މަންޝާ ދައްކަމުން ދިޔަ ވާހަކަ އަޑުއަހަން ހުރި ނައުރީނަށް ލިބުނު ސިހުމާއެކު އަޒީމާ ދިމާއަށް ބަލާލެވުނެވެ. މަޑު ހިނގުމެއްގައި ހުރެ އަޒީމް ކުރިއަށް އައިސް މަންޝާ ކައިރިއަށް ހުއްޓުނެވެ. މަންޝާ ދައްކަމުން ދިޔަ ވާހަކަތައް އެއް ރާގަކަށް އަޒީމްގެ ކަންފަތް ބުޑުގައި ގުގުމަމުން ދިޔަ ކަހަލައެވެ.
"މަންޝާ.. ކީކޭ ތި ކިޔަނީ؟..." އަޒީމް މަޑުމަޑުން މަންޝާގެ ކޮނޑުގައި ހިފާލުމުން މަންޝާ އެތަނުން ތެދުވެ ދެއަތުން މޫނު ފޮހެލިއެވެ. އިނގިލިން ކުޑަދޮރާ ދިމާއަށް އިޝާރާތް ކުރަމުން މަންޝާ ވާހަކަ ދެއްކިއެވެ. "އަޅެ. އަޒީމް... އެމީހުން ކިޔަވާތީ އެ ދިޔައީ.. މަ ވިހޭ ކުއްޖާ ވެސް ގޮވައިގެން... އެހެން ނުހަދާ އަޒީމް... އެ ކުއްޖާ ގެނެސްދީ..."
އަޒީމްގެ މޭގައި ދެއަތުން ތަޅަމުން މަންޝާ އާދޭސް ކުރަމުން ދިޔައިރު ބުނާނެ އެއްޗެއް ނޭނގިފައި އަޒީމަށް ހުރެވުނީ މަންޝާ ދައްކަމުން ދިޔަ ވާހަކަތަކާ ދޭތެރޭ ވިސްނާށެވެ. މަންޒަރު ބަލަން ހުރި ނައުރީނަށް މިވަނީ ކީއްކަންވެސް ދެނެގަންނާކަށް ނޭނގުނެވެ. މަންޝާގެ ދެއަތުގެ މުލައްދަނޑީގައި އަޒީމް ހިފެހެއްޓިއެވެ. "މަންޝާ.. އޭ ކީކޭތަ ތި ކިޔަނީ... ކޮން ބައެއްތަ ކިޔަވަނީ..."
"އެތިބީނު ޓެރަސްގަ ކިޔަވަން އެންމެން.. އަހަރެންނާ އަހަރެންގެ ކުއްޖާގެ ދޭތެރެއަށް އަޒީމް ވަދެ އެ ކުއްޖާވެސް މަށާ ދުރުކޮށްލީ... މަގޭ ދަރިފުޅު ގެނެސްދީ.. ޕްލީސް އަޒީމް... މަގޭ.. މަގޭ ދަރި.." މަންޝާގެ ހެއަށް ގޮތްވެ ގައިން ވަރު ދޫވާން ފެށުމުން އޭނާގެ ގައިގާ އަޒީމް ހިފަހައްޓަމުން ނައުރީނާ ދިމާއަށް ބަލާލިއެވެ. އަތް ދަނޑިމައްޗަށް ލާ މަންޝާ އުރާލިއިރު އޭނާގެ ހެއެއް ނެތެވެ. "ނައުރީން.. ދޭބަލަ ފެންތައްޓެއް ގެންނަން..."
ނައުރީން އެކޮޓަރިން ނިކުމެގެން ދިއުމުން މަންޝާ އެނދުގައި ބޭއްވުމަށްފަހު އޭނާގެ މޫނުގައި ދެއަތުން އަޒީމް ފިރުމާލިއެވެ. މޫނުމައްޗަށް ވެއްޓިފައި ވާ އިސްތަށިތައް ރަނގަޅުކޮށްލި އިރު އަޒީމްގެ ހަނދާނަށް އައީ މީގެ ވިހިއަހަރު ކުރިން މަންޝާއާ އަވަލައިގެން އުޅުނު ޖިންނި ނައްތާލަން އެމީހުން ކިޔެވެލި ކީ ދުވަހެވެ.
*** *** *** *** *** ***
"މަންޝާ.... އަހަރެންނަށް މަންޝާއާ ނުލާ ނޫޅެވޭނެ.."
