"އަޒީމް އެންމެ ފަހުން ގުޅީ ކޮންއިރަކު..." ރިޔާޒް ހިތްއަވަސްވެފައިވީ ނަމަވެސް އޭނާ ބޭނުންވީ ހަމަޖެހޭށެވެ.
"ދެހަފްތާ ކުރި އެއީ.. ޝްޝް.. ވާހަކަ ނުދައްކައްޗޭ.. އެބަ ރިންގްވޭ..." ކަންފާތާ ފޯނު ގާތްކޮށްލަމުން އަސްރާރް ބުނި ޖުމްލައިން ރިޔާޒް މަޑުކޮށްގެން އިނީ އެދެމެދުގައި ދެކެވޭ ވާހަކަތައް އަޑުއަހާ ހިތުންނެވެ.
*** *** *** *** *** ***
ފެންވަރައިގެން އަޒީމް ކޮޓަރިން ބޭރަށް ނިކުތް އިރު މަންޝާ ބޭރުގައި ހުރި ތަން ފެނުނެވެ. މާ ބޮޑު ފަރުވާލެއް ނުބަހައްޓާ ލައިގެން ހުރި ގަމީހުގެ ގޮށްތައް އަޅުވަމުން އަޒީމް މިސްރާބުޖެހީ އެގެއިން ބޭރަށް ނިކުންނާށެވެ. ގޭގެ އޮޅިގަނޑު ގިރާ ނުކުރެވެނީސް އަޒީމްގެ ފޯނު ރިންގްވުމުން ފިޔަވަޅު މަޑުކޮށްލީ ޖީބުގައިވާ ފޯނު ނަގާ ޑިސްޕްލޭއަށް ބަލާލަމުންނެވެ. އަސްރާރްގެ ކޯލެއް ކަމުން ކަންފަތުގައި ފޯނު ޖަހައިގެން ހުރެ އަޒީމް ގޯތިތެރެއިން ބިއްދޮށް ފަރާތަށް ޖެހިލީ އެތަނުން ޖޯއްޔެއްގައި ހަމަޖެހިލައިގެން އޮވެ ވާހަކަ ދައްކާށެވެ.
"ހަލޯ... އަސްރާ.. ކިހިނެއްތަ؟..." ޖޯއްޔަށް ފޫތިރިކޮށްލަމުން އަޒީމް ވާހަކަ ދެއްކީ ވަރަށް ހިނިއައިސް ހުރެއެވެ.
"އަލްޙަމްދު ލިއްލާހި... ރަނގަޅު. އަޒީމް ކިހިނެއް؟ ކޮބާ މަންޝާގެ ހާލަކީ؟" އަސްރާރް ސުވާލުކޮށްލީ މިހާރު މަންޝާގެ ހާލަތު އޮޅުން ފިލުވުމުގެ ބޭނުމުގައެވެ.
"އަހަރެމެން ރަނގަޅު... އީދުގަ ރަށަކަށް ޖައްސާނުލަންތަ؟.." ޖޯލީގައި ހަމަޖެހިލައިގެން އޮވެ އަޒީމް ވާހަކަ ދައްކަމުން ދިޔައިރު އޭނާ އޮތީ އެއްއަތުން ބޮލުގެ އިސްތަށިގަނޑާ ކުޅޭށެވެ.
"މާލޭގަ މިހުރީ.. ދެން އިނގެޔެއްނު މަށަކީ ތިބުނާހެން އީދުގަ މަޖާކޮށް ހަދާ މީހެއް ނޫނެއްނު... ހޫން ތިވާހަކައެއް ނޫނޭ... މަންޝާ ރަނގަޅުތަ؟ އޭނައަށް ހަމަ އެއްވެސް ކަމެއް ނުވޭތަ؟..." އަސްރާރްގެ ވާހަކަތަކުން ފާޅުވަމުން ދިޔަ އަބުއިކަމުން އަޒީމް ހައިރާންވިއެވެ.
