ޗައިނާ އާއި ރާއްޖޭގެ ރަހްމަތްތެރިކަމުގެ ގުޅުމަކީ ދަގަނޑަށް ވުރެ ވަރުގަދަ، ޖީލުތަކަށް ދެމިގެންދާނެ ބްރިޖެއް ފަދަ ގުޅުމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޕީޕަލްސް ރިޕަބްލިކް އޮފް ޗައިނާ އުފެދުނު ދުވަހުގެ މުނާސަބަތުގައި ބާސެލޯގައި މިއަދު ބޭއްވި ހާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ޑރ. މުހައްމަދު މުއިއްޒު ވިދާޅުވީ، ތާރީހުގެ ތެރެއަށް ބަލައިލި ކަމުގައި ވިޔަސް އޮކްޓޯބަރު މަހުގެ 1 ވަނަ ދުވަހަކީ ހަމައެކަނި ތާރީހީ ދުވަހެއްގެ ގޮތުގައި ބެލެވޭކަށް ނެތް ކަމަށެވެ. އެއީ ގައުމެއްގެ އަލުން އުފަންވުން ރަމްޒުކޮށްދޭ އަދި އެ ގައުމެއްގެ ރައްޔިތުންގެ އިހްތިޔާރުން އެ ގައުމެއްގެ މުސްތަގުބަލު ބައްޓަން ކުރެވިދާނެ ގޮތް ހަނދާން ކޮށްދޭ ދުވަހެއް ކަަމަށް ރައީސް ވިދާޅުވިއެވެ. 76 އަހަރުގެ ތެރޭގައި ޗައިނާ ވަނީ ދަތި އުނދަގޫ ހާލަތްތަކުން އަރައިގަނެ، އެންމެ އިސްކޮށް ހަރަކާތްތެރިވާ އަދި ނުފޫޒުގަދަ ގައުމަކަށް ވެފައި ކަމަށް ރައީސް ވިދާޅުވިއެވެ.
ފަގީރުކަން ނައްތާލުމުން ފެށިގެން، ޓެކްނޮލޮޖީގެ ކުރިއެރުންތަކާ ހަމައަށް، ސިޓީތައް ގުޅުވާލާ ބްރިޖްތައް ބިނާ ކުރުމާއި، ދުނިޔެ ގުޅުވައިދޭ ސެޓެލައިޓް އުދުއްސާލުމާ ހަމައަށް، ޗައިނާގެ ދަތުރު އޮތީ ހަމައެކަނި ތަރައްގީއާ ގުޅިފައި ނޫން ކަމަށް ރައީސް ފާހަގަކުރެއްވިއެވެ. ޗައިނާއަކީ އަބަދުވެސް ރާއްޖެއާ ދުރުގައި އޮތް އެކުވެރި ގައުމަކަށް ވީ އިރު، ދެގައުމުގެ ގުޅުން ރަމްޒުކޮށްދެނީ ހަމައެކަނި އެއްބަސްވުންތަކާއި މުއާމަލާތްތަކުން އެކަނި ނޫން ކަމަށް ރައީސް ފާހަގަކުރެއްވިއެވެ.
މި ގުޅުން ބިނާވެފައި ވަނީ އިމާރާތްތަކުގެ މައްޗަކަށް ނޫން ކަމަށާއި، އެއްބަޔަކު އަނެއްބަޔަކަށް ކުރާ އިހްތިރާމާއި އެއްބައިވަންތަކަމުގެ މައްޗަށް ކަމަށް ރައީސް ވިދާޅުވިއެވެ. އެގޮތުން މި އެކުވެރިކަން މާލޭގައި ފެންނަމުންދާ އިރު، ބްރިޖާއި، އާއިލާތަކަށް ބޯހިޔާވަހިކަން ފޯރުކޮށްދޭ ގެތަކާއި، ޒުވާނުން މުސްތަގްބަލަށް ތައްޔާރުވަމުންދާ ކުލާސްރޫމުތަކާއި ޗައިނާގެ އެތައް ހާސް ޓޫރިސްޓުން ރާއްޖެއަށް ޒިޔާރަތް ކުރާ ފަތުރުވެރިންގެ ތެރެއިން ވެސް އެކަން ފެންނަން އެބަ އޮތް ކަމަށް ރައީސް ވިދާޅުވިއެވެ.
ހަލުވިކަމާއެކު ބަދަލުވަމުން އަންނަ ދުނިޔެއެއްގައި ދިރިއުޅުމަކީ ކިހާ ނާޒުކު ދިރިއުޅުމެއްކަން ޖަޒީރާ ގައުމެއްގެ ހައިސިއްޔަތުން ވަރަށް ރަނގަޅަށް އެނގިވަޑައިގަންނަވާ ކަމަށް ރައީސް ވިދާޅުވިއެވެ. މި ދަނޑީވަޅު ރާއްޖެއިން މަސައްކަތް ކުރަމުން މި ދަނީ ކަނޑުގެ ލޮނުގަނޑު އުފުލުމާއި، ދުނިޔޭގެ އިގުތިސާދަށް އަންނަ ބަދަލުތަކާއި، އަންނަން އޮތް ޖީލުތަކަށް ފައިދާ ހުރި ގޮތަށް ތިމާވެށި ހިމާޔަތް ކުރުމަށް ކަމަށް ރައީސް ވިދާޅުވިއެވެ.
