ދެލޯ ބޮޑުކޮށްލަމުން ސީމާއާ ދިމާއަށް އިބްޒީމާ ބަލާލީ ރުޅި އައިސް ރަތްވެފައި ހުރެއެވެ. ފުޅިތެރެއަށް އަތްލުމަށްފަހު ކުނޑިތަކެއް ނަގާ ސީމާއާ ދިމާއަށް ބުރުވާލީ އެއްޗެހި ކިޔަމުންނެވެ.
"އޭ މާ ފުއްޕަން ނަހަދައްޗޭ... ފާޑުފާޑު ދައްކަންޏާ އެއްފަހަރުން ކަލޭ އަންދާލަފާނަން.. މައިތިރި ވެގެން ހުރޭ..."
ގައިގަ އެކުނޑިތައް ޖެހުމާއެކީ ސީމާ ތެޅިގަތެވެ. ދެލޯ ބޮޑުކޮށްލަމުން ސީމާގެ މޫނު އަނބުރާލީ ލަތީފާއާ ދިމާއަށެވެ. ސީމާގެ ރަތް ދެލޯ ފެނުމާއެކީ ޝާކިރުގެ އަތުގެ މުލައްދަނޑީގައި ލަތީފާ ހިފާ ބާރުކޮށްލިއެވެ. "އެ މަންޖެއަށް ކިހިނެއްވެފަތަ އެހުރީ... ޝާކިރޫ.. އަޅެ... މަގޭ ސީމާ..." ސިއްރުސިއްރުން ލަތީފާ ވާހަކަދެއްކީ ހަމައެކަނި ޝާކިރަށް އަޑުއިވޭނެ ވަރަށް މަޑުމަޑުންނެވެ.
އިބްޒީމާ ދެލޯމަރައިގެން ހުރެ ކިޔެވެލި ކިޔަވަމުން ދިޔައެވެ. އިބްޒީމާގެ ހަރަކާތްތަކަށް ބަލަން ހުރި ޟީރާރަށް ހައިރާންކަމެއް ލިބުނީ ސީމާ ހަތަރު މޮށްގަނޑުޖަހައިގެން ހުރެ ކުރިއަށް ޖެހިލުމުންނެވެ. ލަތީފާގެ މޫނަށް ބަލަންހުރެ ސީމާ ވާހަކަ ދައްކަން އަނގަ ހުޅުވާލިއެވެ. އޭނާގެ ތުންފަތް ވަނީ ދިމަދިމާލުން ފަޅަފަޅައިގެން ގޮސްފައެވެ.
"އޭ މިހިރަ ލަތީފާ... ކަލޭ ތި ހޭރެނީ ހޭބަލިވެގެންތަ؟... ހަހަހަހަ.... ކަލޭ ހޭރޭކަށް ނުޖެހޭނެ... މީ ކަލޭގެ ސުންޕާކަން..." ލަތީފާއާ ދިމާއަށް އަތް އުކަމުން ސީމާ ވާހަކަ ދައްކަމުން ދިޔައީ ބިރުވެރި އަޑަކުން މޫނަށް ނުބައި ވައްތަރުތައް ޖައްސަމުންނެވެ. އެއްފަރާތަކަށް ބޯއަރިކޮށްގެން އިނދެ ލަތީފާއާ ދިމާއަށް ބަލަމުން ދިޔައީ ނުބައި ޒާތަކަށެވެ.
"ޝާކިރޫ... ސީމާއަށް ކިހިނެއްތަ އެވަނީ..." ލަތީފާ މޫނު ނިވާކުރަމުން ރޯން ފެށިއެވެ.
"ޝާކިރު... ލަތީފާ ގޮވައިގެން މިތަނުން ނުކުމޭ... ބިރުގަނެގެން މިކަހަލަ ކަންކަމެއް ނުވާނެ..." ލަތީފާގެ މޫނުމަތިން ފެންނަމުން ދިޔަ ހާސްކަމާއި ބިރުވެރިކަމުގެ ފަހަތުގައި ފޮރުވިފައި އެތައް ސިއްރުތަކެއް ވާކަން ޟިރާރަށް އެނގުނެވެ. ޟިރާރުގެ އެދުމަށް ޝާކިރު އެއްބަސްވުމުގެ ގޮތުން ބޯޖަހާލުމަށްފަހު ލަތީފާ ގޮވައިގެން އެކޮޓަރިން ނިކުތުމަށް ހިނގައިގަތެވެ.
