"މަން... އާދޭ އަހަންނާއެކީ ސައި ބޯން..."
މަންޝާގެ ފިޔަވަޅު ހުއްޓި މީހާ އެ ހުރިތަނަށް ގަނޑުވެގެން ދިޔައެވެ. އަޒީމް އެހާ ލޯބިން މަންޝާއަށް ގޮވާފައި ނުވާތީ މަންޝާއަށް އެ ގޮވާލުމުން ތަފާތު އިހްސާސެއް ކުރުވީމައެވެ. އަޒީމްގެ ކުރިމައްޗަށް ވާގޮތަށް ގޮނޑީގައި މަންޝާ އިށީނދެ ތައްޓަކަށް ކުޅިމަސް އަޅާ ސައިބޯން ތައްޔާރުވިއެވެ. އަޒީމް ހުރީ މަންޝާގެ ހަރަކާތްތަކަށް ބަލާށެވެ.
"ވާހަކައެއް އަހާލަންތަ؟..." ރޮށިކޮޅެއް ވަކިކޮށްލާ މަސްކޮޅެއްގައި ޖައްސާލަމުން އަޒީމް ސުވާލެއް ކޮށްލިއެވެ. މަޑުމަޑުން ހޫންއެއް ލައްވާލުމުން މަންޝާގެ މޫނަށް އަޒީމް ރަނގަޅަށް ބަލާލިއެވެ. "ކޮންބައެއްތަ ކިޔެވެލި ކިއެވީ... ކޮންކުއްޖެއްތަ އެމީހުން ގެންދިޔައީ..."
ދެބުމަ ގޮށްޖަހާލަމުން އަޒީމާ ދިމާއަށް މަންޝާ ބަލާލީ އެ ބުނި އެއްޗެއް އޭނާއަށް ދޭހަ ނުވުމުންނެވެ. "ކީކޭތަ ތި ކިޔަނީ؟... ކާކުގެ ދަރިއެއް ގެއްލުނީތަ؟... ކުރިން ދުވަހަކުވެސް މިރަށު ކޮންމެވެސް ކުއްޖަކު ގެއްލިގެން އުޅުނު..."
އަނގަޔަށް ލީ ރޮށިކޮޅު ހަފާލަންވެސް ނޭނގިފައި އަޒީމަށް ހުއްޓުން އަރާފައި އިނދެވުނީ މަންޝާ ދިން ޖަވާބުންނެވެ. ރޭގަ މަންޝާ ދެއްކި ވާހަކަ އޭނާގެ ހަނދާނުގައި ނެތީ ހެއްޔެވެ. ނޫނީ އެއީ މަންޝާ ނިދީގައި އޮވެ ދެއްކި ވާހަކަތަކަކީ ހެއްޔެވެ. "ނޭނގެ ކޮންމެވެސް ބަޔަކު ކިޔެވެލި ކިޔަވާތީ އުނދަގޫވެގެން އުޅުނު ވާހަކައެއް މަން ބުނީމެއްނު... އަދި ކުއްޖާ ގޮވައިގެން ދާތީ އެވާހަކަވެސް ބުނީމެއްނު..."
މަންޝާގެ މޫނަށް ކަޅި ޖަހާނުލާ އަޒީމް ބަލަން އިނދެ އެ ވާހަކަތައް ހިއްސާކުރީ މަންޝާގެ ފަރާތުން ފާހަގަކުރެވޭ ކަހަލަ އިޝާރާތެއް ފެނޭތޯއެވެ. ނަމަވެސް މަންޝާގެ މޫނުމަތިން ފެންނަމުން ދިޔައީ ހައިރާންކަމުގެ ކުލަތަކެވެ. އަޒީމް ކިޔަމުންދިޔަ އެއްޗެއް މަންޝާއަށް ދޭހަނުވެފައި އިން ކަހަލައެވެ. "ކޮންއިރަކު؟.. އަހަރެންތަ ތިހެން ބުނީ... ހަނދާނެއް ނުވޭ..." މަންޝާ ޖަވާބުދީ ނިމުން އިރު ކާގެއަށް ނައުރީން އައިސް ވަދެ މޭޒު ދޮށަށް ހުއްޓުނެވެ.