ޒިބާންގެ ހަޅޭކުގެ އަޑަށް ތަޒްކިޔާއަށް ހޭލެވުނު އިރު ނިދީގައި އޮވެ ޒިބާން ހަޅޭއްލަވަމުން ދިޔަތަން ފެނުނެވެ. ގަޔަށް ބާރުއަރުވަމުން ގަދަހަދަމުން ދިޔަ ޒިބާން އޮތީ ނިދީގައިކަން އެނގުމުން ތަޒްކިޔާ ކުރުސި ކިޔާލުމަށްފަހު ޒިބާންގެ މެޔަށް ފުމެލިއެވެ.
"ޒިބާން.. އޭ.. ކިހިނެއްވީ..." ސިއްސައިގެން ގޮސް ޒިބާން ތެދުވެ ފުން ނޭވާތަކެއްލަމުން ދިޔައީ އޭނާގެ ހަށިގަނޑަށް ވެފައިވާ އުނދަގޫތަކާއި ވޭނަށް ލުޔެއް ލިބޭތޯއެވެ. ތަޒްކިޔާ ކުރި ސުވާލުވެސް ޒިބާނަށް އަޑު ނިވޭ ކަހަލައެވެ. ވަށައިގެން ކޮޓަރިތެރެއަށް ނަޒަރު ހިންގާލުމަށްފަހު އޭނާ އަވަސްވެގަތީ އެކޮޓަރީގައިވާ ކުޑަދޮރާ ދިމާއަށެވެ. މަޑު ހިނގުމެއްގައި ތަޒްކިޔާ އައިސް ޒިބާން ކައިރިއަށް ހުއްޓުނެވެ.
"ބިރުވެރި ހުވަފެނެއް ފެނުނީތަ؟..." ތަޒްކިޔާ ސުވާލުކޮށްލަމުން ޒިބާންގެ އަތުގައި ހިފާލީ އޭނާގެ ފަރާތުން ޖަވާބެއް ލިބޭނެކަމުގެ އުންމީދުގައެއް ނޫނެވެ. ޒިބާން އެނބުރި ތަޒްކިޔާއާ ދިމާއަށް ބަލާލިއެވެ. ތަޒްކިޔާގެ ދެލޮލުން ފާޅުވަމުން ދިޔައީ އިންތިހާ ދަރަޖައިގެ ލޯތްބެވެ. މާޒީގެ ހަނދާންތައް ޒިބާނަށް އުނދަގޫކުރި ނަމަވެސް މީ މިފަދަ ހުވަފެނެއް ޒިބާނަށް ފެނުނު ފުރަތަމަ ފަހަރެވެ. ހުވަފެނުގައި ފެނުނު އެއްޗެއް ތަޒްކިޔާއާ ހިއްސާ ކޮށްފިއްޔާ އޭނަ ދެރަވާނެ މިންވަރު ޒިބާނަށް ވިސްނުނެވެ.
ތަޒްކިޔާގެ ހަށިގަނޑުގައި ޒިބާން އޮޅުލައިގަތެވެ. ހިތް ފުރެންދެން ޒިބާން ރޯން ބޭނުމެވެ. އެ ހުވަފެންތަކުން އޭނާއަށް ކަމެއް ދޭހަވެއްޖެއެވެ. މަންޝާ ފެނޭތޯ ދުނިޔެއަށް ގޮސް ކުރަމުން ދިޔަ ބުރަ މަސައްކަތައް އެދެވޭ ނަތީޖާއެއް ނުފެނު ސަބަބު ވެސް އެނގިއްޖެއެވެ. މަންޝާއާ ޒިބާން ދުރުކުރަން އެމީހުން އެވަނީ ފަންޑިތައިގެ ބޭނުން ކޮށްފައެވެ. އެދެމީހުންނަށް ދުވަހުވެސް ބައްދަލު ނުވެވޭނެ ވަރުގެ ބޮޑުކަމެއް ކޮށްފިކަން ޒިބާންއަށް އެނގުމުން އޭނާގެ ލޮލުން ހިފެހެއްޓުމެއް ނެތި ކަރުނަ ފޭބިއެވެ.
ޒިބާންގެ ހަށިގަނޑު ތެރޭ ފޮރުވިގެން އޮތް ތަޒްކިޔާއަށް ކުރަމުން ދިޔައީ ތަފާތު އިހްސާސެކެވެ. ވޭތުވެދިޔަ ވިހި އަހަރު ތެރޭވެސް ޒިބާންގެ ފަރާތުން މިކަހަލަ އަމަލެއް ފެނިފައި ނުވާތީ ތަޒްކިޔާ ހުރީ ހައިރާންވެފައެވެ. ހިތުގައި މަޑު ރިހުމެއް އުފެދިގެން ދިޔައީ ދެންމެ ޒިބާން ނިދީގައި އޮވެ ބޭނުންކުރަމުން ދިޔަ ބަސްތައް ހަނދާންވުމުންނެވެ. "މަންޝާ.. އަހަރެންނަށް މަންޝާއާ ނުލާ ނޫޅެވޭނެ.."