"މަންޝާ ހަމަ ބަރާބަރު.. ބައްޔެއް ވެސް ނޫން. ގަދަ ބަދަވި... ކިހިނެއްވީ..." ވެގެން އުޅޭ ގޮތެއް އަޅުން ފިލުވަން ބޭނުންވެފައި ހުރި ވަރުން އަޒީމަށް އަހާލެވުނެވެ.
"ކަމެއް ނުވޭ.. ކުރިން ދުވަހަކު އަޒީމް ގުޅިން ދޯ..." އަސްރާރް އަދިވެސް ބޭނުންވީ އަޒީމް ދައްކަމުން ދިޔަ ވާހަކަ ޔަގީން ކުރާށެވެ.
"އަހަރެން.. އަހަރެން ކޮން އިރަކު އަސްރާއަށް ގުޅީ.. ނުގުޅަން... މިރޭ މިރަށުގަ އޮންނަ އީދު ކުޅިވަރު ބަލަން މި ދަނީ.. ދެން ބޭއްވީއޭ..." އަޒީމް ފޯނު ބޭއްވުމަށްފަހު ބޯ ކަހާލިއެވެ. އަސްރާރް އެދެއްކި ވާހަކަތަކުން އޭނާގެ ސިކުނޑިއަށް ހާސްކަމެއް ވެރިވެގެންދިޔަ ކަހަލައެވެ. އަޒީމް ކަމަށް ހީކޮށް އެހެން މީހަކާ އަސްރާރް ވާހަކަ ދެއްކުމަކީ ވެސް ވެދާނެ ކަމެކޭ އަޒީމްގެ ހިތަށް އެރީ އޭނާގެ ނުކުޅެދުންތެރިކަން ހިތަށް ވެރިވުމުންނެވެ. ޖޯލިން ތެދުވެ ލައިގެން ހުރި ގަމީސް ރީތިކޮށްލުމަށްފަހު އަޒީމް މިސްރާބުޖެހީ ކުޅިވަރުތައް އޮތް ހުސް ބިމާ ދިމާއަށް ދާށެވެ.
*** *** *** *** *** ***
ދަންވަރު އެކެއްޖަހާ ބޮޑުވިފަހުން ޝީން ގެއަށް އައިސް ވަނީ ހޫދާ އެކީގައެވެ. ގޭތެރެއަށް ނަޒަރު ހިންގާލަމުން ހޫދު ބޭރުގައި މަޑުކުރީ ދަންވަރުގެ ވަގުތަކަށްވުމުން ގޭތެރެއަށް ވަނުން ރަނގަޅު ނޫންކަން އިހްސާސްވުމުންނެވެ. މަޑު ހިނގުމެއްގައި ގޭތެރެއަށް ވަދެ ޝީން ފަސްއެނބުރި ބަލާލީ ލުއި ހިނިތުންވުމަކާ އެކީގައެވެ. އެއްއަތުން އަތް ހަނާ އަޅަމުން ޝީން އެތެރެއަށް ވަންނަން ހިނގައިގަތީ ހޫދުވެސް ގެއަށް ދާން މިސްރާބު ޖެހުމުންނެވެ. ބޭރު ދޮރާށި ލައްޕާލުމަށްފަހު މަޑުމަޑުން ޝީން ހިނގާފައި ދިޔައީ އޭނާގެ ކޮޓަރިއަށް ވަންނާށެވެ. ހިތްހަމަޖެހުމުގެ ނޭވާއެއް ބޭރުކޮށްލުމަށްފަހު ދޮރުގައި ލައްވެލިއެވެ. ހޫދުގެ މަޑުމައިތިރި މިޒާޖާ ރީތި ސިފަތައް ޝީންއަށް ވަރަށް ކަމުދިޔައެވެ. މޭގައި އަތް އަޅާލަމުން އަވަސްވެފައިވާ ނޭވާތައް ހަމައަކަށް އަޅުވަން އޭނާ މަސައްކަތް ކުރިއެވެ.
