ފައިސަލް މިސްކިތަކީ ޕާކިސްތާނުގެ ވެރިރަށް އިސްލާމްއާބާދުގައި ބިނާކޮށްފައިވާ އެ ގައުމުގެ ގައުމީ މިސްކިތެވެ. އިސްލާމްއާބާދުގެ ފަރުބަދަމަތީ ސަރަހައްދެއްގައި ބިނާކޮށްފައިވާ ފައިސަލް މިސްކިތަކީ ސައުދީ އަރަބިއްޔާގެ ރަސްގެފާނު ފައިސަލް ބިން އަބްދުލް އަޒީޒުގެ ނަމުން ނަން ދީފައިވާ މިސްކިތެކެވެ.
މި މިސްކިތް ބިނާކުރުމުގެ ވާހަކަ އެންމެ ފުރަތަމަ ދެކެވުނީ 1966 ވަނަ އަހަރު ސައުދީ އަރަބިއްޔާގެ ރަސްގެފާނު ފައިސަލް ޕާކިސްތާނަށް ކުރެއްވި ރަސްމީ ދަތުރުފުޅުގައެވެ. މި ދަތުރުފުޅުގައި މަޝްވަރާކުރެވުނު ކަންތައްތަކުގެ ތެރޭގައި އިސްލާމްއާބާދުގައި ގައުމީ މިސްކިތެއް އެޅުމަށް ޕާކިސްތާން ސަރުކާރަށް ސައުދީ އިން އެހީތެރިވުމުގެ މަޝްވަރާކުރެވިގެން ދިޔައެވެ.
ފައިސަލް މިސްކިތް ބިނާކުރުމަށްޓަކައި 1969 ވަނަ އަހަރު ބައިނަލްއަގްވާމީ މުބާރާތެއް ބޭއްވިއިރު، އެ މުބާރާތުގައި 17 ގައުމެއްގެ އާކިޓެކްޓުން ވަނީ 43 ޕްރޮޕޯސަލް ހުށަހަޅާފައެވެ. މި މުބާރާތުގެ އެއްވަނަ ހޯދި ތުރުކީގެ އާކިޓެކްޓް ވެޑަތު ޑަލޯކޭ ފަރުމާކޮށްފައިވާ މި މިސްކިތަކީ ޒަމާނީ ޑިޒައިނާއެކު ބަދަވީންގެ ޓެންޓުތަކުން ނަމޫނާ ބަލައިގެން ޑިޒައިން ކޮށްފައިވާ މިސްކިތެކެވެ.
މި މިސްކިތާ، މިސްކިތާ ގުޅިފައިވާ ސަރަހައްދުގެ މަގުތައް ތަރައްގީކުރުމަށް އެހީ ހަމަޖައްސައިދިނުމުގައި ރަސްގެފާނު ފައިސަލް އިސް ދައުރެއް އަދާކުރެއްވި އިރު މި މިސްކިތުގެ މަސައްކަތް ފެށިގެން ދިޔައީ 1975 ވަނަ އަހަރު ފައިސަލް އަވަހާރަވުމަށް ފަހުގައެވެ. އެހެންކަމުން މި މިސްކިތާއި އެ ސަރަހައްދުގެ މަގުތަކަށް ވަނީ ފައިސަލްގެ ނަމުން ނަންދީފައެވެ.
މިސްކިތް ބިނާކުރުމުގެ މަސައްކަތް 1976 ވަނަ އަހަރު ފެށިގެން ދިޔައީ ރަސްގެފާނު ފައިސަލް އަށް ފަހު ތަހުތާ ހަވާލުވެ ވަޑައިގެންނެވި ހާލިދު ރަސްގެފާނުގެ ވެރިކަމުގައެވެ. މި މިސްކިތުގެ ބިންގާ އެޅުއްވައިދެއްވީ ހާލިދު ރަސްގެފާނެވެ. މި މިސްކިތުގެ މަސައްކަތް ފަށާފައިވަނީ ޕާކިސްތާނުގެ ނޭޝަނަލް ކޮންސްޓްރަކްޝަން ލިމިޓެޑުން، އާޒިމް ޚާން އިސްކޮށް ހުންނަވައިގެން ސައުދީ އަރަބިއްޔާގެ ސަރުކާރުގެ އެހީއާއި އެކުގައެވެ. ފައިސަލް މިސްކިތުގެ މަސައްކަތް 1986 ވަނަ އަހަރު ނިމުނު ނަމަވެސް މި މިސްކިތުގައި ފުރަތަމަ ނަމާދުކުރީ ޖޫން 18، 1988 ގައެވެ.
މިސްކިތުގެ ހަތަރު ކަނުގައި 300 ފޫޓުގެ ދިގު 4 މުންނާރު ހުރި އިރު މިއީ ސައުތު އޭޝިއާގެ އެންމެ އުސް މުންނާރުތަކެވެ. ފައިސަލް މިސްކިތަކީ އެތެރޭގެ ހޯލާއި، ގޯތިތެރެ ހިމެނޭ ގޮތަށް މިސްކިތުގެ މައި ސަރަހައްދުގައި 74000 މީހުންނަށް އެއް ފަހަރާ އަޅުކަންކުރެވޭނެ ޖާގަ ތަނަވަސް މިސްކިތެކެވެ.
މި މިސްކިތަކީ މައި ސިޓީއަށް ވުރެ އުސް ފަރުބަދަމަތީ ސަރަހައްދެއްގައި ބިނާކޮށްފައިވާ މިސްކިތަކަށްވާއިރު، މިސްކިތުގެ ހުދުކުލައިގެ ވިދުން ވަރަށް ދުރަށް ފެނެއެވެ. މައި ސިޓީއާ ވީ ފަރާތަށް މިސްކިތް ބިނާކޮށްފައިވާއިރު ފަހަތަށް ފެހިކަން ގަދަ ގަސްތަކާއި ފަރުބަދަތައް ފެނުމުން މިސްކިތުގެ ރީތިކަމަށް އިތުރު ފުރިހަމަކަމެއް ގެނެސްދެއެވެ.
މި މިސްކިތުގައި ގާތްގަނޑަކަށް 300،000 މީހުންނަށް އެއްފަހަރާ ނަމާދުކުރެވޭ އިރު މިއީ ޕާކިސްތާނަށް ޒިޔާރަތްކުރާ ފަތުރުވެރިންގެ މެދުގައި މަގުބޫލު މަންޒިލެކެވެ. ފައިސަލް މިސްކިތަކީ 1986 ވަނަ އަހަރުން ފެށިގެން 1993 ވަނަ އަހަރާ ހަމައަށް ދުނިޔޭގެ އެންމެ ބޮޑު މިސްކިތެވެ. މި މިސްކިތަކީ އިސްލާމީ އާކިޓެކްޗާގެ ޒަމާނީ ނުފޫޒު ފެނިގެންދާ މިސްކިތެކެވެ. އަދި މިއީ މިހާރު ދުނިޔޭގެ ހަވަނައަށް އެންމެ ބޮޑު މިސްކިތެވެ.