"އަޒީމް.. ކީކޭތަ މަންޝާ ކައިރީ ތިކިޔަނީ... ބަލަ އަހަރެންނޭ އެވާހަކަ ދެއްކީ... ރޭގަ މަށަށް ފެނުނު ހުވަފެނެއް ކިޔައިދިނީމަ އައިސް މަންޝާ ކައިރީ އެހިޔަކަސް ޖަވާބެއް ނުލިބޭނެ ދޯ.. އަހަރެން އެ ވާހަކަތައް ކިޔައިދިން އިރު އަޒީމް އޮތީ ނިދާފަ ދޯ... ސައިބޮނީތަ.. ކޮބާތަ ޝީން.." ގޮނޑިއެއް ދަމާލުމަށްފަހު އެ ގޮނޑީގައި އިށީންނަމުން ނައުރީން ތައްޓެއް ކައިރިކޮށްލަމުން ވާހަކަ ދެއްކިއެވެ.
"ރޮށި ފިހެ ނިންމާފަ ކޮޓަރިއަށް ވަނީ... ބުނި ފަހުންނޯ ސައިބޯނީ..." ރޮށިތަށި ނައުރީންއާ ދިމާއަށް ދިއްކޮށްލަމުން މަންޝާ ވާހަކަ ދެއްކިއެވެ. އެވަގުތު ނައުރީން އަޒީމާ ދިމާއަށް ބަލާލިއެވެ. އަޒީމް އިސްޖަހައިގެން އިނދެ ސައިބޮމުން ދިޔައެވެ. ސައިބޮއެ ނިންމާލުމަށްފަހު އެތަނުން ނިކުމެގެން ދިޔައިރުވެސް އަޒީމް އެންމެ ފަހަރަކުވެސް ނައުރީނާ ހަތަރުކަޅި ހަމަނުކުރެއެވެ. ސައިބޯން އިން ނައުރީނަށް ގަޔާވެގެން ސައިބޮވޭ ގޮތެއް ނުވިއެވެ. ހިތުގެ ކަނަކުން ކަންއްތައްތައް ރަނގަޅު ނޫން ކަމަށް ބުނަމުން ދިޔައެވެ. ހުޅި ނެއްޓުނު ވާހަކަ އިބްޒީމާ ގާތު ބުނެފިއްޔާ އޭނަ ރުޅި އަންނާނެވަރު ނައުރީނަށް އެނގެއެވެ. އެހެންކަމުން އެވާހަކަ އިބްޒީމާއަށް ސިއްރު ކުރުމަށްފަހު ކޮންމެވެސް އެހެން ގޮތެއް ހޯދަން ނައުރީން އަޒުމް ކަނޑައެޅިއެވެ.
ސައިބޮއެ ނިމިގެން ނައުރީން ބޭރަށް ނިކުމެލީ ވައިޖައްސާލާށެވެ. އޭނާގެ ސިކުނޑީގައި ކޮންމެވެސް ވަރެއްގެ ރިހުމެއް އުފެދެމުން ދާތީ އޭނާ ބޭނުންވީ އަތިރި ފަރާތަށް ފިނިކޮށްލަން ނިކުންނާށެވެ. ގެއިން ނިކުމެ ހިނގައިގަންނަން އުޅުނު ނައުރީންގެ ފިޔަވަޅަށް ހުއްޓުމެއް އައީ އެގޭ ދޮށަށް ސައިކަލެއްގައި އައިސް މަޑުކޮށްލި ހޫދު ފެނުމުންނެވެ. ސައިކަލުގެ ހަރުޖައްސާލަމުން ހޫދު ހިނިތުންވުމެއް ބަދަލުކޮށްލަމުން ޝީން ކޮބާތޯ އަހާލިއެވެ. ޖަވާބުގައި އެތެރޭގަ އެބައުޅޭ ކަމަށް ބުނެ ނައުރީން ހިނގައިގަތީ އަތިރިއާ ދިމާއަށެވެ.
ހޫދު ގޭތެރެއަށް ވަދެ ސަލާމް ގޮވާލުމުން ކާގޭ ތެރެއިން ބޭރަށް މަންޝާ ބޯދިއްކޮށްލިއެވެ. ދޮރުމަތީ ހުރި ހޫދު ފެނުމުން އޭނާ ގާތު އެތެރެއަށް ވަނުމަށް އެދެމުން މަންޝާ މިސްރާބުޖެހީ ޝީންގެ ކޮޓަރިއާ ދިމާއަށެވެ. ހޫދު އައިސް ހުރި ވާހަކަ ބުނުމާއެކީ ޝީން ކޮޓަރިން ނިކުތީ ދުވެފައި ކަހަލަ ގޮތަކަށެވެ. ހޫދު ފެނުމުން ޝީން ލަދުރަކިގޮތަކަށް ހީލިއެވެ. އެވަގުތު ހެދުމުގެ ފަސްބައިން އަތް ފުހެލަމުން މަންޝާ މިސްރާބު ޖެހީ އޭނާގެ ކޮޓަރިއާ ދިމާއަށެވެ.
