ޕާކިސްތާނުގެ ވެރިރަށް އިސްލާމް އާބާދުގައި ހުންނަ ފައިސަލް މިސްކިތަކީ އެ ގައުމުގެ 'ގައުމީ' މިސްކިތެވެ. ދުނިޔޭގެ ހަވަނައަށް އެންމެ ބޮޑު މިސްކިތުގެ އިތުރުން މެދުއިރުމަތިން އެންމެ ބޮޑު މިސްކިތެވެ. މި މިސްކިތަކީ ސައުދީ އަރަބިއްޔާގެ މަރުހޫމް ރަސްގެފާނު ފައިސަލް ރަސްގެފާނުގެ ނަމުން ނަންދެވިފައިވާ މިސްކިތެކެވެ. މި މިސްކިތުގެ މަސައްކަތް ފެށުނީ 1976 ވަނަ އަހަރެވެ. ސައުދީ ރަސްގެފާނު ފައިސަލްގެ 28 މިލިއަން ޑޮލަރުގެ ގްރާންޓަކަށް ބިނާކުރެވުނު މިސްކިތެކެވެ.
ޕާކިސްތާނުގެ ފަތުރުވެރިންގެ މެދުގައި މަގުބޫލު މަންޒިލެއް ކަމަށްވާ މި މިސްކިތަކީ އިސްލާމީ އާކިޓެކްޗާގެ ޒަމާނީ މޮޅުކަން ފެނިގެންދާ މިސްކިތެކެވެ. ޒަމާނީ އިސްލާމީ އާކިޓެކްޗާގެ މާސްޓާޕީސްއެއްގެ ގޮތުގައި މި މިސްކިތް ހިމެނޭ އިރު މިއީ އެގައުމުގެ ސަގާފީ ތާރީހު ތަމްސީލުކޮށްދޭ ޕާކިސްތާން މޮނިއުމަންޓެއްގެ ގޮތުގައި ފާހަގަކޮށްލެވޭ ތަނެކެވެ. މި މިސްކިތުގައި ގާތްގަނޑަކަށް 300،000 މީހުންނަށް އަޅުކަންކުރެވޭނެ ޖާގައިގެ މިސްކިތެކެވެ. މިސްކިތުގެ މައި ހޯލުގައި 74000 މީހުންގެ ޖާގަ ހުރިއިރު މިއީ މިސްކިތުގެ އެތެރޭގެ ހޯލާއި، ގޯތިތެރެ ހިމެނޭ ގޮތަށް އެކުލަވާލާފައިވާ ސަރަހައްދެކެވެ. މީގެ އިތުރުން މިސްކިތުގެ ވަށައިގެންވާ ގޯތިތެރޭގައި 200،000 މީހުންނަށް ވުރެ ގިނަ މީހުން ތިބޭވޭނެ ޖާގަ ތަނަވަސްވެފައިވެއެވެ.
މިސްކިތުގެ ހަތަރު މުންނާރަކީ 79 މީޓަރު (230 ފޫޓް) އުސްމިނުގެ މުންނާރުތަކެވެ. މިއީ ދެކުނު އޭޝިއާގެ އެންމެ އުސް މުންނާރުތަކެވެ. މި މިސްކިތުގައި ސަގާފީ ގުއްބުތައް ބޭނުން ކުރުމުގެ ބަދަލުގައި އަށް ފަރާތުގެ މައި ހޯލުތައް ޑިޒައިން ކޮށްފައިވަނީ އަރަބިންގެ ބެޑޫއިން ޑެސާޓް ޓެންޓެއް ގޮތަށެވެ. މިސްކިތުގެ މައި ހޯލުގެ އެތެރެ ހުދު މާބަލް ގެ އިތުރުން މޮޒައިކްސް އާއި ކެލިގްރަފީ އިން ޒީނަތްތެރިކޮށްފައިވެއެވެ. މިސްކިތުގެ ގިބުލައާއި ދިމާލަށް ފާރުގައި ތުރުކީގެ ފަންނާނެއް ކަމަށްވާ މެންގޫ އެޓެލް އިން ފަރުމާކޮށްފައިވާ ކަޅު އަދި ހުދު ކުލައިގެ ކެލިގްރަފިކް ޓައިލްސްތަކެއް ޖަހާފައިވެއެވެ. މި މިސްކިތުގައި ލައިބްރަރީއެއްގެ އިތުރުން ލެކްޗާ ހޯލަކާއި، މިއުޒިއަމްއަކާއި އަދިި ކެފޭއެއް ހުރެއެވެ. މިސްކިތުގެ އެތެރެ ޒީނަތްތެރިކޮށްފައިވަނީ ތުރުކީ އަދި ޕާކިސްތާނުގެ ޑިޒައިންތަކަށެވެ.