"ފަލީހަތް ވެދާނެތީ ރައްކާ ވަނީދޯ... ބިރުން ވިރެނީ މިހާރު... މަ ކިޔައިދޭންވީތަ ހުރިހާ ވާހަކައެއް... މަގޭ ދަރިއޭ ކިޔާ އެބަ އަނގަ ވީދައެއްނު... ޗުއް ޗުއް.." ދޮރުން ނިކުމެ ނިކުމެ ހުރި ލަތީފާއާ ދިމާއަށް ސީމާ ކުޅުޖަހަން ފެށިއެވެ.
ލަތީފާމެން ނިކުތުމުން ދޮރު ލައްޕަން ޟިރާރު ގާތްވެލުމަށްފަހު ޝާކިރާ މުޚާތަބުކޮށް ވާހަކަދެއްކިއެވެ. "ހާސްނުވޭ... ލަތީފާ ހަމައަކަށް އެޅުވޭތޯ ބަލާ.. ޖިންނި މަސައްކަތް ކުރާނީ އަހަރެމެންގެ ބޮލަށް އެރެވޭތޯ... އެ ދައްކާ ވާހަކަތަކަށް މާބޮޑަށް ނުވިސްނާ..." ޟިރާރު ދޮރު ލައްޕާލުމަށްފަހު އިބްޒީމާއާ ކުރިމަތިލާން އެނބުރިލިއެވެ.
"އޭ... ކަލޭ ނުފުއްޕާ މައިތިރިވޭ... އަހަރެމެން މިތަނަށް މިއައީ ތި ދައްކާ ބޭކާރު ވާހަކަތައް އަޑުއަހާ ހިތަކުން ނޫން..." ލޯ މަރައިގެން ހުރެ އިބްޒީމާ ވާހަކަ ދައްކަމުން ދިޔައިރު އޭނާއާ ދިމާއަށް ސިމާ ފުއްމައިގެން ދިޔައެވެ.
"ކަލޭ ދެލޯ މަރައިގެން ތި ހުރީއްޔޯ.. އެންމެ ފަހަރަކު ލޯ ހުޅުވިޔަސް މަށަށް ކަލޭގެ ހުރިހާ ސިއްރެއް އިނގޭނެ... ހަހަހަ" ސީމާ އަޑުބާރުކޮށް ހޭން ފެށިއެވެ.
"އެހެންވެއްޖިއްޔާ ބުނެބަލަ... މި ކުއްޖާއާ ކަލޭ އަވަލާން ޖެހުނީ ކީއްވެތަ؟.." ޟިރާރު ސުވާލުކޮށްލުމުން ޟިރާރާ ދިމާއަށް ސިމާ ބަލާލިއެވެ. މޫނުމައްޗަށް ވެއްޓިފައިވާ އިސްތަށިތައް ރަނގަޅުކޮށްލަމުން ސީމާ ހިނިގަނޑެއް ޖަހާލިއެވެ.
"ޖަވާބު ދީ... އޭރުން ކަލެއަށް ސަލާމަތް ވެވޭނީ..." ޟިރާރުގެ ސުވާލަށްފަހު އިބްޒީމާގެ ތުންތަޅުވާލުމާއެކީ ދެއަތް މައްޗަށް އުފުލާލިއެވެ. ހަމައެއާއެކު އެތަނުގައި ހުރި ހުރިހާ އުއްބައްތިއެއްގެ ހުޅުކޮޅު އެކީ ދިއްލިގެން ދިޔައެވެ.
"އޭނާގެ މަންމަ މީހަކާ ދެވަން ބޭނުންވެގެން ހެދި ފަންޑިތައެއްމީ... އެކަމުގައި އަހަރެން އައިސް ސީމާ ކައިރީގައި އުޅުނީ... ދެން މަށަށް އޭނާ ކަމުދިޔައިމަ ދުރަކަށް ނުދެވޭނެދޯ... ހިތާވާ ކަހަލަ ރީތި މަންޖެއެކޭ.. ކަލެއަށް މިކަހަލަ ކަންކަން އެންމެ ރަނގަޅަށް އެނގޭނީ... ކަލެއަކީވެސް އަންހެނެއް ފެންނައިރަށް އެމީހަކު ހާސިލް ކުރަން ބޭނުންވާ ކަހަލަ މީހެއްނު... ނޫންތަ... އެކަމަކު ސީމާގެ ހަށިގަނޑަށް ދަހިވެތި ނަޒަރަކުން ބަލައިފިއްޔާ ތި ދެލޯ ކޮނެލާނަން.." މޭ ފުއްޕާލަމުން ސީމާގެ ހަށިގަނޑަށް ބާރު ފޯރުވަމުން ދިޔަ މަޚްލޫގު ވާހަކަ ދެއްކިއެވެ.
