނަށް ވެސް ވަރަށް މީރު ތަރުކާރީއަކަށް ވާއިރު މިއަދު 'ދަ ޕްރެސް'ގެ ބަދިގެ ސެގްމެންޓުގައި މި ގެނެސްދެނީ އަލުވިން ތައްޔާރު ކޮށްލެވޭ ވަރަށް މީރު އަދި އެހާމެ ފަސޭހަ އެއްޗެެއް ކަމަށްވާ ޕޮޓޭޓޯ ޓާޓް އެވެ.
ބައެއް މީހުން މި ޑިޝް ތައްޔާރު ކުރާއިރު މަހުގެ ބާވަތެއް ބޭނުން ނުކޮށްވެސް ތައްޔާރުކޮށް އުޅެއެވެ. އެކަމަކު މި ރެސިޕީގައި ކުކުޅު ބޭނުންކޮށްފައި ހުރީ ޑިޝްގެ ރަހަ އިތުރަށް ރަނގަޅު ކޮށްލުމަށެވެ.
ބޭނުންވާ ތަކެތި:
- އަލުވި
- އޮލިވް އޮއިލް
- ކުކުޅު
- މުގުރި އަސޭމިރުސް
- މުގުރި ފިޔާ ޕައުޑާ
- ޕާސްލޭ
- މަޝްރޫމް
- ޓޮމާޓޯ
- ބިސް
- ޗީޒް
ތައްޔާރު ކުރާނެ ގޮތް:
ފުރަތަމަ އަލުވިތައް ދެ ބުރި ކޮށްލުމަށްފަހު އަވަނުން ފިހެލާނީއެވެ. އެއަށްފަހު ތަވަޔަކަށް ކުކުޅު ކޮޅު އެޅުމަށްފަހު، ލޮނު، އަސޭމިރުސް، ޕެޕްރިކާ ޕައުޑާ، އޮނިއަން ޕައުޑާ އަދި ޕާސްލޭ އެޅުމަށްފަހު ރޯ ފިލުވާލާށެވެ. ހަމަ އެހެންމެ ޓްރޭއެއްގައި ބޭކިންގް ޕޭޕާ އެޅުމަށްފަހު ކުރި ފިހުނު އަލުވިތައް އަޅާ، ފެންބޯ ތައްޓެއްގެ ފުލުން ޗަސް ކޮށްލާ ޓްރޭގެ ވަށައިގެންނާއި ތިރީގައި ރީތިކޮށް ފަތުރާލާށެވެ.
އޭގެ ތެރެއަށް ތައްޔާރުކުރި ކުކުޅު، މަޝްރޫމް އަދި ޓޮމާޓޯ އަޅާލާށެވެ. އަދި 5 ވަރަކަށް ބިސް އެެހެން ތައްޓަކަށް ތެޅުމަށް ފަހު ޕާސްލޭ، ލޮނު، އަދި އަސޭމިރުސް ކޮޅެއް އަޅާ ގިރާލުމަށްފަހު ޓްރޭ ތެރެއަށް އޮއްސާލާނީއެވެ. އަދި އޭގެ މައްޗަށް ގާނާފައި ހުރި ޗީޒް އަދި މަޝްރޫމް ކޮޅެއް ފަތުރާލުމަށްފަހު ރޯފިލަންދެން އަވަނުން ފިހެލާށެވެ. އޭރުން ޕޮޓޭޓޯ ޓާޓް ތައްޔާރުކޮށް ނިމުނީއެވެ.
