އިދިކޮޅު އެމްޑީޕީގެ ވަގުތީ ޗެއާޕާސަންގެ މަގާމަށް ބޭފުޅަކު ހޮވުމަށް ރޭ ބޭއްވި އެމްޑީޕީ ގައުމީ މަޖިލީހުގެ ޖަލްސާގައި ހޫނުވެ، އެމްޑީޕީ ތެރޭގައި ދެ ބަޔަކަށް މެންބަރުންތައް ބެހި ޒުވާބު ކޮށްފިއެވެ.
ވަގުތީ ޗެއާޕާސަންގެ މަގާމަށް ދެ ބޭފުޅަކު ވަނީ ކުރިމަތިލާފައެވެ. އެއީ ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދާއި އައްޑޫ ހިތަދޫ އުތުރު ދާއިރާގެ ކުރީގެ މެންބަރު މުހައްމަދު އަސްލަމްއެވެ. ވަހީދުގެ ނަން އައިސްފައި ވަނީ ކުރީގެ ރައީސް މުހައްމަދު ނަޝީދުގެ ފެކްޝަނުން ކަމަށް ވާއިރު އަސްލަމްގެ ނަން އައިސްފައި ވަނީ ކުރީގެ ރައީސް އިބްރާހިމް މުހައްމަދު ސޯލިހްގެ ފެކްޝަނުންނެވެ.
އެމްޑީޕީގެ ތެރޭގައި 2022ގައި ދެބަސްވުންތަކާއި ހިޔާލުތަފާތުވުން އައިސް އެމްޑީޕީ ދެބަޔަކަސް ބެހިފައި އޮތް އޮތުން އަދި ވެސް އޮތް ކަން ރޭގެ އެ ޖަލްސާއިން ފެނިގެން ވަނީ ގޮސްފައެވެ. އެގޮތުން ފުރަތަމަ ވޯތަށް އަހާފައިވަނީ ވަހީދުގެ ނަމަށް ކަމަށާއި ވާއިރު އޭނާއަށް ވަނީ 47 މެންބަރުން ވޯޓު ދީފައެވެ. ރޭ އެ ޖަލްސާއަށް 95 މެންބަރަކު ހާޒިރުވެފަިއވާ އިރު، ނަން ފާސްވާން 48 ވޯޓު ބޭނުންވެއެވެ. އެއް ވޯޓު މަދުވުމުން ދެން އަސްލަންގެ ނަން ހުށަހަޅަން އުޅުމުން މަސްލަހަތު ގޯސްވެ މެންބަރުން އަޑުގަދަކުރަން ފެށިއެވެ.
އެއްބައި މެންބަރުން ބުނާ ގޮތުގައި އަސްލަމަކީ ގައުމީ މަޖިލިހުގެ މެމްބަރަކަށް ނުވާތީ އޭނާ އަށް ޗެއާޕާސަންގެ މަސްއޫލިއްޔަތު އަދާ ނުކުރެވޭނެއެވެ. އެހެންކަމުން ވަގުތީ ޗެއާޕާސަންގެ މަގާމު ދިނުމަށް ނަގާ ވޯޓުގައި އަސްލަމްގެ ނަން ނުހިމެނޭނެ ކަމަށް ބުނެ މެންބަރުންގެ މެދުގައި ދެބަސްވުމަކަށް ވަނީ ގޮސްފައެވެ. އަސި އެ ަޖްލސާ ނިންމާލީ އަސްލަމްގެ ނަމަށް ވޯޓަށް ނާހައެވެ.
އެ ބައްދަލުވުން ނިމުނު ފަހުން ވެސް އިވެންޓް ހޯލްގެ ބޭރުގައި ވެސް އެމްޑީޕީގެ މެންބަރުންގެ މެދުގައި ވަނީ ހޫނު ޒުވާބުތަކެއް ހިނގާފައެވެ.
އެމްޑީޕީއަށް ވަގުތީ ޗެއާޕާސަންއެއް އައްޔަން ކުރަން ނިންމާފައި ވަނީ މެއި 14 ، 2022 ގައި އެމްޑީޕީގެ ޗެއާޕާސަންގެ މަގާމު ފުރުއްވަމުން ވަޑައިގެން ފައްޔާޒް އިސްމާއިލް މި މަހުގެ 24 ވަނަ ދުވަހު އެ މަގާމުން އިސްތިއުފާ ދެއްވުމުންނެވެ. ފައްޔާޒް އިސްތިއުފާ ދެއްވާފައި ވަނީ 2028 ވަނަ އަހަރުގެ ރިޔާސީ އިންތިހާބުގައި ވާދަކުރުމުގެ ޝައުގުވެރިކަން ފާޅުކޮށްފައި ވާތީ، އިސްސަފުގައި ޕާޓީގެ މަސައްކަތްތައް ކުރިއަށް ގެންދިއުމަށް ބޮޑެތި ގޮންޖެހުންތައް ހުރުމުން ކަމަށް އޭނާ ވަނީ ވިދާޅުވެފައެވެ.