"ބޭކާރު ވާހަކަ ދައްކާނެ ކަމެއް ނެތް.. ކަލެއަކަށް ނުޖެހޭ އަހަރެންގެ ވާހަކަ ދައްކާކަށް.. އަހަރެން މިތަނަށް މިއައީ އަހަރެންގެ ވާހަކަ ދައްކާކަށް ނޫން. އަހަރުން މިތަނަށް ގެނައީ ކީއްކުރަންކަން އިނގޭތަ؟.. ކަލޭ މި އަންހެންކުއްޖާގެ ހަށިގަނޑުން ވަކިކުރަން... އަންދާލަން..." ޟިރާރު އަޑުބާރުކޮށް ވާހަކަދައްކަން ފެށީ އޭނާގެ ހަގީގަތް އިބްޒީމާ ކުރިމަތީގައި އެ މަޚްލޫގު ހާމަކޮށްފާނެތީއެވެ.
*** *** *** *** *** ***
އިރުގެ ދޯދޮތަކުން މޫނަށް އެޅެމުންދިޔަ ދަޅައިން އުނދަގޫވާތީ ޒިބާން ދެލޯ ހުޅުވާލިއެވެ. ޒިބާންގެ އަތުތެރޭގައި ނިދާފައި އޮތް ތަޒްކިޔާގެ މޫނަށް ޒިބާން ބަލާލިއެވެ. ރޭގައި ހިނގާދިޔަ ކަންތައް ހަނދާންވުމުން ޒިބާންގެ ހިތަށް އުނދަގޫވިއެވެ. މަންޝާއާ ބައްދަލު ނުވެވޭނެކަން އެނގުމުން ޒިބާންގެ ދުނިޔެ ފުނޑުފުނޑުވެގެން ދިޔަ ކަހަލައެވެ. ތަޒްކިޔާގެ ބޯ ދަށުން ޒިބާންގެ އަތް ދަމައިގަތުމަށްފަހު އެނދުމަތިން ތެދުވިއެވެ.
މޭޒުމަތީ އޮތް ފޮށި ފެނުމުން ޒޯއިއާ މެހެކްގެ އުފަން ދުވަސް ކަން ޒިބާން ހަނދާންވިއެވެ. ރޭގަ އެ ފެނުނު ހުވަފެނަކީ މިދުވަހާ ގުޅުން ހުރި ހުވަފެނެކެވެ. ހިނިތުންވާން މަސައްކަތް ކުރަމުން ޒިބާން ބޭރަށް ދާން މިސްރާބުޖެހީ ކުދިންނަށް އެ ހަދިޔާ ދިނުމުގެ ބޭނުމުގައެވެ. ކޮޓަރިން ޒިބާން ނިކުންނަށް ދޮރު ހުޅުވާލުމާ އެކީ ތަޒްކިޔާ ލޯ ހުޅުވާލިއެވެ. ޒިބާން ދިޔަދިމާއަށް ބަލަން އޮތުމަށްފަހު އަތުން އިސްތަށިގަނޑުގައި އަތްހާކާލިއެވެ. ޒިބާންގެ ފިރުމުންތައް މަތިން ހަނދާންވުމުން ތަޒްކިޔާ ލަދުގަތެވެ.
*** *** *** *** *** ***
މެހެކް އިނީ ކުޑަދޮރުން ބޭރު ބަލާށެވެ. ވިލާތައް ދައުރުވަމުން ދިޔަ ގޮތަށް ބަލަން ހުރި އިރު މެހެކްގެ ހިޔާލު ވަނީ އެހެން ހިސާބެއްގައެވެ. ރާއިދާ ބައްދަލުކޮށްލަން ބޭނުންވެފައި ވުމުން މެހެކް ގޮވާލިއެވެ. "އަޅެ މިރޭ ދުނިޔެއަށް ދެވޭނެ ގޮތެއް ރާވަން ހިނގާބަލަ... މަންމަ ކައިރީ އަހާފަ ދާން ހިނގާބަލަ... ޕްލީސް..."
ލޯގަނޑުން ފަރިބަލަން ހުރި ޒޯއީއާ ދިމާއަށް ބަލާލަމުން މެހެކް ވާހަކަ ދެއްކިއެވެ. ކުރިން ދުވަހު ދުނިޔެއިން އައި ފަހުން މެހެކްއަށް ރަނގަޅަށް ނިދުނީކީ ނޫނެވެ. ރާއިދުގެ ހަނދާނުގައި ވަގުތުތައް ގުނަމުން ދިޔައީ މިއަދު ބޭރަށް ދާނެ މޮޅުގޮތެއް ރާވަމުންނެވެ.