މަންޝާ ދިޔަ ދިމާއަށް ބަލަން ހޫދަށް ހުރެވުނީ ގެއްލިފައެވެ. ޝީން ދައްކަމުން ދިޔަ ވާހަކަވެސް ހޫދަށް އަޑެއް ނީވުނެވެ. ދެވަނަ ފަހަރަށް ހޫދުގެ ކޮނޑުގައި ޖަހާލަމުން ޝީން އަހާލިއެވެ. "ހިނގާ ސައިބޯން..."
ހޫދު ހިނިތުންވަމުން ބޯ ޖަހާލިއެވެ. ސައިބޯން ހުއްޓާ ޝީންގެ ފޯނު ރިންގްވާން ފެށުމުން ފޯނު ނަގާ ކަންފަތުގައި ޖައްސާލިއެވެ. ހޫދާ ދިމާއަށް ބަލާލަމުން އެބަ ދަން ކަމަށް ބުނެ ޝީން ފޯނު ބޭއްވިއެވެ. ކަރުކެހިލުމަށްފަހު ޝީން ވާހަކަ ދައްކަން ފެށުމުން ހޫދު އިސް އުފުލާލަމުން ޝީންއާ ދިމާއަށް ބަލާލިއެވެ.
"ކޮބާތަ ރާއިދުމެން..." ޝީންގެ ސުވާލަށް ޖަވާބުދެމުން އެމީހުން ވީތަނެއް ނޭނގޭކަމަށް ބުނަމުން ހޫދު ދެކޮނޑު އަރުވާލިއެވެ. "މިއަދު އަދި އެކަކާވެސް ދިމާނުވޭ... ރޭގަ ޝޯވް ނިމުނީމަ ގެއަށް އެހާ ލަހުން ދިޔައިމަ އަދި ނުހޭލަނީ ކަންނޭނގެ... ވެއްޖެ އެމީހުންނަ ގުޅާލަން..."
ސައި ބޮއެ ނިމިގެން ފެންޑާތެރެއަށް ދެމީހުން ނިކުމެ ދުފާ ތަބަށް ނަގާ އެއިން ދެތިން ފޯއްފޮތި ހޫދު އަނގަޔަށް ލާ ހަފާލިއެވެ. ކޮޓަރިން ބޭރަށް މަންޝާ ނިކުތުމަށްފަހު ޝީންއާ ދިމާއަށް ބަލާލުމަށްފަހު ހިނިތުންވެލިއެވެ. "ޝީން.. ހިނގާބަލަ ހައްވައްތަމެން ގެއަށް ގޮސްލަން... އަހަރެން ފަހަންދިން ހެދުން ނިމިއްޖެތޯ ބަލާލަން..." ޝީން ބޯ ޖަހާލަމުން ހޫދާ ދިމާއަށް ބަލާލިއެވެ.
"ވަރަށް އަވަހަށް އެބައަންނަން... އޯކޭތަ... ހޫދު ބޭނުމިއްޔާ މިގޭގަ މަޑުކޮށްލިއަސް އޯކޭ..." ޝީންގެ އެދުމަށް ބޯޖަހާލަމުން ހޫދު ހިނިތުންވެލިއެވެ. އަދި ފޯނު ނަގާ ރާއިދުގެ ނަންބަރަށް ގުޅާލަން ޑައަލްކޮށްލިއެވެ. "ރާއިދު އަންނަންދެން މަޑުކޮށްލާނަން..." ޝީނާއާ މަންޝާއާ ދިމާއަށް ބަލާލަމުން ހޫދު ޖަވާބުދެމުން ރާއިދު ފޯނު ނަގާތޯ ފޯނުގެ ސްކްރީނަށް ބަލާލިއެވެ.
މަންޝާއާ އެކު ޝީން އެގެއިން ނިކުމެގެން ދިއުމުން ހޫދު މަޑުމަޑުން ގޮނޑިން ތެދުވެ މުޅި ގޭތެރެއަށް ބަލާލިއެވެ. ގޭގައި އެއްވެސް މީހަކު ނޫޅޭކަން ޔަގީނެވެ. ހޫދުގެ ނަޒަރު ހުސްކޮށްލެވުނީ މަންޝާ ނިކުތް ކޮޓަރީގެ ދޮރާ ދިމާއަށެވެ. އެކޮޓަރީގެ ދޮރު ހުރީ ކުޑަކޮށް ހުޅުވިފައެވެ. މަޑުމަޑުން ގޮސް ކޮޓަރީގެ ދޮރު ހުޅުވާލުމަށްފަހު ހޫދު އެކޮޓަރި ތެރެއަށް ދެމިގަތެވެ. ވަށައިގެން ކޮޓަރި ތެރެއަށް ބަލާލުމަށްފަހު އެއްފަރާތެއްގައި ހުރި އަލަމާރިއަށް އޭނާގެ ނަޒަރު ހުސްކޮށްލެވުނެވެ.
