މައްސަލަ ބަލައި ޖަލަށްލައިފިނަމަ، ރަހުމަތްތެރިންނަށް ވާނީ އެމްޑީޕީގެ ވެރިކަން ކުރި ރައީސުންނާއި އެ ޕާޓީގެ މެންބަރުންގެ އިތުރުން ނޫސްވެރިން ކަމަށް ޕީއެންސީގެ ޕާލިމަންޓްރީ ގްރޫޕުގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.
މިދިޔަ ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ފަލާހު ވަނީ ބައެއް ނޫސްވެރިން އުލުބައިންދަން ޖެހޭ ކަމަށް ވިދާޅުވެފައެވެ. މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)އިން އެ މައްސަލަ ބަލައިދިނުމަށް އެދި ދިވެހި ފުލުހުންގެ ހިދުމަތަށް ހުށަހަޅެމުން މައްސަލަ ތަހުގީގު ކުރުމާމެދު ލަފައަށް ދިނުމަށް ފުލުހުން ވަނީ ޕީޖީ އޮފީހަށް ހުށަހަޅާފައެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ފަލާހު ވިދާޅުވީ މި މައްސަލަ ބަލައި ޖަލަށްލައިފިނަމަ، އެތާނގައި ރަހުމަތްތެރިންނަށް ވާނީ އެމްޑީޕީގެ ވެރިކަންކުރެއްވި ރައީސުންނާއި އެމްޑީޕީގެ މަޖިލީސް މެމްބަރުންގެ އިތުރުން ނޫސްވެރިން ކަމަށެވެ.
އެކަމުގެ ސަބަބެއްގެ ގޮތުގައި ފަލާހު ވިދާޅުވީ އެ ފަރާތްތަކަށްވުރެ ގިނައިން އިސްލާމްދީނުގެ އަސްލުތަކާ ހިލާފުވެ އެފަދަ ވާހަކަތަށް ދައްކާފައިވާ ބައެއް މި ގައުމުގައި ނޫޅޭނެ ކަމަށެވެ. އަދި އިސްލާމްދީން ނޫން ދީންތައް މި ގައުމަށް ގެނައުމަށް ވަކާލާތުކުރި އެ ފަރާތްތައް ފިޔަވައި ދެވަނަ ބައެއް ވެސް ނޫޅޭނެ ކަމަށް އޭނާ ވިދާޅުވިއެވެ.
މީހަކު މެރުމަށް ގޮވާލައްވާފައިނުވާނެ ކަމަށް ފަލާހު ވަނީ ވިދާޅުވެފައެވެ. އަދި އުލުބޭންދުން މާނަކުރެއްވީ "ބަސްނާހާ މީހުން ބިމަށްވުރެ މަތީތާކަށް އެރުވުމަށް" ކަމަށް ވެސް ފަލާހު ވިދާޅުވިއެވެ. އުލުބޭންދުން ދިވެހި ރަދީފުގައި މާނަކޮށްފައި ވަނީ އެއީ އިހު ޒަމާނުގައި މީހުން މަރަން ހަދާގޮތެއް ކަމުގައެވެ.
ފަލާހު ދެއްކެވި ވާހަކަތަކާ ގުޅިގެން ގިނަ އަދަދެއްގެ ނޫސްވެރިން ވެސް ވަނީ ކަންބޮޑުވުންފާޅުކޮށްފައެވެ. އަދި އެކަމުގެ ކަންބޮޑުވުން ރައީސްއާ ހިއްސާކުރުރުމުން ރައީސް ވަނީ ފަލާހުގެ އެ މައްސަލަ ބައްލަވާނެ ކަމަށް ވިދާޅުވެފައެވެ.