"ހުވަފެނުގަ މަންޝާ ފެނުނީތަ؟.." ދެ ހިޔާލެއްގައި ހުރެ ތަޒްކިޔާ ސުވާލުކޮށްލިއެވެ. އެވަގުތު ޒިބާން ތަޒްކިޔާގެ ގައިން ދޫކޮށްލަމުން އޭނާގެ މޫނަށް ބަލާލިއެވެ.
"އަހަރެންނަކީ އެހާ ރަނގަޅު ފިރިއެއް ނޫންކަން އަހަންނަށް އެނގޭ.. އެކަމަކު ތަޒްކިޔާއަކީ ވަރަށް ރަނގަޅު އަތްބެއް... އެހާމެ ފުރިހަމަ މަންމައެއް... މަންޝާއާ އަހަރެންގެ ލޯބީގެ ނީޝާނެއް ކަމަށްވާ ޒޯއީ ތި ބަލައިދެނީ އެހާމެ ލޯބިން އަމިއްލަ ދަރިއެއް ފަދައިން... ހިތުގައި އެއްވެސް ހަސަދަވެރި ކަމެއް ނެތި، ޝަކުވާ ކުރުމެއް ނެތި.." ޒިބާންގެ ވާހަކަ އެހިސާބަށް ދިޔައިރު ޒިބާންގެ ލޮލުން ހިފެހެއްޓުމެއްނެތި ކަރުނަ އޮހެން ފެށިއެވެ. ތަޒްކިޔާއަށް އެ މަންޒަރު ބަލާކަށް ކުޅަދާނައެއް ނުވިއެވެ.
"ޒިބާން.. ކޮންކަހަލަ ވާހަކައެއް ތި ދައްކަނީ..." ތަޒްކިޔާ މަސައްކަތް ކުރީ ޒިބާން ހިތްހަމަޖައްސައި ދެވޭތޯއެވެ. ނަމަވެސް ޒިބާން ދައްކަމުން ދިޔަ ވާހަކަތަކުން ތަޒްކިޔާގެ ހިތަށް އަސަރުކޮށްފިއެވެ.
"އަހަރެން ނުހުއްޓުވާ.. މި ދައްކާ ވާހަކަތައް އަޑުއަހާބަލަ.. އަހަރެންނަކީ ހާދަ ގޯސް މީހެކޭ... އަތްބަކަށް ދޭންޖެހޭ ލޯތްބާއި އަޅާލުން ތަޒްކީއަށް ނުދީ އަހަރެން ތަޒްކީ މި ގެންގުޅެނީ ދަރިން ބަލަން ގެނެއްސަ ހުރި މީހެއް ހެން.. ތަޒްކީގެ ބައްޕަ އެދުވަހު ބުނީ ރަނގަޅު ވާހަކައެއް... އަހަންނަށް މައާފް ކުރޭ.. އަހަރެން ތަޒްކީއަށް ދެރަގޮތެއް ވިޔަކަ ނުދޭނަން... އަހަރެންނަށް މައާފް ކުރޭ..." ޒިބާން ތިރިވެ ތަޒްކިޔާގެ އަތުގައި ބޮސްދިނެވެ. ޒިބާންގެ ގައިގާ ތަޒްކިޔާ ބައްދާލިއެވެ. ޒިބާންގެ ހިތްވަނީ ކުދިކުދިވެފައެވެ. މިއަދު ޒިބާނަށް އަޅާލުމާއި އޯގާތެރިކަން ބޭނުންވާކަން ތަޒްކިޔާއަށް އެނގޭ ކަހަލައެވެ.
*** *** *** *** *** ***
މަންޝާއަށް އޮތީ ނިދފައި ކަމުން އަޒީމް އެކޮޓަރިން ނިކުމެ މަޑުމަޑުން ދޮރު ލައްޕާލިއެވެ. ކަނދުރާގައި އަތްހާކަމުން އަޒީމް ގޮސް އޭނާގެ ކޮޓަރިއަށް ވަނެވެ. ދޮރު ލައްޕާލުމަށްފަހު އެނދާ ދިމާއަށް އަޒީމް މިސްރާބުޖެހީ ނިދާލަން ބޭނުންވެފައި ހުރުމުންނެވެ. އަދިވެސް އަޒީމްގެ ސިކުނޑީގައި އެނބުރެމުން ދިޔައީ މަންޝާ ދެއްކި ވާހަކަތަކެވެ.