އަލަމާރީގެ ދޮރުފަތް ހުޅުވާލުމަށްފަހު އޭގެތެރެ ހާވަން ފެށިއެވެ. ފަތްޖަހާފައިވާ ހެދުންތައް ނުހޭވޭނެހެން މަޑުމަޑުން ބަލައިގެންނެވެ. އަލަމާރީގެ އެންމެ މަތީގައި ހުރި ކޮތަޅުތަކުގައި އަތް ހާކާލި އިރު އެއް ފަރާތެއްގައި ވަކިން އޮތް ކަޅުކުލައިގެ ފޮތް ފެނުމުން އެފޮތް ނަގާ ހޫދު ބަލާލިއެވެ. ހިރަފުސް ހުރުމުން ފޮތުގައި ހުރި ހިރަފުސްތައް ފޮޅާލިއެވެ. އެއީ ޑައިރީއެއްކަން އޭނާއަށް ކަށަވަރުވިއެވެ. އެހެންކަމުން އަލަމާރި ތެރެއަށް ބަލާލުމަށްފަހު އޭގެ ދޮރު ލައްޕާލީ އަވަހަށް އެކޮޓަރިން ނިކުންނާށެވެ.
ގެއިން ބޭރަށް ނިކުތް އިރު ހޫދުގެ ހިތް ބާރުބާރަށް ތެޅި ފޮޅެމުން ދިޔައެވެ. މަންޝާގެ ކޮޓަރިތެރެއަށް ވަންނަން ހޫދަށް ލިބުނު ކުޑަ ފުރުސަތުގެ ބޭނުން ފުރިހަމަ ގޮތުގައި ހިފުނީ ވަގުތާއި ހާލަތު މެދުވެރި ގޮތުންނެވެ. މަންޝާއާ ބެހޭގޮތުން މައުލޫމާތު ހޯދަން ބޭނުންވެފައި ހުރި ހޫދަށް ލިބުނު މީ ރަނުގެ ފުރުސަތެކެވެ. ސައިކަލަށް އަރާ ދުއްވާނުލެވެނީސް ނައުރީން އައިސް އެގެއަށް ވަންނަން އުޅޭތަން ފެނުމުން ހޫދުގެ ދެލޯ ބޮޑުވިއެވެ.
"ކޮބާ ޝީން؟.." ނައުރީން ބޮލުގައި އަޅާއިފައިވާ ބުރުގަލުގައި ހިފާ ދަމާލަމުން ސުވާލުކޮށްލިއެވެ.
"ބޭރަށް ހިނގައްޖެ... މަންޝާ ދައްތައާ އެކީ" ބިރުން އިނދެ ހޫދު ޖަވާބުދިން އިރު އޭނާގެ ހިތުގެ ވިންދު އަވަސްވެފައި ވަނީ އިންތިހާއަށެވެ. އިތުރު ސުވާލެއް ކޮށްފާނެތީ ދެން ދަނީކަމަށް ބުނެ ސައިކަލު ސްޓާޓްކޮށްލީ އަވަހަށް ގެއަށް ދާށެވެ. ނިތްކުރިމަތިން ހިއްލާފައިވާ ދާތިކިތައް އެއް އަތުން ފޮހެލަމުން އަނެއް އަތުގައި އޮތް ފޮތަށް ހޫދުގެ ކަޅި ހިނގާލިއެވެ. ކުޑަތަންކޮޅެއް ލަސްވި ނަމަވެސް ނައުރީނަށް ކަމެއް ފަޅާއެރީސްކަން ހޫދަށް ކަށަވަރުވިއެވެ.
ގެއަށް ވަދެވުމާ އެކީ ހޫދު މިސްރާބު ޖެހީ އޭނާގެ ކޮޓަރިއާ ދިމާއަށެވެ. ކިޝަންއަށް ހޫދު ފެނުމުން ގޮވާލިއެވެ. "އޭ އާދޭ ސައިބޯން..."