ދަންވަރު ދޭއް ޖެހުމާއެކު ގޭތެރޭގައި ހުރި ބޮޑުގަޑިން ރަނގަބީލް ޖެހި އަޑަށް މަންޝާ ދެލޯ ހުޅުވާލިއެވެ. ހުއްޓިފައިވާ ފަންކާއާ ދިމާއަށް ބަލަން އޮތުމަށްފަހު އެނދުން ތެދުވެ އިސްތަށިގަނޑު އެއްކޮށްލާ މަންޝާ ހުޅިއެއް ޖަހާލިއެވެ. މަޑުހިނގުމެއްގައި ގޮސް ދޮރު ހުޅުވާލުމަށްފަހު ގެއިން ބޭރަށް މަންޝާ ނިކުމެ ބޭރުބަލާލިއެވެ. ކޮންމެވެސް ވަރަކަށް ވާރޭ ވެހިފައި ވުމުން ޖެހެމުން ދިޔަ ވައިރޯޅީގައި އާދަޔާ ޚިލާފް ފިނިކަމެއް އެކުލެވިފައިވެއެވެ. އެ ހަމަހިމޭން ދަންވަރުގެ ވަގުތުގައި ހިތްހަމަޖައްސާލަން މަންޝާ މިސްރާބުޖެހީ އަތިރިއާ ދިމާއަށެވެ.
ގޮނޑުދޮށާ ހަމައަށް ދެވުނުއިރު މަންޝާ ހުރީ އިންތިހާއަށް ހީކަރުވާފައެވެ. ދެއަތްދެއަތާ ހާކާލަމުން ހަށަންބަނދެލީ އިހްސާސްވަމުން ދިޔަ ފިނިކަމުން އަރާމެއް ހޯދާށެވެ. އަތިރިމަތީ ހުރި ޖޯލިފަތިން ޖޯއްޔެއްގައި މަންޝާ އިށީންނަމުން ވަށައިގެން އެ ސަރަހައްދަށް ބަލާލިއެވެ.
މޫދުން އެއްގަމަށް އަރަމުން ދިޔަ ޒުވާނާއާ ދިމާއަށް މަންޝާއަށް ބަލާލެވުނީ ހައިރާންކަމާ އެކުގައެވެ. މިހާ ދަންގަޑިއެއްގައި އެ ސަރަހައްދަށް މީހަކު މޫދަށް އެރެން އައިސް އުޅެދާނެ ކަމަކަށް މަންޝާ ހިއެއް ނުކުރެއެވެ. އެ ޒުވާނާއާ ދިމާއަށް ނުބަލަން މަންޝާގެ މޫނު އަނެއް ފަރާތަށް އަނބުރާލީ ލަދުރަކި ގޮތަަކަށެވެ. އެ ޒުވާނާއާ ދިމާއަށް މަންޝާ ނުބަލަން ހުރި ނަމަވެސް އެ ޒުވާނާ މަޑު ހިނގުމެއްގައި މަންޝާއާ ދިމާއަށް އަންނަކަން އެނގުމުން މޭގައި އަތް އަޅާލަމުން އޭނާއާ ދިމާއަށް ބަލާލީ ހިތްނުތަނަވަސްވާން ފެށުމުންނެވެ. އޭނާގެ ތުނި އިސްތަށިގަނޑުގައި އަތް ހާކަމުން އެއްގަަށް އަރައިގެން އައީ ސީދާ މަންޝާއާ ދިމާއަށެވެ. ލައިގެން ހުރި ހުދުކުލައިގެ ޝޯޓް ވަނީ އެ ޒުވާނާގެ ހަށިގަނޑުގައި ތަތްލާފައެވެ.
