އީދު ދުވަހު އަމިއްލަ ނަފްސު އިސްލާހުކުރުމަށް އަޒުމް ކަނޑައަޅައި، އީދުގެ އުފާ ފާޅުކުރުމަށް ފަހު ވެސް އިސްލާމްދީނުގެ އިމުގެ ތެރޭ އަމަލުތައް ބެހެއްޓުމަށް ރައީސް ޑރ. މުހައްމަދު މުއިއްޒު ނަސޭހަތްތެރިވެވަޑައިގެންފިއެވެ.
މި އަހަރުގެ ފިތުރު އީދު ދުވަހުގެ މުނާސަބަތުގައި ދެއްވި ހިތާބުގައި ރައީސް ވިދާޅުވީ، މުސްލިމުންގެ މުޅި ދިރިއުޅުން ބިނާވެފައި އޮންނަން ވާނީ ކުރާ ކޮންމެ ކަމެއް ހެޔޮގޮތުގައި ކުރުމާއި ބުނާ ކޮންމެ ބަހެއް ހެޔޮގޮތުގައި ބުނުމުގެ މައްޗަށް ކަމަށެވެ. ރައީސް ވިދާޅުވީ ރަމަޟާން މަހު ހިފައި ރޯދައިގެ އިތުރުން ގިނަގިނައިން ހެޔޮ އަމަލުކޮށް ދުއާކުރަނީ މި މިންގަނޑުގައި ދެމިތިބުމަށް ކަމަށެވެ.
ރައީސްގެ ހިތާބުގައި، މުޅި ރަމަޟާން މަހުގެ އަޅުކަމަށް ފަހު އިލާހީ ރުއްސެވުން ލިބުނުކަމުގެ އުންމީދާ އެކު އާ ފުރުސަތުތަކެއް ލިބެމުންދާ ކަން ފާހަގަކުރެއްވިއެވެ.
އެހެންކަމުން އީދު ދުވަހުގެ އެންމެ ހާއްސަ އަޒުމަކަށް ވާންވީ އަމިއްލަ ނަފްސުގެ އިސްލާހަށް އެދި ﷲގެ ހަޟްރަތުގައި ދެންނެވި ފަދައިން ކުރިޔަށް އޮތް ދުވަސްތަކުގައި އަމިއްލަ ނަފްސު އިސްލާހުކުރުމެވެ، އީދުގެ އުފާތައް ލިބިގަތުމުގައިވެސް އަދި އޭގެ ފަހުންވެސް ކޮންމެ ކަމެއްގައި އިސްލާމްދީނުގެ މަތިވެރި އިމުގެ ތެރޭގައި ހުރިހައި އަމަލުތަކެއް ބެހެއްޓުމެވެ،" އެމަނިކުފާނުގެ ހިތާބުގައި ވެއެވެ.
ސަރުކާރުން މަސައްކަތްކުރާނީ އިސްލާމްދީންގެ ޝިއާރުތައް އުފުލުމުގައި ނަމޫނާ ގައުމަކަށް ރާއްޖެ ހެދުމަށް ކަމަށް ވިދާޅުވެ، ރައީސް ވިދާޅުވިގޮތުގައި ރަށްރަށް ދިއްލުމާއި ތަކްބީރުގެ އަޑު އިއްވުމުގެ އިންތިޒާމު ހަމަޖެއްސީ އެ މަގްސަދުގައެވެ.
އީދު ދުވަހު ހެޔޮ ކަންކަން އެކަކު އަނެކަކަށް ފޯރުކޮށްދީ، ކުޑަކުދިން ހެއްވާލަދިނުމަށް އެދިވަޑައިގެން ރައީސް ފާހަގަކުރެއްވި ގޮތުގައި އާއިލާތަކުގެ ގުޅުން ބަދަހިވާ، އަދި މުޅި މުޖުތަމައުގެ އެކި އުމުރުފުރާގެ މީހުންގެ ބައިވެރިވުން ލިބިފައިވާ ދުވަހަކަށް އީދު ދުވަސް ހެދުން މުހިންމެވެ.
މި ފުރުސަތުގައި އެމަނިކުފާނު ވަނީ ފަލަސްތީނުގެ ޣައްޒާގައި ހާލުގައި ޖެހިފައިވާ ކުޑަކުދިންނާއި މީހުންގެ މަތިން ހަނދުމަކޮށް އެ މީހުންނަށް ދުއާކުރުމަށް އެދިވަޑައިގެންފައެވެ.
