މީޑިއާ ކޮމިޝަން ބިލާއި ގުޅިގެން ހުރިހާ ސިޔާސީ ޕާޓީއެއްގެ ބައްދަލުވުމެއް ބޭއްވުން ބޭނުންތެރި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މި ބިލާ ގުޅިގެން ހުރިހާ ސިޔާސީ ޕާޓީއެއްގެ ބައްދަލުވުމެއް ބޭއްވުން ބޭނުންތެރި ކަމަށާއި، ނޫސްވެރިކަމުގެ މިނިވަންކަން އިންތިހާއަށް ބޭނުންތެރި ކަމަށެވެ.
އެއާއެކު ނަޝީދު ވިދާޅުވީ ނޫސްވެރިންވެސް ޒިންމާދާރު ވުމަކީ މުހިންމު ކަމެއް ކަމަށެވެ.
މި ބިލު ބޭރު ކުރުމަށް ގޮވާލާ ނޫސްވެރިން އިހުތިޖާޖުކުރަމުން ދަނިކޮށް މި ބިލު މަޖިލީހުން ބަލައިގަނެ ބިލަށް ހިޔާލު ހޯދުމުގެ މަސައްކަތް މިހާރު ވަނީ ފަށާފައެވެ. އެގޮތުން މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލާ ގުޅޭގޮތުން، ރާއްޖޭގައި ރަޖިސްޓާ ކޮށްފައިވާ މީޑިއާތަކާ އެކު މަޝްވަރާކުރެއްވުމަށްޓަކައި ސެޕްޓެންބަރު 2025 ވާ ހޯމަ ދުވަހުގެ 11:00 ގައި މަޖިލީހުގެ އިދާރާގައި މަޝްވަރާ ބައްދަލުވުމެއް ބޭއްވުމަށްވެސް އެ ކޮމިޓީން ވަނީ ނިންމާފައެވެ.
ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހެޅުއްވި މީޑިއާ ބިލާއި ގުޅިގެން ސޯޝަލް މީޑިއާގައިވެސް ގިނަ ބައެއްގެ ނުރުހުން ސަރުކާރާއި، ޕީއެންސީއަށް ނިސްބަތްވާ މަޖިލީސް މެންބަރުންނަށް އަމާޒުވަމުން އަންނައިރު، މި ބިލުގެ މައްސަލަ ވަނީ ވަރަށް ބޮޑަށް ހޫނުވެފައެވެ.
މިކަމާ ގުޅިގެން މި މަހުގެ 28 ވަނަ ދުވަހު ރައީސް އޮފީހުގައި ބޭއްވި ޕްރެސް ކޮންފެރެންސްގައި މީޑިއާ ކޮމިޝަން ބިލު ބޭރު ކުރަން ޖެހޭ ކަމަށް ދެކެވަޑައިނުގަންނަވާ ކަމަށް އެޓާނީ ޖެނެރަލް އަހުމަދް އުޝާމް ވަނީ ވިދާޅުވެފައެވެ. އުޝާމް ވަނީ 2022 ވަނަ އަހަރުގެ އޮގަސްޓު މަހުގެ ތެރޭގައި މީޑިއާ ކައުންސިލް އިން ފޮނުވި ޑްރާފްޓް ބިލްއެއް ދައްކަވާފައެވެ.
މިކަމާ ހިންހަމަ ނުޖެހި ގިނަ ނޫސްވެރިން ވަނީ އެ ބިލު އެއްވެސް ނޫސްވެރިއަކަށް ފެނިފައިވެސް ނުވާކަމަށާއި، އޭރު މީޑިއާ ކައުންސިލުން ފޮނުވި ބިލެއް މިވަގުތު ދެއްކުމުގެ ބޭނުމެއް ނެތް ކަމަށް ބުނެ ޕްރެސް ކޮންފެރެންސް ދޫކޮށްވެސް ގޮސްފައެވެ.