އެޒުވާނާ އައިސް އެ ޖޯލި ކައިރީ މަޑުކޮށްލުމުން މަންޝާ އިސްޖަހާލީ އެ ޒުވާނާއާ ވާހަކަދައްކަން ބޭނުން ނުވާތީއެވެ. ރަށުތެރެއިން ކޮންމެ މީހަކަށް ވެސް މަންޝާއަކީ މޮޔައެއް ކަމަށް ބުނެ ވާހަކަ ދައްކާތީ ނުދަންނަ މީހުންނާ ވާހަކަ ދައްކާ ހަދަން މަންޝާއަށް އުނދަގޫވެއެވެ. ޖޯލިފަތިމަތީ އޮތް ޓީޝާޓް ނަގާ ފޮޅާލަމުން އެ ޓީޝާޓް ގަޔަަށް މަހާލަމުން އެ ޒުވާނާ ދުރަށް ހިނގައިގަތީ ކޮނޑުމަތީ ޖިންސެއް އަޅުވާލައިގެން ހުރެއެވެ. ދުރުދުރަށްގޮސް ހުއްޓިގެން ހުރެ އެޒުވާނާ މަންޝާއާ ދިމާއަށް ބަލާލުމަށްފަހު މަޑުޖެހިލިއެވެ. އެކަން މަންޝާއަށް ފާހަގަވުމުން އެ ދިމާއަށް ބަލާލެވުނީ ބޭއިޚްތިޔާރުގައެވެ.
އެ ޒުވާނާ މަންޝާއާ ދިމާއަށް ބަލަމުން ދިޔައީ ތަފާތު ގޮތަކަށެވެ. އޭނާގެ ބެލުމުން މަންޝާއަށް އުނދަގޫތަކެއް ވަމުންދިޔައެވެ. އެ ޒުވާނާއާ ދިމާއަށް ބަލަންހުރުމަށްފަހު މަންޝާ ތެދުވެ ކުރިއަށް ފިޔަވަޅެއް އަޅާލެވުނީ މަންޝާގެ އިޚްތިޔާރުން ބޭރުގައެވެ. އޭނާ ލުއި ހިނިތުންވުމެއް ތުންފަތަށް ވެރިކުރުވަމުން މަންޝާއަށް ފުރަގަސްދެމުން ކުރިއަށް ހިނގައިގަތީ އެގޭ ބިއްދޮށުން ފެންނަން ހުރި ގަސްތަކާ ދިމާއަށެވެ. ދިގު އިސްކޮޅެއް ލިބިފައިވާ އެ ޒުވާނާގެ ބިޔަ ހަށިގަނޑަށް މަންޝާ ބަލާލަމުން އޭނާގެ ފަސްފަހަތުން ކުރިއަށް ހިނގައިގަތެވެ. ގަސްތަކުގެ ތެރެއަށް އެ ޒުވާނާ ވަންނަމުން ފަސްއެނބުރި މަންޝާއާ ދިމާއަށް ބަލާލިއެވެ. ގަސްތަކުގެ ތެރެއަށް ވަންނަމުން މަގުގެ ދެފަރާތަށް މަންޝާ ބަލާލީ އެހިސާބުން މީހަކު ފެންނަން ހުރިތޯއެވެ. ފުން ނޭވާއެއް ބޭރުކޮށްލުމަށްފަހު އެޒުވާނާ ދިޔަ ދިމާއަށް ދާން އެނާ އަވަސްވެގަތެވެ.
ގަސްތަކުގެ ގޮފިތައް އަތުން އެއްފަރާތް ކުރަމުން މަންޝާ ކުރިއަށް ހިނގައިގަތެވެ. ބިޔަކޮށް ހެދިފައިވާ ގަސްތަކުގެ ތެރެއިން ހިނގޭވަރުގެ މަގެއް އޮތެވެ. ހިކިފަތްތައް މަތިން ހިނގަމުން މަންޝާ ކުރިއަށް ދިޔައީ ދެ ހިޔާލެއްގައި ހުރެއެވެ. ތަންކޮޅަކަށް ދެވުމުން މަންޝާއަށް ދުންފިނިކަމުގެ އަސަރު ފާޅުވާން ފެށުމުން ވަށައިގެން ބަލާލެވުނެވެ. ދުރުން ފެންނަން ހުރި ނިކަގަސް ފެނުމުން އެދިމާއަށް މަންޝާއަށް ދެވުނީ އެތަނަށް އެޒުވާނާ ދިޔަހެން ހީވުމުންނެވެ. ނިކަގަސް ކައިރީ މަޑުކޮށްގެން ހުރި ޒުވާނާއާ ހަމައަށް މަންޝާއަށް ދެވުމުން އެޒުވާނާ މަންޝާއާ ދިމާއަށް ބަލާލިއެވެ. މަޑުމަޑުން މަންޝާގެ އަތުގައި ހިފާލިއެވެ.