ކޮޓަރީގެ ދޮރު ހުޅުވުމާއެކީ މެހެކް ދިޔައީ ސިއްސައިގެންނެވެ. ޒިބާން ފެނުމާއެކީ މެހެކް އިސްޖަހާލިއެވެ. ޒޯއީ ހިނިތުންވެލަމުން އޭނާގެ ބައްޕައާ ދިމާއަށް އެނބުރި ބަލާލަމުން ބާއްޖަވެރި ހެނދުނަކަށް އެދި މަރްހަބާ ކިއެވެ.
"ދަރިފުޅުމެން ހޭލީތަ؟.. މިއަދަކީ ވަރަށް ހާއްސަ ދުވަހެއްކަން އިނގޭތަ؟..." މެހެކްގެ މޫނަށް ބަލާލަމުން ޒިބާން ވާހަކަ ދެއްކިއިރު ޒޯއީ ހުރީ ޒިބާންގެ އަތުގައި އެލިގަނެގެންނެވެ.
"ކިހިނެއްވީ ބައްޕާ...؟" ޒިބާންގެ މޫނަށް ބަލާލަމުން ޒޯއީ ސުވާލުކޮށްލީ ދުވަހުގެ މުހިއްމު ކަމާއި ގުޅިފައިވާ މުނާސަބަތު ހަނދާނަށް ނާންނާތީއެވެ.
މެހެކް ކައިރިއަށް ޖެހިލަމުން އޭނާ ގެ އިސްތަށިގަނޑުގައި ޒިބާން ފިރުމާލީ ނުހަނު ލޯބިންނެވެ. ޒޯއީއާ ޚިލާފަށް މެހެކް ހުންނާނީ މަޑުންކަން ޒިބާނަށް އެނގެއެވެ. އެއްޗެއް ބޭނުންވިޔަސް މެހެކްއަށް ބުނަން ނުކެރިދަނެތީ އޭނާ ހާއްސަކަމެއް މެހެކަށް ބެހެއްޓިއެވެ. އަތުގައި އޮތް ދެ ފޮށީ ދެކުދިންނަށް ދިއްކޮށްލަމުން ޒިބާން ހިނިތުންވެލިއެވެ. "މިއަދަކީ ތިކުދިންގެ 20 ވަނަ އުފަންދުވަސް.. މީ ބައްޕަ ތިކުދިންނަށް ދޭން ހެދި ފަށެއް..."
މެހެކްއާ ޒޯއީ އެ ފޮށި ހުޅުވާލިއެވެ. ދެކުދިންނަށް އެއް ފަރުމާއަކަށް ހަދާފައިވާ ފަށް އުފުލާލަމުން އޭގެ ފުލަށް ބަލާލީ ހިނިތުންވަމުންނެވެ. ކަރުގައި ފަށް އަޅާލަމުން ޒޯއީ އާއި މެހެކް އެކަކު އަނެކަކުގެ މޫނަށް ބަލާލިއެވެ. ވަރަށް ރީތި ކަމަށް ބުނެ ތައުރީފް ކުރަމުން ދެކުދިން ޒިބާންގެ ގައިގާ ބައްދާލިއެވެ.
ޒިބާން މަޑުހިނގުމެއްގައި އެކޮޓަރިން ނިކުތީ ޒޯއީގެ ހަރަކާތްތަކުން އޭނާގެ ހަނދާނަށް މަންޝާ ސިފަވަމުންނެވެ. ލޮލަށް ޖަމާވަމުން ދިޔަ ކަރުނަތައް ފޮހެލަމުން އެކުދިންނަށް ފުރަގަސްދިން ޒިބާން ހުރީ ދެރަވެފައިކަން މެހެކްއަށް އެނގުނެވެ. މެހެކްގެ މަޑުމައިތިރި އަޑު ޖެހުމުން ޒިބާންގެ ފިޔަވަޅު ހުއްޓުނެވެ. އެނބުރި މެހެކްއާ ދިމާއަށް ބަލާލިއިރު ޒިބާންގެ ދެލޯވަނީ ފުސްވެފައެވެ. މެހެކް ކައިރިއަށް އައިސް ވާހަކަ ދެއްކިއެވެ. އިސްޖަހައިގެން ހުރެ ބަސްއަހާ ކުއްޖަކު ފަދައިންނެވެ.
