ޒުމްރާއެކީ މިރޭ ދިމާވި ކަންތައް ފިލްމެއްގެ ސިފައިގައި އިކާންގެ ލޯމައްޗަށް ފެނުނެވެ. ޒުމްރާއާ ދިމާއަށް އިކާނަށް ކިއުނު އެއްޗިހި ހަނދާންވުމުން ހުއްޓުން އެރިއެވެ. ފިޒާމް ބުނި ގޮތަށް ކަންތައް ވެދާނެތީ އިކާން ފަސްޖެހުނެވެ. ޒުމްރާ ސްޓޫޑިއޯއިން ނެރުނު ފަހުން އަދި އިކާނަށް ނުގުޅާތީ ދެން އެކަންތައް ހަމައަކަށް އެޅުުނީކަމަށް އިކާން ހީކޮށްގެން ހުއްޓަސް އިކާންގެ ހިތުގައި ބިރުވެރި ކަމެއް ވަނީ އަށަގެންފައެވެ.
މޫނު ދޮވެލައިގެން އިކާން ފާޙާނާއިން ނުކުމެ ތާރާއާ ދިމާއަށް ބަލާލިއެވެ. އޭރު ތާރާ އޮތީ ގަދައަށް ނިދާފައެވެ. އެހެންކަމުން ތާރާގެ މަގަތުގައި އޯށޮވެ އިކާން އޮތީ ނިތްކުރި މައްޗަށް އަތް އަރުވައިގެންނެވެ. ރޭގަނޑުގެ ނިދިން މަޚްރޫމުވެފަ ވިސްނާ ފިކުރުކުރަން އޮވެވުނީ ކިހާއިރެއް ވަންދެންކަން އިކާނަކަށް ނޭނގުނެވެ.
ކޮޓަރި ތެރެއަށް އެޅިފައިވާ އަވީގެ ސަބަބުން އިކާނަށް އުނދަގޫ ވިއެވެ. ދެލޯ ހަނިކޮށްލަމުން ތާރާ އޮތް ފަރާތަށް އިކާން އެނބުރިލި އިރު އިކާނަށް ލިބުނީ ހައިރާން ކަމެކެވެ. އެނދުން ތެދުވެ ފާޙާނާތެރެ ބަލާލުމަށްފަހު ކޮޓަަރިން އިކާން ނުކުތީ ތާރާއަށް ގޮވަމުންނެވެ. ސިޓިންގް ރޫމްތެރެ ކުނިކަހަން ހުރި ސީތާ ފެނުމުން ތާރާ ކޮބައިތޯ އިކާން އަހާލިއެވެ.
"ތާރާ މެޑަމް ދުރުވީ ބޭރަށް..." ސީތާ ދިން ޖަވާބުން އިކާންގެ ސިކުނޑީގެ ދިމާލެއްގައި ރިއްސާލިއެވެ.
އިކާން ގާތު ނުބުނެ ތާރާ އެ ދިޔައީ ކޮންތާކަށް ހެއްޔެވެ. ދުވަހަކު ވެސް އިކާން ގާތު ނުބުނެ ތާރާ ބޭރަކަށް ނުދެއެވެ. އެހެންކަމުން ކޮޓަރިއަށް ވަދެ އިކާން އެންމެ ފުރަތަމަވެސް ބޭނުންވީ ތާރާއަށް ގުޅާށެވެ.
*** *** *** *** *** ***
އުލްފާ މެންގޭ ދޮރުމަތީ ހުރެ އުލްފާގެ ނަންބަރަށް ތާރާ ގުޅާލިއެވެ. "އޭ އަދިވެސް މޯނިންގް ނުވަނީތަ.. މަމިއައީ ރިޕޯޓް ހިފައިގެން..." ފޯނު ކަނޑާލުމަށްފަހު ދޮރު ހުޅުވާލަމުން އެތެރެއަށް ވަންނާށޭ އުލްފާ ބުނެލީ ބޮލުގެ އިސްތަށިގަނޑު ހުޅި ޖަހާލަމުންނެވެ. ނިދާ ހޭލި ގޮތަށް ހުރުމުން ތާރާ ގާތު ސޯފާގައި އިށީންނާށޭ ބުނެ އުލްފާ ދިޔައީ އޭނާގެ ކޮޓަރިއަށެވެ.