މަންޝާގެ ސިކުނޑި ތެރެއިން ދެން އިވެން ފެށީ ބައިވަރު މީހުންތަކެއް ވާހަކަ ދައްކާ އަޑެވެ. ބޮލުގައި ހިފަހައްޓައިގެން ހުރެ މަންޝާ ދެލޯ މަރާ ބާރުކޮށްލިއެވެ. އެކި މީހުން ދައްކަމުން ދިޔަ ވާހަކަތަކަށް ސަމާލުކަން ދެމުން ދިޔަ ނަމަވެސް އެއިން އެއްވެސް އަޑެއް ސާފުވާ ގޮތެއް ނުވިއެވެ. ދެލޯ ހުޅުވާލަމުން ކުރިމަތީ ހުރި ޒުވާނާއާ ދިމާއަށް މަންޝާ ބަލާލިއެވެ. މަންޝާގެ ބޮލުގައި އުފެދެމުން ދިޔަ ގަދަ ރިހުމާއެކީ ލޯމައްޗަށް ފުސްވަމުން ދިޔަކަން މަންޝާއަށް އެނގުނެވެ. އެހެންކަމުން މަންޝާގެ ކުރިމަތީގައި ހުރި މީހާ މަންޝާއަށް ސާފުވާ ގޮތެއް ނުވިއެވެ. އެ ޒުވާނާ މަންޝާގެ ބަނޑުގައި ފިރުމާލުމުން މަންޝާ އިސްއޮބާލީ ބަނޑާ ދިމާއަށް ބަލާލާށެވެ. މަންޝާގެ ބަނޑުގައި ކުޑަ ރިހުމެއް އުފެދެމުން ދިޔަަން އެނގުނެވެ. ނުވަމަހަށް ދާވަރުގެ ބޮޑު ބަނޑެއް ހުރުމުން މަންޝާގެ ލޮލުން ކަރުނަ ނީރާލިއެވެ. އިސްއުފުލާލަމުން ކުރިމަތީ ހުރި ޒުވާނާއަށް ބަލާލި ވަގުތު ލޮލަށް ގަދަ އަލިކަމެއް އެޅުމުން މޫނުމައްޗަށް ދެއަތް ހުރަސްކޮށްލެވުނެވެ.
*** *** *** *** *** ***
ކައިރިން ކުޑަކުއްޖަކު ކުކުރާލި އަޑު އިވުމާއެކީ ޒިބާން އެކުދިން ނަގާ އުރާލިއެވެ. އަދި ކުރިމަތިން ފެންނަން ހުރި ގަދައައްޔާ ދިމާއަށް ބަލާލަމުން އެދިމާއަށް އެއްއަތް ދިއްކޮށްލިއެވެ. އެ އަލިކަމުގެ ތެރެއިން އެ ފެންނަނީ އަންހެނެއްކަން ޒިބާންއަށް ދެނެގަންނަން އެނގުނެވެ. އެއަލިކަމުގެ ތެރެއަށް ޒިބާންގެ އަތް ދިއްކޮށްލުމުން އޭނާގެ އަތުގެ އިނގިލިތަކަށް ތޫނު ތަދެއްވުމުން އަތް ދަމައިގަތެވެ. ފިހުނީމަ ހުންނަ ގޮތަށް އިނގިލިތަކުގެ ކޮޅުގައި ފޮޅުއްލާފަ ހުރިތަން ފެނުންމުން ޒިބާން ދެބުމަ ގޮށްޖަހާލިއެވެ. އެއަންހެންމީހާ ކުރިއަށް ފިޔަވަޅުއަޅަމުން އައީ ޒިބާން އަތުގައި އޮތް ކުއްޖާއާ ދިމާއަށް އަތް ދިއްކުރަމުންނެވެ. އޭނާ އެއްޗެހިތަކެއް ކިޔާހެން ހީވި ނަމަވެސް އެކިޔާ އެއްވެސް އެއްޗެއް ޒިބާނަށް ސާފެއް ނުވިއެވެ.
