ހުޅުމާލެ ދެވަނަ ފިޔަވަހީގައި ހުރި ހިޔާ ފްލެޓްގެ 5 ވަނަ ޓަވަރުގައި އަލިފާނުގެ ހާދިސާއެއް ރޭ ހިނގާފައިވާއިރު، މި ހާދިސާއާއި ގުޅިގެން އެޕާޓްމެންޓު 6 އަދި 7ގެ ފާހާނަ ބޭނުން ނުކުރުމަށް ހައުސިން ޑެވެލޮޕްމެންޓު ކޯޕަރޭޝަން (އެޗްޑީސީ) އިން އަންގައިފިއެވެ.
މިކަމާ ގުޅިގެން އެޗްޑީސީން ބުނީ ހިޔާ ޓަވަރު 5 ގައި ހިނގައި ދިޔަ އަލިފާނުގެ ހާދިސާ އާއި ގުޅިގެން އެޕާޓްމަންޓް 6 އަދި 7 ގެ މައި ހޮޅިއައް ލިބިފައިވާ ގެއްލުން މަރާމާތު ކުރުމުގެ މަސައްކަތް އެ ކޯޕަރޭޝަނުން މިހާރު ކުރަމުން ދާކަމަށެވެ.
އެހެންކަމުން މި އެޕާޓްމެންޓުތަކުގެ ފާހާނަ ބޭނުން ނުކުރުމަށް އަންގާ އެޗްޑީސީން ބުނީ މި މަސައްކަތް ނިމުނުހާ އަވަހަށް އެކަން އަންގާނެ ކަމަށެވެ. އަދި މިކަމުގެ ސަބަބުން ދިމާވެދާނެ ދަތިތަކަށް މައާފަށް އެދޭކަމަށް އެ ކޯޕަރޭޝަނުން ވަނީ ބުނެފައެވެ.
ހިޔާ ޓަވަރު 5 ގައި ރޭގައި ހިނގާ ދިޔަ އަލިފާނުގެ ހާދިސާއާއި ގުޅިގެން އެ ޓަވަރުގެ 7 އެޕާޓްމަންޓެއްގެ 37 ފަރާތަކަށް އެންޑީއެމްއޭއިން ވަނީ ވަގުތީ ބޯހިޔާވަހިކަންވެސް ފޯރުކޮށްދީފައިވާކަމަށެވެ.
މި އަލިފާނުގެ ހާދިސާ ހިނގާފައި ވަނީ ހިޔާގެ 5 ވަނަ ޓަވަރުގެ 15 ވަނަ ބުރީގެ ވައިގޮޅީގައި ހަރުކޮށްފައި ހުރި އޭސީ އައުޓްޑޯ ޔުނިޓެއްގައެވެ. އެ ތަނުގައި ރޯވި އަލިފާނާ އެކު އެ ވައިގޮޅީގައި ހުރި ހުރޮހާހޮޅިތަކެއް ވަނީ އަނދާފައެވެ
