ތ. ކަނޑޫދޫ ކައިރިން އަލިފާން ރޯވި މުދާ އުފުލާ ބޯޓުގައި ދަތުރު ކުރި ޒުވާނަކު ގެއްލިގެން ހޯދަމުންދާ ކަމަށް އެމްއެންޑީއެފް އިން ބުނެފިއެވެ.
އެމްއެންޑީއެފް އިން ބުނާ ގޮތުގައި މި ބޯޓުގައި އަލިފާން ރޯވެގެން އުޅޭ ކަމުގެ މައުލޫމާތު ލިބުމާއެކު ކައްދޫ ފަޔާ ސްޓޭޝާން އިން ވަނީ ހަރަކާތްތެރިވެފައެވެ.
11 ދިވެހިން އަދި 7 ބިދޭސީންނާއެކު ޖުމްލް 18 މީހުން އެ ބޯޓުން ދަތުރު ކުރި އިރު 17 މީހުން ސަލާމާތްވި ކަމަށް އެމްއެންޑީއެފް އިން ބުނެއެވެ. ނަމަވެސް އެއް ޒުވާނަކު އަދި ނުފެންނަ ކަމަށާއި އޭނާ ހޯދުމުގެ މަސައްކަތް ކުރަމުން އަންނަ ކަމަށް ބުނެއެވެ.
ގެއްލިގެން އުޅޭ ޒުވާނާ އަކީ އުމުރުން 25 އަހަރުގެ އަލީ މުޝްފިގް ކަމަށް މައުލޫމާތު ލިބެއެވެ. އޭނާ އަކީ ލ. މާވަށު ޒުވާނެއް ކަމަށާއި ގެއްލިގެން ހޯދަމުންދާ ޒުވާނާ ލައިގެން ހުރީ ނޫ ކުލައިގެ ޖޯޒީއެއް ކަމަށް ވެސް މައުލޫމާތު ލިބެއެވެ.
“ހޮޅުދޫ ބޯޓު”ގައި ރޯވީ ހިރިލަންދޫ އިން ފުރައިގެން މާލެ ދަނިކޮށް ތ. ކަނޑޫދޫ ކައިރިންނެވެ. މިހާދިސާގައި ބައެއް މީހުންނަށް ޒަހަމްވެފައިވާ އިރު، ދެ މީހަކަށް ތ.ކަނޑޫދޫ މަރުކަޒުގައި މިހާރު އަންނަނީ ފަރުވާ ދެމުންނެވެ. އެމީހުންނަށް ލިބުނު ޒަހަމްތަކުގެ ތަފްސީލެއް އަދި ނުލިބެއެވެ.