މޫނު ދޮވެގެން އުލްފާ އައިސް ތާރާ ގާތު އިށީނެވެ. "ކީކޭތަ ރިޕޯޓްގަ އޮތީ..." އުފަލުން ތެޅި ފޮޅެމުން އުލްފާ ވާހަކަ ދައްކަމުން ދިޔައީ ތާރާގެ ފާރާތުން ލިބޭނެ ޖަވާބެއްގެ އިންތިޒާރުގައެވެ.
"އަދި ނުބަލަން.. ޔޫ ނޯ އައިމް ނާވަސް... އުލްފާއާ އެކީ ބަލާނީ... ނޯ ނޯ ނޯ ޔޫ އޯޕަން ދިސް... އައި ކާންޓް..." ތާރާގެ އަތުގައި އޮތް ސިޓީއުރަ އުލްފާ އާ ދިމާއަށް ދިއްކޮށްލަމުން ތާރާ ވާހަކަ ދެއްކިއެވެ. އެ ސިޓީ އުރައިގައި އުލްފާ ހިފުމާއެކު ތާރާގެ ދެއަތުން އޭނާގެ މޫނު ނިވާކޮށްލިއެވެ. އުލްފާ ރިޕޯޓް ނަގާ ނިއުޅުވާލުމަށްފަހު ތާރާގެ މޫނަށް ބަލާލިއެވެ.
"ކީކޭ އޮތީ... ބުނެބަލަ..." އަނގައިން ބަހެއް ނުބުނެ އުލްފާ ހުރި ގޮތުން ތާރާ ސުވާލުކުރަން ފެށިއެވެ. އުލްފާގެ ފަރާތުން ޖަވާބެއް ނުލިބުމުން ސޯފާއިން ތެދުވެ އުލްފާގެ އަތުގައި އޮތް ރިޕޯޓް ތާރާ ޖަހައިގަތެވެ.
"އުލް... އުލް.. ސީ ދިސް... އައިމް ޕްރެގް.. ޕޮސިޓިވް.. ޔޭ...." އުފަލުން ތާރާ ފުމެން ފެށިއެވެ.
"ތާރާ ކާމް ޑައުން.. ޔޫ އާ ޕްރެގް.. ތިހެން ނޫޅޭ.. ވަރަށް ބަލައިގެން އުޅެން ވާނީ... ކޮންގްރެޓްސް.. ލެޓްސް ޕްލޭން ދަ ޕާޓީ... ޔޭ... ކޮބާތަ އިކާން؟..." ތާރާގެ ގައިގާ ބައްދާލުމަށްފަހު އުލްފާ ޖަވާބުދިނެވެ.
"މިގޭ ދޮރުމަތީގަ ހުއްޓާ އިކާން ގުޅި.. އަހަންނަކަށް ނޭނގުނު ބުނާނެ އެއްޗެއް... ސޯ އަހަރެން ބުނީ އުލްފާ ބަލިވެގެން މިގެއަށް އައީއްޔޭ... ޝާމް ވެސް މާލޭގަ ނެތީމަ މިރޭ ވަންދެން މިގޭގަ މަޑު ކުރާނީއްޔޭ..." އަނގަޔަށް ވައްތަރެއް ޖައްސަމުން ތާރާ ވާހަކަ ދެއްކުމަށްފަހު އުލްފާ ދޭނެ ޖަވާބެއްގެ އިންތިޒާރުގައި ތާރާއަށް މަޑުކޮށްލެވުނެވެ.
"ހެހެހެ... ތާރާވެސް ދޯ.. އޯކޭވާނެ... އަހަންނަށް ގުޅައިފިއްޔާ ބަލިކަމަށް ހެދެން ދޯ ޖެހޭނީ... ހިނގާ ސަޕްރައިޒް ޕްލޭން ކުރަން... ބަޓް ކޮފީއެއް ބޮއެގެން ވާނީ..." ބަދިގެއާ ދިމާއަށް އުލްފާ ހިނގައިގަތީ ސިޓިންގްރޫމުގައި ހުރި ބޮޑު ގަޑިއަށް ބަލާލަމުންނެވެ.