ފާހާނާއިން ނައުރީން ނިކުތްއިރު އަޒީމް އޮތީ އެނދުގައި އޮށޯވެގެން ނިތްމަތީ އަތްބާއްވާލައިގެން ވިސްނުމަކަށް ގެއްލިފައެވެ. އެނދަށް އަރަމުން ނައުރީން ވާހަކަ ދެއްކީ އަޒީމްގެ މޫނަށް ބަލާލަމުންނެވެ. "މަންޝާ ކީކޭތަ އެކިއީ.. އޭނާގެ ދަރީއޯ.. ކޮންއިރަކު އޭނާއަށް ދަރިއަކު ލިބުނީ... ދެން ކޮން ކިޔެވެއްޔެއް ކީ ވާހަކައެއްތަ އެއީ... އަޒީމް.. ތީނަ މަށަށް ކަމެއް ސިއްރު ކުރަނީތަ؟... ކީކޭތަ މަންޝާ އެ ކިއީ..."
މޫނު ކުނިކޮށްލަމުން ނައުރީންއާ ދިމާއަށް އަޒީމް ބަލާލީ ހިތްހަމަނުޖެހިފައި ހުރެކަން ނައުރީނަށް އެނގުނެވެ. "މިހާރަކު ނޫން ތިވާހަކަ ދައްކާނީ... އާދޭ ނިދަން..."
"ނުނިދާނަން.. މަށަށް ހީވެއްޖޭ މަށަށް ކަމެއް ސިއްރު ކުރަނީކަން... ދެން ބުނަންވީނު... ކޮބާތަ މައްސަލައަކީ.." އަޒީމްއާ މަންޝާއާ ދެމެދުގައި ހާއްސަ ލޯތްބެއް ވާކަން އެނގޭތީ ނައުރީން އެކަމާ ހަސަދަވެރިވެއެވެ. އައިސްފައި ހުރި ރުޅިން އަޒީމާ ދިމާއަށް އޭނާއަށް އެއްޗެހި ކިޔުން އެއީ މިވަގުތު އޭނާ ކޮށްގެން ވާނެކަމެއް ނޫންކަން އެނގުނީ އަޒީމް އެނދުމަތިން ތެދުވުމުންނެވެ.
ގޮނޑިމަތީ އަޅުވާފައި އޮތް ޓީޝާޓް ނެގުމުން އަޒީމް އެއުޅެނީ ދާންކަން ނައުރީނަށް އެނގުނެވެ. އިބްޒީމާ ބުނިގޮތަށް ވިދިވދިގެން ތިންރޭ ރޭކުރަން ޖެހެއެވެ. އެ ކަންތައް ނުކުރެވިއްޖިއްޔާ ކަންތައް ގޯސްވާނެކަން ނައުރީނަށް ވިސްނުނެވެ. "ދެން ކޮންތާކަށް ދާން ތިއުޅެނީ.. އެއީ އަހަރެން އެހެން ބުނި އެއްޗެއް ނޫނޭ... ރުޅިއައީތަ... ޑަރލިންގް؟.."
އަޒީމާ ގާތްވަމުުން ނައުރީން ވާހަކަ ދެއްކިއިރު އޭނާގެ ވާހަކަ ދެއްކުމުގެ ރާގު ވަނީ މުޅިން ބަދަލުވެފައެވެ. އަޒީމްގެ އަތުގައި އޮތް ޓީޝާޓްގައި ނައުރީން ހިފެހެއްޓިއެވެ. އެއްވެސް ހަރަކާތެއް ނުކޮށް އެހުރި ފިޔަވަޅުމަތީ އަޒީމް ހުރީ ނައުރީންގެ ހަރަކާތްތަކަށް ބަލާށެވެ. ޓީޝާޓް އެއްފަރާތަކަށް ހޫރާލުމަށްފަހު އަޒީމްގެ ހަށިގަނޑުގައި ނައުރީން އޮޅުލައިގަތެވެ. އެވަގުތު އަޒީމްގެ ނޭފަތުގައި ޖެހުނީ ހިތިވަހެކެވެ. ނައުރީގެ އިސްތަށިގަނޑުން ދުވިވަހެކެވެ. އަޒީމް ދެލޯ މަރާލަމުން ފުން ނޭވާއެއް އެތެރެކޮށްލުމަށްފަހު ނައުރީންގެ ދެކޮނޑުގައި ހިފާ ފަހަތަށް ޖައްސާލިއެވެ.