ހޫދު ހުރީ ސައިބޮއެގެން ކަމަށް ބުނުމަށްފަހު އެތާ މަޑުނުކޮށް ސިޑިން މައްޗަށް އަރަން އަވަސްވެގަތެވެ. ކޮޓަރިއަށް ވަދެ ދޮރުލައްޕާ ތަޅުލުމަށްފަހު އެ ޑައިރީ އާ އެކީ އެނދުގައި ހަމަޖެހިލައިގެން އިށީނެވެ. ފުން ނޭވާއެއް ބޭރުކޮށްލުމަށްފަހު އެ ޑައިރީގެ ގަނޑުތައް އުކާލިއެވެ. ދިވެހި އަކުރުންނާ އިނގިރޭސި އަކުރުން ލިޔެފައިވާ ޑައިރީއެކެވެ. ބައެއް ގަނޑުތަކުގައި މާގަނޑުގަނޑު ކުރަހާފައި ވެއެވެ.
އެ ޑައިރީ ކިޔަން ފެށުމުގެ ބޭނުމުގައި އޭގެ ފުރަތަމަ ޞަފްހާ ހުޅުވާލުމަށްފަހު އޭގައި ލިޔެފައިވާ ލިޔުންކޮޅު ކިޔާލިއެވެ. "އަފްނާން ކިޔަވާހިތެއް ނުވޭ... ސްކޫލަށް ދާކަށް ބޭނުމެއް ނުވޭ.... ބައްޕަ އަފްނާނަށް ވަރަށް ރަނގަޅު... މަންމަ މަސައްކަތް ކުރަނީ އަފްނާން ކޮންރޯލް ކުރަން އައި ޖަސްޓް ހޭޓް އިޓް...."
ހޫދުއަށް އެ ލިޔުން ކިޔަމުން ދިޔައިރު އެއީ މަންޝާގެ ޑައިރީން ނޫންހެން ހީވުމުން ބަނޑޭރިގަނޑަށް ރަނގަޅަށް ބަލާލިއެވެ. ފޮތުގެ ތިރީ ކަނުގައި އަފްނާން ޖަހާފައިވާ ތަން ފެނުމުން ހޫދު އެ ފޮތް ލައްޕާލިއެވެ. އަދި އެނދުމައްޗަށް ހޫރާލިއެވެ. މަންޝާއާ ބެހޭ މައުލޫމާތު އޮޅުންފިލުވަން މަސައްކަތް ކުރި ނަމަވެސް އަދި އެއިން އެއްވެސްކަމެއް ކާމިޔާބު ވާގޮތެއް ނުވިއެވެ.
މަންޝާއާ ބެހޭ ކަންތައްތައް އޮޅުންފިލުވަން ހަދާނެގޮތަކާ ދޭތެރޭ ހޫދު ވިސްނަން އޮތްއިރު އޭނާގެ ފޯނަށް މެސެޖެއް އައި އަޑު އިވުމުން ޖިންސު ޖީބުގައިވާ ފޯނު ނަގާ އޭގެ ސްކްރީނަށް ބަލާލިއެވެ. އެއީ ރާއިދް ފޮނުވާފައިވާ މެސެޖެކެވެ. މިރޭ 8 ޖަހާއިރަށް ބާބަކިއު އޮންނާނެކަމަށް މެސެޖް ފޮނުވާފައި އޮތެވެ. މެސެޖަށް ޖަވާބު ދިނުމަށް ހޫދު ޓައިޕްކުރަމުން ދަނިކޮށް އޭނާގެ ފޯނަށް އައީ އޭނާގެ މަންމަގެ ކޯލެކެވެ. ފޯނު ނަގާ ކަންފަތުގައި ޖަހާލަމުން މަޑުމައިތިރި ކަމާއެކު ހޫދު ވާހަކަ ދެއްކިއެވެ.
"ހަލޯ... މަންމާ ކިހިނެއްތަ؟.." ހޫދުގެ ސުވާލަށް މަންމަ ޖަވާބުދިނުމަށްފަހު އޭނާ ގުޅި ސަބަބު ހާމަކޮށްލިއެވެ.
"މަންޝާ ފެނިއްޖެތަ؟.. އޭނާ ކޮބާ؟.. ރަނގަޅުތަ؟.."
ހޫދުގެ މަންމަގެ އަޑުވަނީ ކުރެހިފައެވެ. ވާހަކަ ދެއްކުން ތަފާތުވެފައި އަޑުގައި މަޑު ތުރުތުރެއް އެކުލެވިފައިވާކަން ހޫދަށް ފާހަގަވިއެވެ. މަންމަ ހަމައަކަށް އަޅުވަން ހޫދު ވަރަށް މަސައްކަތް ކުރިއެވެ. ހޫދުގެ މަންމައަށްޓަކައި ކޮށްދޭން އައި ކަންތައް ފުރިހަމަ ވެއްޖެކަން މަންމައަށް އަންގައިދޭން ބޭނުންވިއެވެ.
