ބައެއް ނޫސްވެރިން އުލުބައިންދަން ޖެހޭ ކަމަށް ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހް ރައްޔިތުންގެ މަޖިލީހުގައި ގޮވާލެއްވި މައްސަލަ ބެލުލާމެދު ޕްރޮސެކިއުޓާ ޖެނެރަލް(ޕީޖީ) އޮފީހުގެ ލަފަޔަކަށް ފުލުހުން އެދިއްޖެއެވެ.
ބައެއް ނޫސްވެރިން އުލުބައިންދަން ޖެހޭ ކަމަށް ފަލާހް ވިދާޅުވި މައްސަލަ ބަލައިދިނުމަށް އެދި ދިވެހި ފުލުހުންގެ ހިދުމަތަށް ހުށަހަޅާފައި ވަނީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިންނެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ ރައްޔިތުންގެ މަޖިލީހުގެ މެންބަރަކު މަޖިލީހުގެ ތަޅުމުގައި ދައްކާފައިވާ ވާހަކައަކާ ގުޅިގެން އެމްޖޭއޭއިން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް އެދި އިއްޔެ ޕީޖީގެ އޮފީހަށް ހުށަހަޅާފައިވާ ކަމަށެވެ.
ފަލާހުގެ އެ މައްސަލައާ ގުޅިގެން އެމްޖޭއޭއިން ބުނެފައިވަނީ މަޖިލީހުގެ ތަޅުމުގައި ފަލާހު ދެއްކެވި ވާހަކަތަކަކީ އިސްލާމް ދީނުގެ އަސްލަކާ ހިލާފު ވާހަކަތަކަކަށްވާނެ ކަމަށެވެ. ނޫސްވެރިންނާއި މީޑިއާތަކުގެ މަސައްކަތް ކުރާ މީހުންގެ މައްޗަށް އަނިޔާވެރިވުމާއި އެ މީހުންނަށް ޖިސްމާނީ ގެއްލުން ދީ ބިރުދެއްކުމަށް ހިތްވަރު ލިބޭ ގޮތަށް ނުފޫޒުގަދަ މަގާމުތަކުގައި ތިއްބަވާ ބޭފުޅުން ވާހަކަދެއްކެވުމަކީ މީޑިއާގައި މަސައްކަތްކުރައްވާ ފަރާތްތައް ބިރުވެރިކަމެއްގެ ތެރެއަށް ވެއްޓިގެންދާ ކަމެއް ކަމަށް ވެސް އެމްޖޭއޭއިން ވަނީ ބުނެފައެވެ.
ފަލާހު ދެއްކެވި ވާހަކަތަކާ ގުޅިގެން ގިނަ އަދަދެއްގެ ނޫސްވެރިން ވެސް ވަނީ ކަންބޮޑުވުންފާޅުކޮށްފައެވެ. އަދި އެކަމުގެ ކަންބޮޑުވުން ރައީސްއާ ހިއްސާކުރުރުމުން ރައީސް ވަނީ ފަލާހުގެ އެ މައްސަލަ ބައްލަވާނެ ކަމަށް ވިދާޅުވެފައެވެ.