އުލްފާއާ އެކީ އިކާނަށް ސަޕްރައިޒް ޕާޓީއެއް ތައްޔާރުކޮށް ނިންމާލުމަށްފަހު ތާރާ ރީތިވެގެން އައީ ވަރަށް އަވަސް އަރުވާ ލައިގެންނެވެ. ފުއްޕާހަންތަކުން ރީތިކޮށްފައިވާ ޓެރަސްއަށް ބަލާލަމުން ތާރާ ހިނިތުންވެލިއެވެ.
ދައުވަތު ދިން އެންމެން އޭރު އެތަނަށް އައިސް މަޑުކޮށްގެން ތިބީ ތާރާ އަންނާނެ ވަގުތެއްގެ އިންތިޒާރުގައެވެ. ތާރާ ފެނުމާއެކީ ކުރިއަށް ޖެހެމުން އާތިފް ވާހަކަ ދެއްކީ ނުހަނު ލޯތްބާ އެކީގައެވެ. "ދަރިފުޅާ ތާރާ.. ބައްޕަ ވަރަށް އުފާވެއްޖެ... އަދި އިކާނަކަށް ނޭނގޭ ދޯ... ދައްތަގެ ފޯނަށް ގުޅާފަ ބައްޕަ ބުނިން އަންނައްޗޭ.. ތާރާއަށް ދައްތަ ނުގުޅާތަ؟.."
ތާރާ ބޯޖަހާލަމުން އަތް ދަބަސް ތެރެއިން ފޯނު ނަގާ އޭގެ ސްކްރީނަށް ބަލާލީ އެއްވެސް މިސްޑް ކޯލެއް އައިސްފައި ވޭތޯ ޔަގީންކޮށްލަމުންނެވެ. "ނޫން.. ދައްތަ ނުގުޅާ.. ވެދާނެ ބިޒީ ވީ ކަމަށް... އިކާނަށް ގުޅަންވީ ދޯ.. ކޭކް އައިއްސިތަ... ކޮބާ ޓެސްޓްގެ ރިޕޯޓް..." އުލްފާއާ ދިމާއަށް ބަލާލަމުން ތާރާ އަވަސްވެގަތީ ހުރިހާ ކަމެއް ނިމިފަ ހުރިތޯ ޔަގީން ކުރާށެވެ.
ދުރުގައި މަންޒަރު ބަލަން ހުރި ސައްތާރު ބޯ ހޫރުވާލިއެވެ. "އާމިރާ... އިނގޭތަ ޒުމްރާ މިއަދު ގޭދަށުން ދުރަށް ނުގޮސް އެހުންނަނީ އެތާ އެނބުރިލަ އެނބުރިލަ... އިކާން އަދިވެސް އެކަން ކުރަމުން ދާއިރު އާމިރާ ތިހުންނަނީ އެ ސޮރު ހުއްޓުވަން އެއްވެސް ކަމެއް ނުކޮށް.. މިހާރު ތާރާ ބަނޑުބޮޑު... ކަންތައް މާ މައްޗަށް ނުދަނީސް އިކާން އިސްލާހުކުރަން އަހަރެން ވާހަކަ ދައްކާނަން..." ސިއްރުސިއްރުން ސައްތާރު ވާހަކަ ދެއްކީ އެހެން މީހަކަށް އަޑު ނީވޭނެހެން މަޑުމަޑުންނެވެ.
*** *** *** *** *** ***
އިރުއޮއްސެން ކައިރިވީ އިރު ފިޒާމަށް ގުޅައިގެން އެންމެ ފަހުން ނިކުތް ލޯބީގެ ފިލްމެއް ހޯދައިގެން އިކާންމެން ދިރިއުޅޭ ގެއަށް އައީ ތާރާއަށް ވެފައިވާ ވައުދު ފުއްދާށެވެ. އިކާންމެން ގޭގެ ޓެރަސްގައި ދެމަފިރިންނަށް ލޯބީގެ ފޮނި ވަގުތުކޮޅެއް ހޭދަކޮށްލެވޭނެ ގޮތަށް ހުރިހާ ކަމެއް ރާވާލައިގެންނެވެ.