"އާން މަންމާ... މަންޝާ ދައްތަ ފެނިއްޖެ... އިރާދަކުރެއްވީތީ ވަރަށް ރަނގަޅު... ކޮންމެ ދުވަހަކު އަޅުގަނޑު އެގެއަށް ދަން... މަންމަ ބުނުއްވީ ރަނގަޅަށް.. އެއީ ހާދަ ރަނގަޅު މީހެކޭ... ދަރިޔަކު ނެތްތާނގަ ތިމާގެ ދޮން ދަރިން އެ ބަލަނީ އަމިއްލަ ދަރިން ފަދައިން، ހިތުގައި އެއްވެސް ހަސަދަވެރިކަމެއް ނެތި، ނުހަނު ލޯބިން... އެ ކުދިންވެސް މަންޝާ ދައްތައަށް ވަރަށް ހެޔޮ..." އެގޭ ތެރެއިން ފެނުނު ރަނގަޅު ކަންތައްތައް ހޫދު ކިޔައިދެމުން ދިޔައީ އޭނާގެ މަންމަގެ ހިތްހަމަޖައްސައި ދެވޭތޯއެވެ.
ވަރަށް ރަނގަޅަށް މަންޝާއަށް ބަލައްޗޭ ބުނަމުން ހޫދުގެ މަންމަ ފޯނު ބޭއްވީ ކަމެއް ގޯސްވަންޏާ މަންމައަށް ގުޅުމަށް އެދެމުންނެވެ. ފޯނު ކަނޑާލުމުން އެނދުގައި އޮށޯވެ ހޫދު ފުންކޮށް ވިސްނާލިއެވެ. އޭނާ ވިސްނަމުން ދިޔައީ މަންޝާއާ ދޭތެރޭއެވެ. މަންޝާއާ ބެހޭގޮތުން އޭނަ އޮޅުން ފިލުވަން ބޭނުންވެފައިވާ އެތައް ވާހަކައެއް އެބަ ހުއްޓެވެ. މަންޝާގެ ހަށިގަނޑުން ފެންނަ ބައެއް ނިޝާންތަކެވެ. އަތުގައި ހުރި ލައްތަކެވެ. ލޯކައިރި ވަޅުވަދެފައި ހުންނަންވީ ސަބަބެވެ. މޫނުމަތިން ފަނޑު ހިނިތުންވުމެއް ފާޅުވާން ހުރި ނަމަވެސް އެ މޫނުމަތިން ކަމެއް ސިއްރު ކުރާކަން ދޭހަވެއެވެ. އެތައް ހިތާމައަކާ ހިތްދަތިކަމެއް ފޮރުވަމުންދާކަން ފާހަގަވެއެވެ. މަންޝާ ފޮރުވަމުންދާ ސިއްރު ހޯދަން ހޫދު އަޒުމް ކަނޑައެޅިއެވެ. އެކަމަކު އެކަން ކާމިޔާބު ކުރެވޭނެ މޮޅުގޮތެއް ހޯދަން އޭނާ ބޭނުންވިއެވެ.
*** *** *** *** *** ***
އެންމެން އެކީ އެއް ސުފުރާއެއްމަތީ ހެނދުނުގެ ނާސްތާ ނަގަން ތިބި އިރު ލަތީފާއަށް ބެލެމުން ދިޔައީ އޭނާގެ ދަރިފުޅު ސީމާގެ ހަރަކާތްތަކަށެވެ. ވަރަށް ހަމަޖެހިލައިގެން އިނދެ ސައިބޮމުން ދިޔައިރު އެހެންދުވަސްތަކާ އޭނާ ވަރަށް ތަފާތެވެ. ހީވަނީ އެތައް ދުވަހެން ވަންދެން ޖެހިފައިވާ އެ ކަންތައްގަނޑުން އޭނާ ސަލާމަތްވެފައިވާ ހެންނެވެ. ސީމާގެ ހާލަތު ރަނގަޅުވެފައިވާ މިންވަރު ފެނި އެކަމާ ޝާކިރު އިނީ ވަރަށް ހިތްހަމަޖެހިފައެވެ.