މި ގޮންޖެހުންތަކާ ކުރިމަތިލުމުގައި ބޭނުންވަނީ ހަމައެކަނި ތަރައްގީގެ ބައިވެރިންގެ އިތުރުން ތަސައްވުރު ހިއްސާކުރާ ބައިވެރިން ކަމަށް ރައީސް ވިދާޅުވިއެވެ. ދެމެހެއްޓެނިވި ގޮތެއްގައި އިންސާފުވެރިކަމާއި އިންސާފުވެރިކަން ކުރިއެރުވުމުގައި ރާއްޖެއާއި ކުދި ޖަޒީރާ ގައުމުތަކަށް ޗައިނާއިން އަބަދުވެސް އެއްބާރުލުން ދެމުން އަންނަ ގައުމެއް ކަން ރައީސް ފާހަގަ ކުރެއްވިއެވެ. އަދި ތަރައްގީވަމުން އަންނަ ގައުމުތަކުގެ ހައްގުތަކަށް ވަކާލާތުކޮށް، ކިތަންމެ ކުޑަ ގައުމެއް ކަމުގައި ވިޔަސް، އެއްވެސް ގައުމެއް ބާކީނުވާ ދުނިޔެއެއް ބިނާކުރުމަށް މަސައްކަތް ކުރަމުންދާއިރު، ރާއްޖެއާއެކު ތެދުވުމަށް ޗައިނާއިން ކުރަމުން ގެންދާ މަސައްކަތައް ޝުކުރު އަދާކުރައްވާ ކަމަށް ރައީސް ވިދާޅުވިއެވެ.
ޕީޕަލްސް ރިޕަބްލިކް އޮފް ޗައިނާ އުފެދުނު ދުވަސް ފާހަގަ ކުރަމުން އަންނަ އިރު، ދެ ގައުމެއްގެ ދެމެދުގައި އޮންނަ ރަހްމަތްތެރިކަމުގެ ގުޅުން ވެސް މިރޭ ފާހަގަކުރައްވާ ކަމަށް ރައީސް ވިދާޅުވިއެވެ. އެ ގޮތުން އެފަދަ ގުޅުމެއް ވާން ޖެހޭނީ ދަނގަޑަށްވުރެ ވަރުގަދަ ބްރިޖެއް ފަދަ ގުޅުމަކަށް ކަމަށެވެ. އަދި ޖީލުތަކަށް ދެމިގެންދާނެ ޒަމާނުގެ އިމްތިހާނުތައް ތަހައްމަލު ކުރުމުގެ ގާބިލްކަން ލިބިފައިވާނެ ގުޅުމެއް ކަމަށް ވެސް ރައީސް ވިދާޅުވިއެވެ. ސިޔާސީ ގޮތުންނާއި، ވިޔަފާރިއާއި، ސަގާފަތާއި، ތައުލީމީ ދާއިރާ އާއި، ދެމެހެއްޓެނިވި އަދި ފާގަތި، މުސްތަގްބަލެއްގެ މަގުން މި ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމަށް ރައީސް ވިދާޅުވިއެވެ. ޗައިނާގެ ރަތް ދިދަ ފަހުރުވެރިކަމާ އެކު ވިހުރެމުން ދިއުމަށް އެދިވަޑައިގަންނަވާ ކަމަށާއި ޗައިނާގެ ރައްޔިތުންގެ މި ދަތުރުން މުޅި ދުނިޔެއަށް ހިތްވަރެއްގެ ގޮތުގައި ފެނިގެން ދިއުމަށް އެދިވަޑައިގަންނަވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރާއްޖެއާއި ޗައިނާއާ ދެ ގައުމުގެ ދެމެދުގައި އޮތް ގާތް ރަހުމަތްތެރި ގުޅުން، ދެމިއޮތުމަށް އެދިވަޑައިގަންނަވާ ކަމަށް ވެސް ރައީސް ވިދާޅުވިއެވެ. މި ގައުމީ ދުވަހުގެ މުނާސަބަތުގައި، ދިވެހި ސަރުކާރާއި، ރައްޔިތުންނާއި، ރައީސުލްޖުމްހޫރިއްޔާގެ އަމިއްލަ ނަންފުޅުގައި، ޗައިނާއަށް އިހްލާސްތެރިކަމާއެކު ތަހުނިޔާ ވިދާޅުވެ، އެ ގައުމުގެ ތަރައްގީއަށް ކުރިއެރުން ލިބުމަށް އެދިވަޑައިގަންނަވާ ކަމަށް ރައީސް ވިދާޅުވިއެވެ.