މިރޭ ދިހައެއް ޖަހަންވާ އިރަށް ހުރިހާކަމެއް ތައްޔާރުކޮށް ނިންމާލަން އިކާން ބޭނުންވިއެވެ. ހިތުގެ ބައްޓަމަށް ހުރި ފުއްޕާހަން ތަކެއް ގަނެގެން އަންނަން ފިޒާމް ކައިރީ ބުނި އިރު އިކާންގެ ފޯނު އެއްކޮށް ނިވިއްޖެއެވެ. ފޯނު ޖީބަށް ލަމުން ގޭތެރެއަށް ވަދެގެން އިކާން ލިފްޓާ ހަމައަށް ދިޔައިރު އޭނާގެ އަތުގައި އޮތް ރަތްކުލައިގެ ފިނިފެންމާ ބޮނޑި ބިންމައްޗަށް ވެއްޓުނެވެ.
ޗުސް ކަނޑާލަމުން އިކާން އެ މާބޮނޑި ނަގަން ގުދުވިއެވެ. މާބޮނޑި ނަގަން ގުދުވެގެން އޮތް އިރު އެތަނަށް މީހަކު އައިސް ހުއްޓުމުން އެމީހާގެ ފައިތިލައަށް އިކާން ބަލާލީ ހައިރާން ކަމާއެކުގައެވެ. މާ ބޮނޑިއާ ނަގައިގެން ތެދުވެ ހިންދެމިލަމުން އިކާންގެ ކުރިމައްޗަަށް ހުއްޓުނު މިހާގެ މޫނަށް އޭނާއަށް ބަލާލިއެވެ.
އަނގައިން ބަހެއް ނުބުނެ އިކާން މަސައްކަތް ކުރީ ޒުމްރާގެ ކައިރިން ރެކިގެން ލިފްޓަށް އަރަން ދާށެވެ. "އިކާން... އޭ މަޑުކޮށްބަލަ.." އިކާންގެ ފަހަތުން ލިފްޓަށް އަރަމުން ޒުމްރާ ވާހަކަ ދެއްކިއެވެ. ނަމަވެސް ޒުމްރާ ދައްކަމުން ދިޔަ ވާހަކައަށް އިކާން ދިނީ ބީރު ކަންފަތެކެވެ.
"ކީއްވެތަ މަ އިގްނޯ ކުރަނީ... އަހަރެން އިކާނާ ވަރަށް ބޮޑު ވާހަކައެއް ދައްކަން މިއައީ... ޕްލީސް އިކާން މަ ދައްކާ ވާހަކަ އަޑު އަހާބަލަ..." ނުވަ ވަނަ ބުރިއަށް ލިފްޓް އައިސް ދޮރު ހުޅުވުމުން އިކާން ލިފްޓުން ފޭބުމަށްފަހު އޭނާގެ އެޕާޓްމަންޓަށް ވަންނަން ދޮރު ހުޅުވާލިއެވެ.
"ޒުމްރާ ހަމަ މިހާރު މިތަނުން ދޭ.. އަހަރެން ބޭނުމެއް ނޫން ޒުމްރާއާ ވާހަކަ ދައްކާކަށް..." އިކާން އެއްޗިހި ކިޔަމުން މަސައްކަތް ކުރީ ދޮރު ލައްޕާށެވެ. ނަމަވެސް ޒުމްރާ އެއަށްވުރެ ހުށިޔާރެވެ. އެޕާޓްމަންޓް ތެރެއަށް ޒުމްރާ ދެމިގަތުމުން އިކާން ދުރަށް ޖެހިލިއެވެ. އިކާންގެ އަތުގައި ހުރި ސާމަނުތައް ސޯފާ ކައިރީ ހުރި މޭޒުމަތީ ބެހެއްޓުމަށްފަހު އެނދާ ދިމާއަށް އިކާން ހިނގައިގަތެވެ.
އެނދުގައި އިށީނުމަށްފަހު ފުން ނޭވާއެއް އިކާން ބޭރުކޮށްލީ އޭނާގެ ސިކުނޑިއަށް ލުއިކަމެއް ހޯދާށެވެ. ނަމަވެސް ކުރިމަތީ ހުރި ޒުމްރާ ފެނުމުން އޭނާގެ ހިތާ ސިކުނޑިއަށް ހަމަޖެހުމެއް ލިބޭނީ ކިހިނެއް ހެއްޔެވެ.