"ބައްޕާ... އަޅުގަނޑު ރައްޓެހި ކުދިންތަކަކާ އެކީގަ މިރޭ ބޭރަށް ދިޔަޔަސް އެންމެ ރަނގަޅު ތޯ؟... ޕްލީސް..." މެހެކް އެފަދަ ބޮޑުކަމަކު އެދުމުން ޒޯއީ ދެލޯ ބޮޑުކޮށްލަމުން މެހެކްއާ ދިމާއަށް ބަލާލިއެވެ.
ޒިބާން ބޯ ޖަހާލަމުން މެހެކްގެ ބޮލުގައި ފިރުމާލިއެވެ. "މައްސަލައެއް ނެތް.. އެކަމު ބޭރުތެރޭގައި އުޅޭ އިރުވެސް ދަރިފުޅުގެ އަބުރާ އިއްޒަތް ރައްކާތެރިކުރަންވާނެ... މަންމަ ގާތު އަހާފަ ދާންވާނީ... އިނގޭ... ދެކުދިން އެކީގަ ދާންވާނީވެސް... އެކަކުއަނެކަކަށް ބަލަން ވާނެ.. ކޮންމެކުއްޖަކަށް ދެރަގޮތެއް ވިޔަސް ބައްޕަގެ ހިތް ކުދިކުދި ވާނެކަން ހަނދާން ބަހައްޓާތި!..."
ޒިބާން އެ ކޮޓަރިން ނިކުމެގެން ދިޔައިރު އޭނާގެ ހިތް ކުދިކުދިވެ ފަޅައިގެންދާ ކަހަލަ އިހްސާސެއް ވަމުން ދިޔައެވެ. މެހެކް ފެނުމުން ޒިބާންގެ ކޮއްކޮ ޒޭބާ މަތިން މާބޮޑަށް ހަނދާންވަނީއެވެ. މަންޝާ އާއި ޒޭބާގެ ހަނދާންތަކުން ޒިބާންގެ ހިތަށް ކެތްނުވާ ވަރަށް އުނދަގޫވިއެވެ. ގެއިން ނިކުތުމާ އެކީ ޒިބާންގެ މިސްރާބު ބެހެއްޓީ ދުނިޔެއާ ދިމާއަށެވެ. ވިލާތައް ފޫއަޅުވަމުން ބާރުމިނުގައި ޒިބާން ދަތުރުކުރަމުން ދިޔައީ ކ.ކާށިދޫ ތުނޑީ ފަރާތުގައިވާ ބިޔަ ބެރެބެދިގަހާ ދިމާއަށެވެ. ގަސްދަށަށް ޒިބާންގެ ހަށިގަނޑު ތިރިވަމުން ދިޔައިރު އޭނާއަށް ފުން ނޭވާއެއް އެތެރެކޮށްލެވުނެވެ. މަންޝާގެ ހަނދާންތައް އޭނާއަށް އާވަމުން ދިޔައެވެ. މަންޝާއާ އެކީ ލޯބިން ހޭދަކުރި ދުވަސްތައް ސިފަވަމުން ދިޔައެވެ.
ހަނދުވަރު ރީތި ރެއެކެވެ. ގިނަ ރޭތަކުގައި މަންޝާ ގޮވައިގެން އެ ގަސްދަށަށް އައި ނަމަވެސް އެއީ ވަރަށް ހާއްސަ ރެއެކެވެ. މަންޝާގެ އަތުގައި ބޮސްދެމުން ޒިބާން ކަކޫ ޖަހާ ތިރިވިއެވެ. އަދި މަންޝާ ދެކެ ލޯބިވާ ވާހަކަ ބުނެ މުޅި އުމުރު މަންޝާއާ އެކީ ހޭދަކުރާނަން ކަމަށް ވަޢުދުވިއެވެ. ލަދުރަކި ގޮތަކަށް މަންޝާ ހިނިތުންވެލި ނަމަވެސް އޭނާގެ މޫނުމަތިން ފެންނަމުން ދިޔަ ތަފާތުކަމެއް ޒިބާންއަށް ނަގައިގަނެވުނެވެ. މަންޝާ ދެރަވަނީ ކީއްވެކަން އެނގުމުން ޒިބާން ވެސް ދެރަވިއެވެ. މަންޝާއަކީ މީހެއްގެ އަތްބަކަށް ވާތީ އެކަމާ އޭނާ ވިސްނަނީއެވެ.
