މި މަހުގެ 3 ވަނަ ދުވަހު އިދިކޮޅު އެމްޑީޕީއިން ބޭއްވި މުޒާހަރާއިން ހައްޔަރުކުރި 6 މީހުން ބަންދުން ދޫކޮށްލައިފިއެވެ.
"ލޫޓުވައިފި"ގެ ނަމުގައި ބޭއްވި އެ މުޒާހަރާއިން ހައްޔަރު ކުރި 6 މީހުންގެ ބަންދަން ކްރިމިނަލްކޯޓުން ވަނީ 15 ދުވަސް ޖަހާފައެވެ.
އެ މީހުންގެ ބަންދަން ކްރިމިނަލް ކޯޓުން ޖެހި 15 ދުވަހުގެ މުއްދަތު ހަމަވުމާއެކު ބަންދާމެދު ގޮތެއް ނިންމުމަށް 6 މީހުން ވެސް ވަނީ މިއަދު ކޯޓަށް ހާޒިރުކޮށްފައެވެ. އެއާއެކު ކޯޓުން މިއަދު ނިންމީ ޝަރުތުކުރުމަށްފަހު އެ މީހުން ދޫކޮށްލުމަށެވެ.
ކޯޓުން އެމީހުން ދޫކޮށްލާފައިވަނީ އެމީހުންގެ ބަޔާން ނަގާ ނިމިފައިވާތީ، ތަހުގީގަށް އެއްބާރުން ދިނުމަށް ޝަރުތުކުރުމަށްފަހުއެވެ.
ހައްޔަރުކުރި މީހުންގެ ތެރޭގައި ހިމެނެނީ:
- ރައްޔިތުންގެ މަޖިލީހުގެ ކުރީގެ މެންބަރު ޔާސިރު އަބްދުއްލަތީފު
- ރައްޔިތުންގެ މަޖިލީހުގެ ކުރީގެ މެންބަރު ޔައުގޫބު އަބްދުﷲ
- މާފުށީ ކައުންސިލްގެ ރައީސް ހަސަން ސޮލާހު
- އަލީ ޖުމާން
- އަޒްމީ އަލީ
- ހަސަން ޝާކިރު
އެ 6 މީހުން ވަނީ ފުލުހުންގެ ބަންދުގައި ހުރިއިރު ބަނޑުހައިހޫނު ކަމުގެ ހަޅުތާލެއްވެސް ކުރިއެވެ.