ޒިބާންގެ އަތަށް އެވަރުގެ އަނިޔާއެއް ލިބުނުއިރު ކުއްޖާއަށް ވެދާނެ ގޮތަކާ ދޭތެރޭ އޭނާއަށް ވިސްނާލެވުނެވެ. އެހެންކަމުން ޒިބާން ނިންމީ އެތަނުން ދުރަށް ދާށެވެ. ކުއްޖާ އުރާލައިގެން ހުރެ ގެއާ ދިމާއަށް މިސްރާބުޖަހަމުން އޭނާގެ ހަށިގަނޑުން ބިމުން މައްޗަށް އުފުލާލިއެވެ. މައްޗަށް އަރައިގެން ދިޔައިރު ޒިބާންގެ ހިތަށް ބުނެދޭން ނޭނގޭ ކަހަލަ އުނދަގޫތަކެއް ވަމުންދިޔައެވެ. މޭގައި އަތް އަޅާލަމުން ތިރިއަށް ބަލާލީ ޒިބާންއާ ދިމާއަށް އަތްދިއްކޮށްގެން ހުރި އަންހެންމީހާއާ ދިމާއަށް ބަލާށެވެ. ވަކި ހިސާބަކަށް ދެވުމުން ޒިބާނަށް އެ އަންހެންމީހާގެ ސޫރަ ފާޅުވާން ފެށިއެވެ. އަލިކަމުގެ ތެރެއިން އެ ފަން ދިގު އިސްތަށިގަނޑާ ކަރުނައިން ފުރިފައިވާ ދެލޯ ފެނުމާއެކީ އެއީ މަންޝާކަން ޒިބާނަށް އެނގުނެވެ.
"މަންޝާ.."
ޒިބާން އަނބުރާ ބިމަށް ފައިބަން މަސައްކަތް ކުރިއެވެ. އެތައް ދުވަހަކަށްފަހު އޭނާގެ ހިތްއެދޭ ލޯބިވެރިޔާ ފެނުމުން ދުރުގައި ހުންނަން އޭނާ ބޭނުމެއް ނޫނެވެ. ބާރު މިނުގައި އައި ޒިބާންގެ ހަރަކާތް ހުއްޓުނީ ނޭނގޭ ބާރަކަނުން އޭނާއާ މަންޝާގެ ދެމެދުގައިވާ ހުރަހެވެ. އޭރު ޒިބާންއާ މަންޝާއާ ދެމެދުގައި ނުފެންނަ ފަށަލައެއް ވަނީ ލެވިފައެވެ. އެ ފަށަލަ ފޫއަޅުވާފަ ޒިބާނަށް މަންޝާއާ ހަމައަށް ދެވޭ ގޮތެއް ނުވިއެވެ. މުށްކަވާފައިވާ އަތުން އެ ފަށަލައިގައި ތަޅަމުން ޒިބާން ހަޅޭއްލަވައިގަތެވެ.
"މަންޝާ...... މަޑުކުރޭ... މަންޝާ..."