އަޒީމްގެ ހަރަކާތް ހުރި ގޮތުން ނައުރީން ފަސްޖެހުނެވެ. އަޒީމްގެ މޫނަށް ނައުރީން ބަލަން ހުރީ ދެން ހަދަންވީ ގޮތެއް އޭނާއަށް ނުވިސްނުނީމައެވެ. ނައުރީންގެ ކޮނޑުގައި ހިފާ އަޒީމް ކޮށްޕާލުމުން ނައުރީނަށް ސިހުމެއް ލިބުނެވެ. އެނދުމައްޗަށް އުއްޑުން ނައުރީން ވެއްޓުމުން އޭނާގެ ހަށިގަނޑުމައްޗަށް އަޒީމް އަރައިގަތެވެ. އަޒީމްގެ އަމަލުތައް ހުރިގޮތުން މިރޭގެ ލަނޑުދަނޑިވެސް ނައުރީނަށް ހާސިލްވީކަން އެނގި އޭނާގެ ތުންފަތާ ކުޅެލީ ލާނެއް ހިނިތުންވުމެކެވެ. ނައުރީންގެ ކަރުދޮށުގައި އަޒީމް ބޮސްދެމުން ދިޔައިރު ނައުރީން މަޑުމަޑުން ލޯމަރާލިއެވެ. ފަނޑު އަލިކަމެއް ހުރި ކޮޓަރިތެރޭގައި ދެމީހުންގެ ހޫނު ނޭވާގެ އަޑުވަނީ ފެތުރިފައެވެ.
*** *** *** *** *** ***
"ކޮބާ މަބުނި އެއްޗެހިތައް ހޯދައިފިންތަ؟..." ފަނުން ހަދާފައިވާ ގެއަަށް ވަންނަމުން ޟިރާރު ސުވާލުކޮށްލީ އެއްފަރާތެއްގައި ހުރި ލަތީފާއާއެވެ. ލަތީފާ ބޯޖަހާލަމުން އިސްޖަހާލިއެވެ. އޭރު އެތެރެ ކޮޓަރިން މުންޑު އަރުވާ ޖަހަމުން ޝާކިރު ނިކުންނަނީއެވެ. ޟިރާރު ފެނުމާއެކީ އޭނާ ހިނިތުންވާން މަސައްކަތް ކުރަމުން ސަލާމްކޮށްލަން އަތް ދިއްކޮށްލިއެވެ.
ޟިރާރުގެ ފަހަތުން އެގޭތެރެއަށް ވަތް އިބްޒީމާ ފެނުމުން ޝާކިރު ވާހަކަދެއްކިއެވެ. "އެ މަންޖެ ވަރަށް ވަރުދައްކާތީ މިގުޅީ.. އެހެން ނޫންނަމަ މިހާ ދަންގަޑިއެއްގަ ނުގުޅީމުސް... ވަރަށް ވަރު އެރުވި... ބައެއް ފަަރު ހީފާނެ.. އަނެއްފަހަރު ރޮއެފާނެ.. ނޭނގެ.. މަގޭ ސިކުނޑި ސުމަކަށް ހިނގައްޖެ... މިކަން ރަނގަޅުކޮށްދެވޭނެ ތޯ؟.."
އާދޭހުގެ ރާގަކަށް ވާހަކަދައްކަމުން ދިޔަ ޝާކިރާ ދިމާއަށް އިބްޒީމާ ބަލާލުމަށްފަހު ބޯ ޖަހާލިއެވެ. "ކޮބާތަ އެމަންޖެ؟.. މިހާރު ކިހިނެއް؟.."
"ވަރަށް ބާރު އަރުވައަރުވާފަ ނިދިފަ އޮތީ.. ދެންމެ އެ ނިދީ ވެސް..." ލަތީފާ ވާހަކަދެއްކީ މިދަންވަރު އެކަންކުރަން އޭނާ ހިތްހަމަނުޖެހޭތީއެވެ. ލައިގެން ހުރި ދިގުހެދުމުގެ ބޯވަޅުން މޫނުމަތީ ހިއްލާފައިވާ ދާތައް އޭނާ ފޮހެލިއެވެ.
"އަސްލު ލަސްކުރި ވަރަކަށް މިކަމުން އެމަންޖެއަށް ލިބޭ ގެއްލުން ބޮޑުވާނީ... ހިނގާ ފަށަމާ..." އިބްޒީމާ އަތުގައިވާ ދަބަސް އުފުލާލަމުން ޝާކިރު އިޝާރާތް ކުރި ކޮޓާރިއާ ދިމާއަށް އޭނާ ހިނގައިގަތެވެ. އިބްޒީމާގެ ފަހަތުން ލަތީފާ ދާން ހިނގައިގަތުމުން ލަތީފާ ހުއްޓުވަން ޟިރާރު ގޮވާލިއެވެ.
"ފެ ންފޮދެއް ދީފާނަންތަ؟.."
