އައިޕީޔޫގެ 150 ވަނަ އެސެމްބްލީގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުالله އުޒްބަކިސްތާނަށް ވަޑައިގެންފިއެވެ.
މި އެސެމްބްލީ ކުރިއަށްދާނީ މިއަދުން ފެށިގެން އަންނަ ބުދަ ދުވަހުގެ ނިޔަލަށް، އުޒްބަކިސްތާނުގެ ވެރިރަށް ތަޝްކެންޓްގައެވެ. މި ދަތުރުފުޅުގައި މަޖިލީހުގެ ރައީސްގެ އަރިހުގައި މަޖިލީހުގެ ބައެއް މެންބަރުން ވަނީ ބައިވެރިވެވަޑައިގެންފައެވެ.
އޭގެ ތެރޭގައި މަޖިލީހުގެ މައިނޯރިޓީ ލީޑަރ، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް، މާފަންނު މެދު ދާއިރާގެ މެންބަރު އަސްމާ ރަޝީދު، ހުރާ ދާއިރާގެ މެންބަރު ޑރ. އަނާރާ ނައީމް، މާފަންނު ދެކުނު ދާއިރާގެ މެންބަރު އަބްދުﷲ ރިފާއު އަދި ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަތީފް ހިމެނިވަޑައިގަންނަވައެވެ.
އައިޕީޔޫއަކީ 150 އަށްވުރެ ގިނަ ގައުމެއްގެ ގާނޫނު ހަދާ މަޖިލިސްތަކުން ބައިވެރިވާ ބައިނަލްއަގުވާމީ ޖަމްއިއްޔާއެކެވެ.
ރާއްޖެއިން އައިޕީޔޫގައި ބައިވެރިވުމަށް ފާސްކުރީ ނޮވެމްބަރު 4، 2004 ގައެވެ. އަދި އެ ޖަމްއިއްޔާގެ ރާއްޖޭގެ ގޮފި އެކުލަވައިލީ ޖޫން 6، 2005 ގައެވެ.
މިއަދު ފަށާ މި އެސެމްބްލީގެ މައިގަނޑު މައުލޫއެއްގެ ގޮތުގައި ކަނޑައަޅައިފައި ވަނީ ސައިންސާއި ޓެކްނޮލޮޖީ އަދި އީޖާދުގެ ބޭނުން ހިފައި، ސުލްހަވެރި ދެމެހެއްޓެނިވި މުސްތަގްބަލެއް ބިނާކުރުމެވެ.