މަންޝާ ބިމަށްތިރިވެ މޫނުގައި އަތްއަޅާ ރޯން ފެށިއެވެ. އެމަންޒަރު ބަލާކަށް ޒިބާންގެ ހިތަކަށް ކުޅަދާނައެއް ނުވިއެވެ. ގައި ހުރި ބާރެއްލާ އެ ފަށަލަ ފޫއަޅުވާލަން އޭނާއަށް ކުރެވުނު ހުރިހާ މަސައްކަތެއް ކުރަމުން ދިޔައިރު އެފަށަލައިގައި ކޮންމެފަހަރަކު ރެދަންހެން ވިދުމެއް އަރައިގެން ދެއެވެ. އަތުގައި އޮތް ތުއްތު ކުއްޖާގެ މޫނަށް ޒިބާން ބަލާލުމަށްފަހު އެކުއްޖާގެ މޫނުގައި ފިރުމާލިއެވެ. "ޒޯއީ.. ބައްޕައަށް މައާފް ކުރޭ..." ޒިބާންގެ ލޮލުން ފައިބަމުން ދިޔަ ކަރުނަތައް ވެއްޓުނީ އެ ތުއްތު ޒޯއީގެ މޫނަށެވެ. ކައިރިން ގަދަ އަލިކަމެއްވުމުން ޒިބާން ވަށައިގެން ބަލާލިއެވެ. ހުދު ހެދުމުގައި ތިބި ހަތަރު މީހަކު ޒިބާނާ ޒޯއީ ގޮވައިގެން މައްޗަށް އުދުއްސައިގަތުމުން ޒިބާން ގަދަހަދަން ފެށިއެވެ. މަންޝާގެ ނަމުން ގޮވާ ހަޅޭއްލަވަމުން ދިޔައެވެ.
އޭރުވެސް މަންޝާ އަޑުން އަޑުނަގާ ރޮނީއެވެ." މަގޭ ދަރި ގެނެސްދީ... މަގޭ ދަރިއާ ނުލާ ނޫޅެވޭނެ... ހެޔޮނުވާނެ..."
*** *** *** *** *** ***
ނިދިފައި އޮތް ނައުރީނަށް ހޭލެވުނީ އަޒީމް އައިސް ގޮވާލުމުންނެވެ. ދެލޯ އުނގުޅަމުން ނައުރީން ތެދުވެ އަޒީމާ ދިމާއަށް ބަލާލީ ލުއި ހިނިތުންވުމަކާ އެކީގައެވެ. އެނދު ކައިރީ ހުރި އަލަމާރީގެ ވަތްގަނޑުތައް ހާވަމުން ދިޔައިރު އަޒީމްގެ މޫނުމަތިން ފެންނަމުން ދިޔައީ ހާސްކަމާއި ނުތަނަވަސްކަމެވެ. ބަންލާފަ ވަތްގަނޑު ލައްޕާލުމުން ނައުރީން ތެދުވެ އެނދުގައި ހަމަޖެހިލިއެވެ.
"ކިހިނެއްވީ.. ކޯއްޗެއް ތިހޯދަނީ؟.." ހޭވިފައިވާ އިސްތަށިތަކުގައި އަތްހާކަމުން ނައުރީން ވާހަކަދެއްކީ ވެގެންއުޅޭ ގޮތެއް އޮޅުން ފިލުވާށެވެ.
"ކޮބާތަ މަންޝާ ކޮޓަރީ ތަޅުދަނޑި... އޭނަ ރޯއަޑަށް މަވެސް މިހޭލީ.. ދޮރު ހުރީ ތަޅުލާފަ.." އަޒީމް އުނަގަނޑުގައި އަތް ވިއްދާލަމުން ޑްރެސިންޓޭބަލް މައްޗަށް ބަލާލިއެވެ. ނައުރީން އަވަސް ފިޔަވަޅުތަކެއްގައި ހިނގާފައި ގޮސް އަލަމާރި ހުޅުވާލުމަށްފަހު ހެދުންތަކުގެ ދޮށުގައި އޮތް ދެ ތަޅުދަނޑި ނަގާ އަޒީމް އަތަށް ދިއްކޮށްލިއެވެ. ތަޅުދަނޑީގައި ހިފުމާއެކީ އަޒީމް މިސްރާބުޖެހީ މަންޝާމެން ކޮޓަރިއާ ދިމާއަށެވެ.