ބޯ ޖަހާލަމުން ލަތީފާ އަވަސްވެގަތީ ބަދިގެއާ ދިމާއަށެވެ. ބަދިގެ ހުންނަނީ ގެއާ ވަކިން ދުރުގައިކަމުން ލަތީފާގެ ފަހަތުން ޟީރާރު ބަދިގެ ފަރާތަށް ދާން އަވަސްވެގަތީ ގޭތެރެއިން މީހަކު އާދޭތޯ ބަލާލުމަށް ފަހުއެވެ. ބަދިގެއަށް ވަންނަ ދޮރު ބަންދުކުރަން ޖައްސާފައި ހުރި ޓިނުގަނޑު ނަގާ ދުރުގައި ބެހެއްޓުމަށްފަހު ލަތީފާ އެތެރެއަށް ވަނެވެ. ދަގަނޑު ތައްޓަކަށް ބަނޑިޔަލުން ފެންއަޅައި ދިނުމަށްފަހު ޟިރާރަށް ދިއްކޮށްލުމުން އެތަށީގައި ޟިރާރު ހިފަމުން ލަތީފާގެ މޫނަށް ބަލާލިއެވެ.
"ވަރަށް ބޮޑަށް ޝުކުރިއްޔާ!.. މި ކަހަލަ ގަޑިއެއްގަ ގުޅީމަ ޟިރާރު އައިސްދާނެއެކޭ ހިއެއް ނުކުރަން... އެ މަންޖެ އެއްކޮށް ރަނގަޅުކޮށް ދެވޭނެތަ..." ލާތީފާ ޝުކުރުވެރިވާ ހާލުގައި ޟިރާރާ ވާހަކަ ދެއްކީ ވަރަށް ރީތިކޮށް މަޑުމަޑުންނެވެ. އޭރު ލަތީފާ ވަނީ ފެންކަޅި ވެފައެވެ. "އާން.. ރަނގަޅުކޮށް ދެވޭނެ.." ފެން ފޮދެއް ބޯލުމަށްފަހު ލަތީފާގެ ކޮނޑުގައި ޟިރާރު ފިރުމާލަމުން ވާހަކަ ދެއްކިއެވެ. ނުރޯން މަސައްކަތް ކުރި ނަމަވެސް ޟިރާރުގެ އޯގާތެރިކަމުން ލަތީފާ ބަޑި ފަޅައިގެން ދިޔައެވެ.
"އަހަރެން ޝުކުރު އަދާކޮށްދޭނީ ކިހިނެއް.. އަހަރެމެންނަކީ ފަގީރުން.. ޟިރާރު ތިކޮށްދެއްވާ މަސައްކަތަށް އަހަރެމެންނަށް ފައިސާ ދެވޭކަށް ނެތް..." ލަތީފާ ރޮމުން ދިޔައިރު އެމީހުންގެ ހާލަތު ބަޔާންކޮށް ދިނެވެ.
ފުރުސަތުގެ ބޭނުން ހިފާ ލަތީފާގެ ގައިގާ ޟީރާރު ބައްދާލިއެވެ. "ނުރޮއި.. ހުރިހާ ކަމެއްވެސް ރަނގަޅުވާނެ.. ދެން ހިނގާ އެތެރެއަށް ދާން..." ދެލޯ ފޮހެލަމުން މޫނުގައި އޭނާ އަތް ހާކާލިއެވެ. ލަތީފާ ހަމައަކަށް އެޅެންދެން ޟިރާރު މަޑުކޮށްގެން ހުރީ ނުބައި ޒާތަކަށް ހިނި އައިސްފައެވެ.
*** *** *** *** *** ***
ޟިރާރު ކޮޓަރިއަށް ވަތްއިރު އިބްޒީމާ އުޅުނީ ތަޅުންމަތީ ހުދު ކުލައިގެ ޗޯކަކުން އަކަ ކުރަހާށެވެ. އަކަ ކުރަހާ ނިމުމުން އިބްޒީމާ ޟިރާރާ ދިމާއަށް ބަލާލިއެވެ. އަދި ދަބަސްތެރޭ ހުރި އުއްބައްތިތައް ނަގާ ރޯކުރަން އިބްޒީމާ އެދުމުން ޟިރާރު މަސައްކަތައިގެން އަވަސް ވެގަތެވެ. ސީމާ އޮތީ ގަދަ ނިންޖަކުން ނިދާފައެވެ. އެންމެންވެގެން ސީމާ ގެނެސް އިބްޒީމާ ކުރަހާފައިވާ އަކަތަކުގެ މެދުގައި ބޭއްވިއެވެ. އަދި ރަސްގެހެން ފާހަގަ ޖަހާފައިވާ ތަންތަނުގައި ރޯކުރި އުއްބައްތިތައް ބެހެއްޓިއެވެ. މަންޒަރު ބަލަން ހުރި ލަތީފާގެ ހިތައް އުނދަގޫވަމުން ދިޔަކަން އެތާތިބި އެންމެންނަށް ވެސް ފާހަގަވިއެވެ.