ލޯބީގެ މިފަދަ ބައްދަލުވުންތަކުން ޒިބާންއަށް މަންޝާ ގޮވައިގެން އުދުހެވޭނެކަން މަންޝާއަށް ވަނީ އެނގިފައެވެ. ޒިބާން ގެ އަތުގައި ހިފާލަމުން މައްޗަށް އިޝާރާތްކޮށްލުމަށްފަހު ރާގެއް އަޅުވާލަމުން މަންޝާ ލައިގެން ހުރި ހެދުމުގެ ފަސްބައިގާ ހިފާ އެތަނުގައި އެނބުރިލިއެވެ. މަންޝާގެ ފަރި ހަރަކާތްތަކަށް ބަލަން ޒިބާން ހުރީ ހިނި އައިސްފައެވެ. މަންޝާގެ ރީތިއަޑުން ކިޔަމުންދިޔަ ލަވައަށް ޒިބާންގެ ސަމާލުކަން ހުސްކޮށްލިއެވެ. އަދި މަންޝާއާ އެކުވެ ލަވައިގެ ބައިތުތައް ފުރިހަމަ ކޮށްލިއެވެ.
މަންޝާ: ރޯޅިއާ އެކީގާ.. ދާން ހިނގާށެ އާދޭ...
ޒިބާން: ޖައްވުގައި ތިބެންހޭ... ދާން ކެރޭނެ އާދޭ...
މަންޝާ: ރީތި ރީތި ތަރިތަކާ އެކީ ނަށާނަމޭ.. ރީތި ހަނދުވަށާ ހެމުން ނަށަމޭ މިރޭ....
މަންޝާގެ އަތުގައި ޒިބާން ހިފުމާއެކީ އެމީހުން ވަށާ އަލިފާން ކޮކާތައް އުދުހެން ފެށިއެވެ. މަންޝާއާ އެކީ މައްޗަށް އަރައިގެން ގޮސް ވިލާތަކާ ހަމައަށް ދެވުމުން ޒިބާންގެ ހަށިގަނޑުގައި މަންޝާ އޮޅުލައިގަތެވެ. އެވަގުތު ޒިބާނަށް މަންޝާގެ އަވަސްވެފައިވާ ނޭވާތައް އިހްސާސްވާން ފެށުމުން މަންޝާގެ މޫނަށް ބަލާލިއެވެ.
"ޒިބާން... އަހަންނަށް ކަމެއްވިޔަސް މިކުއްޖާއަށް ކަމެއް ވިޔަ ނުދޭތި... މިދަރިފުޅު... ވަރަށް ރަނގަޅަށް ބަލައިދޭތި.." މަންޝާގެ މޫނުގައި ދެއަތުން ޒިބާން ހިފަހައްޓަމުން އާނއެކޭ ބުނުމަށްފަހު މަންޝާގެ ނިތްކުރިއަށް ބޮސްދިނެވެ.
"އަހަރެން ހުއްޓާ މަންޝާއަށް ދެރަގޮތެއް ނުވާނެ..." ޒިބާންގެ ދުލުން ނިކުތް ބަސްތަކުން މަންޝާގެ ހިތް ފުރި ބަންޑުން ވިއެވެ.
ޒިބާންގެ އުނަގަނޑުގައި މަންޝާ ދެއަތުން ވަށާލާ ބާރުބާރަށް ބައްދާލީ ދުވަހަކުވެސް ޒިބާންއާ ވަކިވާން ބޭނުންނުވާ ކަމަށް ބުނަމުންނެވެ. އެދުވަހު ޒިބާންއަށް މުޅިދުނިޔޭގެ ހުރިހާ އުފަލަކާ އަރާމެއް ހާސިލް ވިކަހަލައެވެ.
ފެން ތިއްކެއް އައިސް ޒިބާންގެ ކޯތާފަތުގައި ޖެހުމާއެކީ ސިހުމެއް ލިބުނެވެ. އެކަނިމާ އެކަނި ބެރެބެދި ގަހުގެ ގޮފިގަނޑެއްމަތީ އިށީނދެގެން ހިޔާލަކަށް ގެއްލިފައި އިނދެވުނީ ކިހާ އިރެއް ވަންދެންކަމެއް ޒިބާނަކަށް ނޭނގުނެވެ. އޭރު އުޑުމަތިވަނީ ވިއްސާރަ ވިލާތަކުން ބައްދާލާފައެވެ. ވާރޭ ކަނިޖަހަން ފެށުމުން ޒިބާނަށް މަންޝާގެ ހަނދާންތައް އިތުރަށް އާވިއެވެ. ވާރޭ ބޯކުރަމުން ދިޔައިރުވެސް އެތަނުގައި ޒިބާން އިނީ މަންޝާގެ ހަނދާންތަކުގައެވެ. ގަހުން މަލެއް ބިނދެގެން އެމަލަށް ބަލަން އިންއިރު ޒިބާންގެ ހަނދާނަށް އައީ ވާރެއާ ތެމިފޯވެގެން މަންޝާމެންގޭ ބެލްކަނީގައި ތިބެ ދެމީހުން ދެއްކި ވާހަކަތަކެވެ.
