ރޭ ހިނގި އަލިފާނުގެ ހާދިސާގައި ގެއްލުންވި ގޭގައި ދިރިއުޅޭ އާއިލާއަށް އެހީތެރިކަން ފޯރުކޮށްދީފައިވާ ކަމަށް މޯލްޑިވްސް ނޭޝަނަލް ޑިޒާސްޓާ މެނޭޖްމަންޓުން ބުނެފިއެވެ.
މއ. ސިޓީވިލާގައި އަލިފާން ރޯވެގެން އެމްއެންޑީއެފް ފަޔަ އެންޑް ރެސްކިޔު ސާވިސް އިން ހަރަކާތްތެރިވާން ފަށާފައިވާ ރޭ ދަންވަރު 03:06 ހާއިރުއެވެ.
އަދި އެމްއެންޑީއެފުން ކުރި މަސައްކަތުން އަލިފާންގަނޑު ކޮންޓްރޯލްކުރި ނަމަވެސް އެ ގޭގައި މީހުން ދިރިނޫޅެވޭ ވަރަށް ވަނީ އަނދާފައެވެ.
އެހެންކަމުން އެންޑީއެމްއިން ވަނީ އެ އާއިލާއަށް ބޭނުންވާ ކެއިން ބުއިމާއި ވަގުތީ ބޯހިޔާވަހިކަމުގެ އެހީތެރިކަން ފޯރުކޮށްދީފައެވެ. ނަމަވެސް އެއީ ކިތައް މީހުން ކަމެއް އެ އޮތޯރިޓީން ހާމަކޮށްފައި ނުވެއެވެ.
އެމްއެންޑީއެފް އިން ހާމަ ކުރި ގޮތުގައި މި ހާދިސާގައި އެއްވެސް މީހަކަށް އަނިޔާވެފައި ނުވެއެވެ. އެ އިދާރާއިން އާންމުކޮށްފައިވާ ފޮޓޯތަކުން ފެންނަ ފެނުމަށް އެ ގޭގެ އެތެރޭގައި ހުރި ހުރިހާ އެއްޗެއް ވަނީ އަޅިއަށްވެފައެވެ.