"ބިރުގަންނަންޏާ ބޭރުގަ މަޑުކުރޭ... ބިރުގަނެގެން މިކަހަލަ ކަންތައްތަކެއް ނުވާނެ.."
ވަކިވަކިން ލަތީފާއާ ޝާކިރުގެ މޫނަށް ބަލާލަމުން އިބްޒީމާ ބުނެލިއެވެ. އެވަގުތު ޝާކިރު ބަލާލީ ލަތީފާގެ މޫނަށެވެ. ލަތީފާ ހިނިތުންވެލުމުން އެދެމަފިރިން އެތާ މަޑުކުރާ ގޮތަށް ނިންމިއެވެ. އިބްޒީމާ އިށީނީ ސީމާގެ ބޮލާވީ ފަރާތުގައެވެ. ޟިރާރު އިށީނީ އިބްޒީމާއާ ކުރިމަތިލަމުން ސީމާގެ ފަޔާ ވީ ފަރާތުގައެވެ. ވަށައިގެން ކުރަހާފައިވާ އަކަތަކަށް ލަތީފާ ނަޒަރު ހިންގާލުމަށްފަހު މުށްކަވާ ބާރުކޮށްލިއެވެ. އޭނާގެ ހިތުގެ ވިންދު އަވަސްވަމުން ދިޔައީ އިންތިހާއަށެވެ. ލަތީފާގެ ނިތްކުރިން ދާތިކީގެ އަސަރު ފާޅުވަމުން ދިޔައެވެ.
އިބްޒީމާ ތުންތަޅުވާލުމަށްފަހު ފުޅިއަކަށް އަތްލުމަށްފަހު އޭގެން ނެގި އަޅިކުލައިގެ ކުނޑިތައް ސީމާއާ ދިމާއަށް ބުރުވާލިއެވެ. ހަމައެއާއެކު ސީމާގެ ހަށިގަނޑު މަޑުމަޑުން މައްޗަށް އުފުލެން ފެށިއެވެ. ލައިގެން ހުރި ހެދުން ތިރިއަށް އެލިފައި އޮތް އިރު އޭނާގެ ހަށިގަނޑު އޮތީ އުޑަކުބިމަކު ނުޖެހިކަން އެނގެއެވެ. އިބްޒީމާ ތުންތަޅުވާލުމަށްފަހު އަނެއްކާވެސް އެ ފުޅިން ކުނޑިތަކެއް ސީމާއާ ދިމާއަށް ބުރުވާލިއެވެ.
ބަންލާފާ ސީމާގެ ހަށިގަނޑު ތަޅުންމައްޗަށް ވެއްޓިޖެހުމުން އެންމެންނަށް ސިހުންވިއެވެ. ހަމަ އެދަނޑިވަޅުގައި މުޅިތަނަށް އަނދިރިކަން ވެރިވެގެން ދިޔައީ އެތަނުގައި ހުރި އުއްބައްތިތައް ނިވުމުންނެވެ. ބިރުގެންފައިވުމުން ލަތީފާއަށް ޝާކިރުގެ އަތުގައި ހިފާ ބާރުކޮށްލިއެވެ. "ކިހިނެއް އެވީ؟.. ކޮބާ ސީމާ؟.."ލަތީފާގެ އަތުގައި ހިފާލަމުން ޝާކިރު ވާހަކަ ދެއްކީ މަޑުމަޑުންނެވެ. "މިތާ މަޑުކުރޭ.. އަހަރެން އެބައަންނަން އަލިކުރާނެ އެއްޗެއް ހިފައިގެން" ޝާކިރު ކޮޓަރިން ނިކުމެގެން ދިއުމުން ލަތީފާ ފުންނޭވާތަކެއް އެތެރެކުރަން މަސައްކަތް ކުރަމުން ދިޔައީ މީހާ ހަމައަކަށް އެޅޭތޯއެވެ.