އެންމެން ސައިބޮއި ނިމުނު އިރުވެސް ލަތީފާގެ އަރުތެރެއިން އެންމެ ކާއެތިކޮޅެއްވެސް ދިރޭ ގޮތެއް ނުވިއެވެ. ދޭތެރެއަކުން ސީމާއާ ދިމާއަށް ބަލާލެވެއެވެ. އަނގަޔަށް ފޯއްކޮޅެއް ލައިގެން ޝާކިރު އިނީ ސީމާއާ ވާހަކަ ދައްކާށެވެ. އެކިކަހަލަ ވާހަކަތައް ދެބަފައިން ދެމެދު ދެކެވެމުން ދިޔައިރު އެއިން މީހަކު ދައްކާ އެއްވެސް ވާހަކައެއް ލަތީފާގެ ކަންފަތަށް ވާސިލް ނުވާ ކަހަލައެވެ. ލަތީފާ ހުއްޓުން އަރާފައި ހުރިތަން ފެނުމުން ޝާކިރު އޭނާއަށް ގޮވާލަމުން އެ ރޯނުއެނދުގައި އިށީންނަން އަންނާށޭ ބުނެލިއެވެ. ސިހިފައި ލަތީފާއަށް ބަލާލެވުނު ނަމަވެސް އެކަން އޮޅުވާލަން ގަޑިން ކިހާއިރެއްތޯ އަހާލިއެވެ.
"ދިހައެއް ޖެހީދޯ... ސީމާ ދަރިފުޅު ނިދާލަން ދާންވީނު... ރޭގަ ވަރަށް ލަސްވަންދެން ހޭލާ އުޅުނީމަ އަދިވެސް ތިހުރީ ނިދި އައިއްސަ... އަވަހަށް ދޭ ނިދާލަން..." ސީމާގެ ބުރަކަށީގައި ފިރުމާލަމުން ލަތީފާ ވާހަކަދެއްކީ ނުހަނު ލޯބިންނެވެ. ލަތީފާގެ އެދުމަށް އިންކާރުކުރުމެއްނެތި ކޮޓަރިއާ ދިމާއަށް ސީމާ މިސްރާބުޖެހުމުން ޝާކިރާ ދިމާއަށް ލަތީފާ ބަލާލިއެވެ.
"އަހަރެން އެބަ އަންނަން ދުންފަތްކޮޅެއް ހިފައިގެން... ޝާކިރު ގޭގަ މަޑުކޮށްލައްޗޭ... މާ ލަހެއް ނުވާނެ..." ލަތީފާ ބޭރަށް ދާން ބޭނުންވެފައި ހުރުމުން ޝާކިރު ގާތު ހުއްދައަކަށް އެދުނެވެ. ޝާކިރު ބޯ ޖަހާލުމުން ލަތީފާ ބުރުގާ ރަނގަޅުކޮށްލުމަށްފަހު އެގެއިން ނިކުންނަން ހިނގައިގަތެވެ. ލަތީފާގެ މޫނުމަތިން ހާސްކަމުގެ ކުލަވަރުތައް ފެންނަމުން ދިޔައެވެ. ރަތްދައްކާ އަވީގައި ހިނގާފައި ދިޔައިރު އޭނާއަށް ހިނގެނީ މަގުމެދުންކަން ވެސް ނޭނގެއެވެ. އޭނާގެ ހިޔާލާ ފިކުރު ހުސްވެފައި ވަނީ އެހެން ހިސާބެއްގައެވެ. ވަށައިގެން ހިނގަމުންދާ މީހުންތައް ވެސް އޭނާއަށް ނުފެންނަ ކަހަލައެވެ. ގެއެއްގެ ކަންމަތީގައި ކުޅެން ތިބި ކުޑަކުދިންތައް ކައިރިން ލާފާ ދިޔައިރު އެކުދިން އެއްލި ބޯޅަ އައިސް އޭނާގެ ފައިދަށަށް ހުއްޓުމުން ވެސް އެކަންވެސް އޭނާއަށް ނޭނގުނެވެ. ހުއްޓުމެއް ނެތި އޭނާގެ ހިނގުން ކުރިއަށް ދިޔައިރު ރޭގައި ވީކަންތައް ފިލްމެއްގޮތަށް ސިކުނޑިތެރޭ ވަށާލާފައި ވިއެވެ. ތަކުރާރުކޮށް އެއްތަނެއް ފެންނަމުން ދިޔައިރު އެކަމުން އޭނާގެ ސިކުނޑިއަށް އެތައް އުނދަގޫތަކެއް ވަމުން ދިޔައެވެ.