ދޮރު ހުޅުވާލިއިރު މަންޝާ ހުރީ އެ ކޮޓަރި ކުޑަދޮރު ކައިރީ ތަޅުންމަތީ އިށީނދެގެންނެވެ. ދޮރުފޮތިގަނޑު ވަނީ ބިންމައްޗަށް ވެއްޓިފައެވެ. ފާރުގައި ތަޅަމުން މަންޝާ ރޮމުން ދިޔައީ ހުޅުވިފައިވާ ކުޑަ ދޮރާ ދިމާއަށް ބަލަމުންނެވެ. އަޒީމް ކުރިއަށް ފިޔަވަޅެއް އެޅުމުން އަޒީމްގެ އަތުގައި ނައުރީންއަށް ހިފަހައްޓާލެވުނެވެ. ފަސްއެނބުރި ނައުރީނާ ދިމާއަށް އަޒީމް ބަލާލީ ދެބުމަގޮށް ޖަހާލަމުންނެވެ. އަޒީމް ކައިރީ މަޑުކުރާށޭ ބުނެލުމަށްފަހު ނައުރީން ކޮޓަރިތެރެއަށް ވަދެގެން ގޮސް މަންޝާ ކައިރީ އިށީނެވެ. އޭރުވެސް މަންޝާގެ ރުއިމަަކަށް ބަދަލެއް ނާދެއެވެ. މަންޝާގެ ކޮނޑުގައި ހިފާލަމުން ނައުރީން ވާހާކަ ދެއްކީ ލޯތްބާ އެކީގައެވެ. "މަންޝާ ކިހިނެއްވީ.. ތަނަކަށް ތަދުވަނީތަ؟..."
"މަގޭ ދަރިފުޅު ގެންދިޔައީ... ނޫން... އަޅެ އޭނަ ގެނެސްދީ.. އަހަރެންނަށް އެކުއްޖާއާ ނުލާ ނޫޅެވޭނެ. އެހެންހަދާކަށް ނުވާނެއްނު... މަގޭ ދަރިއޭ އެއީ.... މަންމާ... އަހަރެންގެ ދަރި... އެކުއްޖާ އެ ރޮނީ.. އެހެން ނުހަދާ... އަހަންނާ އެކުއްޖާއާ ދުރުނުކުރޭ... ހެޔޮނުވާނެ އާދޭސްކޮށްފަ މިބުނީ.. މަގޭ ދަރި ގެނެސްދީ..." މޭގައި ދެއަތުން ތަޅަމުން މަންޝާ ރޮމުން ދިޔައިރު އޭނާއަށް ރަނގަޅަށް ވާހަކަ ދެއްކޭ ގޮތެއް ނުވިއެވެ. ރޮއިރޮއި ގިސްލެވިފައިވުމުން އޭނާ ވާހަކަ ދައްކަމުން ދިޔައީ ތަންތަންކޮޅަށް ހުއްޓަމުންނެވެ.
މަންޝާ ދައްކަމުން ދިޔަ ވާހަކަ އަޑުއަހަން ހުރި ނައުރީނަށް ލިބުނު ސިހުމާ އެކު އަޒީމާ ދިމާއަށް ބަލާލެވުނެވެ. މަޑު ހިނގުމެއްގައި ހުރެ އަޒީމް ކުރިއަށް އައިސް މަންޝާ ކައިރިއަށް ހުއްޓުނެވެ. މަންޝާ ދައްކަމުން ދިޔަ ވާހަކަތައް އެއް ރާގަކަށް އަޒީމްގެ ކަންފަތް ބުޑުގައި ގުގުމަމުން ދިޔަ ކަހަލައެވެ.
"މަންޝާ.. ކީކޭ ތި ކިޔަނީ؟..."
(ނުނިމޭ)