*** *** *** *** *** ***
ކަންނެތް ގޮތަކަށް ލޯ ހުޅުވާލަމުން ނައުރީން މޯޅިއަކަށް ދެމިލަމުން އަޒީމްއާ ދިމާއަށް ބަލާލިއެވެ. މުޅިގައިގާ ފޮތިގަނޑު އަޅައިގެން އަޒީމް އޮތީ ގަދައަށް ނިދާފައިކަމުން އަޒީމަށް އުނދަގޫ ކުރާކަށް ނައުރީން ބޭނުމެއް ނުވިއެވެ. ހެނދުނުގެ ވަގުތު ބޯ ކޮށް ވާރޭ ވެހޭއަޑު އިވުމުން އަނބުރާ އެނދުގައި އޮށޯންނަން ނައުރީން ބޭނުންވިއެވެ. ނަމަވެސް ގޭތެރޭގައި ކުރަންޖެހޭ މަސައްކަތްތައް ހަނދާންވުމުން ތެދުވެ ބޭރަށް ނިކުންނަން އޭނާއަށް މަޖުބޫރުވިއެވެ.
އެނދުމަތީ އިށީނުމަށްފަހު ހޭވިފައިވާ އިސްތަށިގަނޑު ރަނގަޅުކޮށްލަން އިސްތަށިތައް އެއްކޮށްލުމަށްފަހު ބޮލުމެދަށް ހުޅިއެއްގޮތަށް ހަރުކޮށްލިއެވެ. އެނދުމަތިން ތެދުވެ ލައިގެން ހުރި ހެދުން ރަނގަޅުކޮށްލަމުން ފާހާނާއަށް ދާން ނައުރީން އަވަސްވެގަތެވެ.
ފާހާނާއަށް ވަދެ ދޮރު ލައްޕާލުމަށްފަހު މޫނުބަލާ ލޯގަނޑާ ގާތްވެލި އިރު ނައުރީން ދިޔައީ ސިއްސައިގެންނެވެ. މޭމަތީގައި ވަކި ދަމާފައިވާ ކަހަލަ ގޮތަކަށް ރަތްވެފައިވާ ނިޝާންތައް ފެންނަން ހުރުމުން އޭނާ ހައިރާން ވިއެވެ. އެތަނުގައި އަތް ހާކާލުމަށްފަހު ރޭގައި އަޒީމްގެ އަތުން ވަކި އެޅުނީކަމަށް ނައުރީން ނިންމިއެވެ. ބުރުސް ނަގާ ބުރުހުގައި ބޭސް ޖަހާލުމަށްފަހު ދަތްއުނގުޅަން އަވަސްވެގަތެވެ.
ލޯގަނޑަށް ބަލާލިވަގުތު ނައުރީންގެ ފަހަތުން ހިޔަންޏެއް ފެނުނުހެން ހީވުމުން ނައުރީނަށް ސިހުމެއް ލިބުނެވެ. ފަހަތަށް ބަލާލި ނަމަވެސް ފާހާނާ ތެރޭގައި ނައުރީން ހުރީ އެކަންޏެވެ. ހިތްއަވަސްވެ ބިރުގެންފައި ވުމުން އަވަސްކޮށްލައިގެން ނައުރީން ފާހާނާއިން ނިކުންނަން ތަޅުގައި ހިފާ އަނބުރާލިއެވެ. ތަޅުގައި ހިފާ އެތައް ފަހަރަކު އެނބުރުމުން ވެސް އެ ތަޅު އެނބުރޭ ގޮތެއް ނުވިއެވެ. ނައުރީން ދުލުން ހެޔޮ އެއްޗެއް ކިޔޭތޯ މަސައްކަތް ކުރިއެވެ. ކުރުސި ކިޔަން ފެށުމާއެކީ ނައުރީނަށް އެދޮރު ހުޅުވޭ ގޮތްވިއެވެ.