*** *** *** *** *** ***
ސީމާ ޖައްސަމުން ދިޔަ ވައްތަރުންނާ އޭނާ ކިޔަމުން ދިޔަ އެއްޗެހި އަޑުއިވޭ ކޮންމެ މީހަކުވެސް ފަސް ޖެހޭނެއެވެ. ލަތީފާއަށް އެފަދަ އަސަރުތަކެއް ކޮށްފާނެކަން އެއީ ޝައްކެއް ވެސް އޮތްކަމެއް ނޫނެވެ. ބަނޑުއަޅާ ވިހެއި ދަރިއަކަށް އެފަދަ ގޮތްތަކެއް ވެގެން އުޅޭތަން ބެލުމަކީ އެއްވެސް މަޔަކަށް ކުޅަދާނަ ވާނޭ ކަމެއް ނޫނެވެ. ލަތީފާގެ ކޮނޑުގައި ހިފާ ޝާކިރުގެ ހަށިގަނޑާ އޭނާ ގާތްކޮށްލީ ލަތީފާ ބިރުގެންފައި ހުރިވަރު އޭނާއަށް އެނގުމުންނެވެ.
ސީމާ ޖައްސަމުން ދިޔަ ވައްތަރުތައް ބަލަން ހުރި ލަތީފާއަށް ކެތްނުކުރެވުމުން ސީމާއަށް ގޮވާ ރޮމުން ޝާކިރުގެ ހަށިގަނޑުގައި އޮޅުލައިގަތެވެ. ބިރުގަނެ ފަސްޖެހޭ ކަމަށްވަންޏާ އެތާ މަޑުކުރުމަކީ އެންމެ ބުއްދިވެރި ގޮތް ނޫންކަމަށް ބުނުމުން ލަތީފާގެ އަތުގައި ހިފާ އެތަނުން އޭނާ ނެރެން ޝާކިރު މަސައްކަތް ކުރިއެވެ. ލަތީފާއާ އެކު އެކޮޓަރިން ނިކުމެ ދޮރު ލައްޕާލި އިރު ވެސް ލަތީފާގެ ކަޅި އަމާޒުވެފައި ވަނީ ދޮރުގެ ހުޅުވިފައި އިން ހަނި ދޭތެރެއިން ފެންނަން އިން ސީމާއަށެވެ. ދޮރު ލައްޕާލަން ގާތްވި ޟިރާރު އެދެމަފިރިންގެ މޫނަށް ބަލާލުމަށްފަހު ބުންޏެވެ. "ހާސްނުވޭ... ލަތީފާ ހަމައަކަށް އެޅުވޭތޯ ބަލާ.. ޖިންނި މަސައްކަތް ކުރާނީ އަހަރެމެންގެ ބޮލަށް އެރެވޭތޯ... އެ ދައްކާ ވާހަކަތަކަށް މާބޮޑަށް ނުވިސްނާ..."
ދޮރުފަތް ލައްޕާލުމާއެކީ ލަތީފާ ބަޑިފަޅައިގެން ދިޔައެވެ. މިހާރު އެކޮޓަރިތެރޭ ހިނގާ އެއްވެސް ކަމެއް އެދެމަފިރިންނަކަށް ނުފެންނާނެއެވެ. ލަތީފާ ހަމައަކަށް އެޅުވޭތޯ ޝާކިރު އެތައް މަސައްކަތެއް ކުރިއެވެ. އެތެރޭގައި ދެކެވެމުން ދިޔަ ވާހަކަތައް ކޮންމެވެސް ވަރަކަށް ބޭރަށް އަޑުއިވޭކަން ލަތީފާއަށް އެނގުމުން އޭނާ ބޭނުންވީ އެތަނުން ޝާކިރުގޮވައިގެން ދުރަށް ދާށެވެ. ފުންކޮށް ނޭވާލާން ލަތީފާ މަސައްކަތް ކުރަން ފެށުމުން ޝާކިރު ހާސްވިއެވެ.
"ހިނގާ ބޭރަށް ނުކުމެލަން.. ހާސްވަނީ ދޯ... އާދޭ..." ލަތީފާގެ އަތުގައި ހިފައިގެން ޝާކިރު ބޭރަށްދާން ހިނގައިގަތެވެ. ސީމާއަށް ފަރުވާދެމުން ދިޔަ ކޮޓަރިއާ ދިމާއަށް ލަތީފާ ބަލާލިއެވެ. އެތާ ތެރޭ ދެކެވޭ ވާހަކަތަކެއްގެ ސަބަބުން އޭނާ ފަލީހަތް ވެދާނެތީ ޖެހިލުން ވިއެވެ.
(ނުނިމޭ)