"އަހަރެން ދެން އިކާނަށް ދުވަހަކު ވެސް އުނދަގުލެއް ނުކުރާނަން.. ހެޔޮނުވާނެ އިކާން އަހަރެން ދައްކާ ވާހަކަ އަޑު އަހާބަލަ... އިކާން ކައިރީ ލޯބިވެޔޭ ބުނަންވީ ކިހާވަރަކަށް ތަ... އިކާނާ ނުލާ އަހަންނަކަށް ނޫޅެވޭނެޔޭ ބުނީމަވެސް އިކާން ދުރަށް ދަނީ ކީއްވެގެންކަން އަހަންނަށް އެނގިއްޖެ... އިކާން އަހަރެން ދެކެ ވާ ލޯބި ތި ގުރުބާން ކުރަނީ އެހެންވެގެންތަ؟... ތާރާ ވަރި ނުކުރާނަމޭ ބުނީމަ ހީވި ކޮންމެވެސް މަޖުބޫރީ ހާލަތެއް އޮތީމައޭ އިކާން އެހާ ދުރުވާނީ... އަހަރެންނަށް ކަމެއް ކޮށްދެންޏާ ތާރާގެ ބަނޑުގައިވާ ދަރި ވައްޓާލާ..." ޒުމްރާގެ ވާހަކަ ނިމުމުން އިކާންގެ ފުންމައިގެން އެނދުމަތިން ތެދުވެ ޒުމްރާއާ ދިމާއަށް ބަލާލީ ސުވާލުން ފުރިގެންވާފަދަ ނަޒަރަކުންނެވެ.
ޒުމްރާގެ އަތްދަބަސް ތެރެއިން ނެގި ފައްސަތޭކަ ރުފިޔާގެ ފައިސާ ބޮނޑިއެއް އިކާންގެ މޫނާ ދިމާއަށް ޒުމްރާ ހޫރާލިއެވެ. "ޕްލީސް ގެޓް ރިޑް އޮފް ހަރ... އަހަރެމެން އާ ފެށުމަކުން ފަށާނީ... މާލޭގަ އުޅެން ބެނުން ނޫނިއްޔާ އެހެންތާކަށް ވެސް ދެވިދާނެ... މި އެންމެންނާ ދުރަށް ދާން ހިނގާ.. ޖަސްޓް ޔޫ އެންޑް މީ..." ޒުމްރާގެ އަނގަ މައިތިރި ނުވާނެކަން އިކާނަށް އެނގުމުން އޭނާއަށް ޒުމްރާގެ ގައިގާ އަތް އަޅާ ދުރަށް ކޮށްޕާލެވުނެވެ.
"ތާރާއާ މެރީ ކުރިއިރު އަހަންނަކަށް ނޭނގޭ ތީކަމެއް ތާރާގެ ދައްތައަކީ އެނގުނު ނަމަ އަހަރެން ތާރާއާ މެރީ ނުކުރީމުސް... ޒުމްރާއަކީ ކާކުކަން އެނގުނު ހިސާބުން އަހަރެން ޒުމްރާއާ ދުރަށް ދާން ފެށިން.. އަހަރެން ބޭނުމެއް ނޫން ޒުމްރާގެ މޫނު ދެކޭކަށް ވެސް މިތަނުން ދާން އުޅޭ... އަހަރެން މިހުރީ ވަރަށް ރުޅިއައިސްފަ... އަހަރެންގެ އަތުން ފައިން ގޯހެއް ނުހަދަނީސް ކަލޭ މިތަނުން ރައްކާވޭ..." ރުޅިއައިސްފައި ހުރުމުން އިކާން ބޭނުންވީ އެކޮޓަރިން ބޭރަށް ނިކުންނާށެވެ.
ހިތް ނުތަވަސްވާ ގިނަ ވަގުތުތައް އިކާން ހޭދަ ކުރަނީ އެ ޓެރަހުގައެވެ. ޓެރަސްއަށް ނުކުމެވެން ހުރި ކެހޭ ދޮރު ހުޅުވާލި ވަގުތު އޭނާގެ ފައިދަށުން ބިިންގަނޑު ދެމިގަތް ކަހަލައެވެ. މުޅިތަން ވަނީ ޒީނަތްތެރި ކޮށްފައެވެ. އެކި ކުލައިގެ ބޮކިތަކުންނާ ފުއްޕާ ހަންތަކުންނެވެ. ދުރުގައި ވާ ބެނާއަށް އިކާންގެ ނަޒަރު ހުސްކޮށްލެވުނެވެ.
"ގޮއިން ޓު ބީ އަ ޑޭޑް..."
- ނުނިމޭ -