ފާހާނާއިން ނިކުތުމާއެކީ ނައުރީން އަޒީމަށް ގޮވަމުން އެނދާ ދިމާއަށް ބަލާލިއެވެ. އެނދުގައި އަޒީމްއެއް ނެތެވެ. ހައިރާންވެފައި ހުރެ ނައުރީން ގޮސް އެނދުމަތީ އޮތް ފޮތިގަނޑު ހިއްލާ ބަލާލިއެވެ. ފޮތިގަނޑުގެ އަޑީގައި އޮތް ހުޅި ފެނުމާ އެކީ ނައުރީން ދެލޯ ބޮޑުވެގެން ދިޔައެވެ. ދާދި ދެންމެ އަކު ފާހާނާތެރޭ އެ ހިނގި ކަންތަކާ މި ހުޅިއާ ގުޅުމެއް އޮވެދާނެކަމާމެދު ނައުރީންގެ ހިތުގައި ޝައްކެއް އުފެދުނެވެ.
*** *** *** *** *** ***
ގޯތިތެރޭ ކުނިކަހާލުމަށްފަހު ކުނި ނަގަން މަންޝާ އޮތީ ގުދުވެގެންނެވެ. ކައިރިއަށް އައިސް މީހަކު ހުއްޓުމުން އެމީހާ ފަޔާ ދިމާއަށް މަންޝާ ބަލާލިއެވެ. އެއީ ކާކުކަން މަންޝާ އަށް އެނގުނެވެ. ހިނިތުންވެލަމުން މަންޝާ ތެދުވެ އެމީހާއާ ކުރިމަތިލަމުން ވާހަކަ ދެއްކިއެވެ. "އަޒީމް. ސައި ބޮއިފިންތަ؟.."
އަޒީމް ހުރީ ކަޅި ޖަހާނުލާ މަންޝާއާ ދިމާއަށް ބަލާށެވެ. އަޒީމް ކައިރިން ރެކިގެން ގޭތެރެއަށް ވަންނަން ދާން މަންޝާ ހިނގައިގަތެވެ. ކުއްލިއަކަށް މަންޝާގެ އަތުގައި އަޒީމް ހިފުމުން މަންޝާގެ އަތުގައި އޮތް އިލޮށިފަތި އަތުން ދޫވެގެން ވެއްޓުނެވެ. ޖެހިލުންވެ ހުރެ އަޒީމާ ދިމާއަށް މަންޝާ ބަލާލީ އެހެންޏާ އަޒީމް އުޅޭ ގޮތާ ތަފާތު ވީމައެވެ.
"މަންޝާ ސައިބޮއެފިންތަ؟.." މަންޝާގެ އަތުން ދޫކޮށްލަމުން އަޒީމްވެސް ކޮށްލީ ސުވާލެކެވެ.
ނޫނެކޭ ބުނާ ފަދައިން މަންޝާ ދެއަތަށް ބޯހޫރުވާލިއެވެ. އަދި ގޭތެރެއަށް ވަންނަމުން އަޒީމް ގާތު ސައިބޯން އައުމަށް އެދުނެވެ. ބަދިގެއަށް ވަދެ މަންޝާ އަވަސްވެގަތީ އަޒީމަށް ސައި ތައްޔާރު ކޮށްދޭށެވެ. މޭޒުމައްޗަށް ތަށިތައް ނަގާ ރޮށިތަށި މަތިނަގާ ދިނުމަށްފަހު އަޒީމް ބޭނުންވާ ގޮތަށް ހޫނު ކޮފީތައްޓެއް ގިރާލުމަށްފަހު މަންޝާ އެ ކޮފީތަށިން ރަހަބަލާލިއެވެ.
އެ ހުރިހާ މަސައްކަތެއް މަންޝާ ކުރަމުން ދިޔައިރު އަޒީމް އިނީ ކަޅި ޖަހާނުލާ މަންޝާއާ ދިމާއަށް ބަލާށެވެ. ތައްޓަށް ކުޅިމަސްކޮޅެއް އަޅައިދިނުމަށްފަހު އަޒީމާ ދިމާއަށް މަންޝާ ބަލާލިއެވެ. އަޒީމްގެ ބެލުމުން މަންޝާއަށް ކޮންމެވެސް ވަރަކަށް އުނދަގޫ ވިއެވެ. އިސްޖަހާލަމުން އަނެއް ފަރާތަށް މަންޝާ އެނބުރުނީ އެތަނުން ދުރަށް ދާށެވެ. ހަމައެވަގުތު މަންޝާއަށް އަޒީމް ގޮވާލިއެވެ.
"މަން... އާދޭ އަހަންނާއެކީ ސައިބޯން..."
(ނުނިމޭ)