ތަނެއް ނުފެންނަވަރަށް ކޮޓަރިތެރެވަނީ އަނދިރިވެފައެވެ. ޟިރާރު އަތުގައި އޮތް ލައިޓަރު ނަގާ ދެބުރަކަށް އަޅާލުމާއެކީ އޭގެ ހުޅު ރޯވިއެވެ. ޟިރާރު ބަލާލީ ސީމާ އޮތް ދިމާއަށެވެ. ދެލޯ ތަންމިނަށް ހުޅުވާލަމުން ޟިރާރަށް ފަހަތަށް ޖެހެވުނީ އޭނާގެ ކުރިމަތީގައި ސީމާ އިން ގޮތުންނެވެ. މޫނުމައްޗަށް އިސްތަށިތައް ވެއްޓިފައި ހުރިއިރު އޭނާ އިނީ އިށިނދެގެން ޟިރާރާ ދިމާއަށް ދެލޯ ބޮޑުކޮށްގެން ބަލާށެވެ. އާދަޔާ ޚިލާފަށް ސީމާގެ ކަޅި ބޮޑުވެފައި ހުރިހެން ވެސް ހީވިއެވެ.
ޓޯޗް ބައްތިއެއް ހިފައިގެން ޝާކިރު އައިސް ކޮޓަރިއަށް ވަނުމުން އޭނާވެސް ދިޔައީ ސިއްސައިގެންނެވެ. ސީމާ އިން ގޮތުންނެވެ.
"ސީމާ...." ސީމާއަށް ގޮވާލިއިރު ލަތީފާގެ އަޑުގައި ތުރުތުރެއް އެކުލެވިފައިވިއެވެ.
"ލަތީފާ... ކަލޭ ހިމޭނުން އިނދޭ... މީ ކީއްކުރަން ކަލޭ ގެނައި މީހުންނެއް..." ސީމާގެ އަޑު ވަނީ ބަދަލުވެފައެވެ. އޭނާގެ އަޑުގައި ބަރުކަމެއް ވީ އިރު ދެމީހެއްގެ އަޑު އެއްވެފައިވާ ކަހަލައެވެ. އޭނާ ހަތަރު މޮށްގޮނޑުޖަހާ އިށީދެގެން އިނދެ ވަށައިގެން ކޮޓަރިތެރެއަށް ބަލާލިއެވެ. އަދި ޟިރާރާ ދިމާއަށް އޭނާ ދާން މަސައްކަތް ކުރިއެވެ. ވަށައިގެން ކުރަހާފައިވާ ބުރުން ބޭރަށް އޭނާއަށް ނިކުމެވޭ ގޮތެއް ނުވިއެވެ. ދެން ފަހަތަށް ޖެހުމަށްފަހު އޭނާގެ ރަތް ދެލޮލުން އިބްޒީމާއާ ދިމާއަށް ބަލާލިއެވެ. ދެލޯ މަރައިގެން ހުރެ އިބްޒީމާ ތުންތަޅުވަމުން ދިޔައެވެ.
"ހަ**ކުޑަ ލަ*ކުޑަ... ކަލޭ ކީއްކުރަން މިތާ ތިހުރީ... މާ މޮޅު މީހަކަށް ވެގެން އެބައުޅެއްޔެއްނު... ކަލޭގެ ދުވަސް ދުއްވާލާނަން.. މީ ކަލޭމެންނާ ބެހޭވެސް ކަމެއް ނޫނެއްނު.. ބަލަ މީ މަގޭ ޕާސަނަލް ކަންކަމޭ.. އަޑު އިވިއްޖެތަ.. މީ މަގޭ ޕާސަނަލް ކަންކަން... ކަލޭމެން ނުޖެހޭނެ މި ކަންތަކާ ބެހޭކަށް... މިތަނުން ރައް*ވޭ.." ޝަހާދަތް އިނގިލި އިބްޒީމާއާ ދިމާއަށް މަޅަމުން ސީމާ އަޑުގަދަކޮށް ހަޅޭއްލަވަމުން ދިޔައީ ކަމަކާ ހިތްހަމަނުޖެހިފައި ހުރެއެވެ. ވާހަކަ ދައްކާ ނިންމާލުމަށްފަހު އިބްޒީމާއާ ދިމާއަށް ސީމާ ކުޅެއް ޖެހިއެވެ.
ދެލޯ ބޮޑުކޮށްލަމުން ސީމާއާ ދިމާއަށް އިބްޒީމާ ބަލާލީ ރުޅި އައިސް ރަތްވެފައި ހުރެއެވެ. ފުޅިތެރެއަށް އަތްލުމަށްފަހު ކުނޑިތަކެއް ނަގާ ސީމާއާ ދިމާއަށް ބުރުވާލީ އެއްޗެހި ކިޔަމުންނެވެ.
"އޭ މާ ފުއްޕަން ނަހަދައްޗޭ... ފާޑުފާޑު ދައްކަންޏާ އެއްފަހަރުން ކަލޭ އަންދާލަފާނަން.. މައިތިރި ވެގެން ހުރޭ..."
(ނުނިމޭ)
