ރައްޔިތުންގެ މަޖިލީހުން ގާނޫނުއަސާސީ އަށް ގެންނަ އިސްލާހުތަކުގެ މައްސަލަތައް އެއްވެސް ކޯޓަކަށް ނުބެލޭނެ ކަމަށް ބަންޑާރަ ނައިބުގެ އޮފީހުން ބުނެފި އެވެ.
ބަންޑާރަ ނައިބުގެ އޮފީހުން މިގޮތަށް ބުނީ، ޕާޓީ ބަދަލުކުރުމުން ރައްޔިތުންގެ މަޖިލީހުގެ ގޮނޑި ގެއްލޭގޮތަށް ގާނޫނު އަސާސީއަށް ގެނެސްފައިވާ އިސްލާހުތައް ބާތިލުކުރަން ސުޕްރީމް ކޯޓަށް ހުށަހަޅާފައިވާ މައްސަލައާ ދެކޮޅަށް ކޯޓުގައި ވަކާލާތުކުރަމުންނެވެ.
ގާނޫނުއަސާސީއަށް ހަވަނަ އިސްލާހު ގެނައީ ގާނޫނު ގާނޫނުއަސާސީއާ ހިލާފު ކަމަށް ބުނެ ދުސްތޫރީ މައްސަލައެއްގެ ގޮތުގައި އެ މައްސަލަ ހުށަހެޅުއްވީ ރައްޔިތުން މަޖިލީހުގެ ކުރީގެ މެންބަރު އަލީ ހުސެއިން އެވެ. ނަމަވެސް އެ މައްސަލައާއި ދެކޮޅަށް ބަންޑާރަ ނައިބުގެ ވަކީލް، ފާތިމަތު ހަލީމް ވިދާޅުވީ މިފަދަ މައްސަލަތައް ދުސްތޫރީ މައްސަލައިގެ ތަރަހައިގެ ތެރެއަށް ނުފެތޭ ކަމަށެވެ.
އަދި ގާނޫނު އަސާސީގައި ބަޔާންކުރާ ގޮތުގެ މަތިން ގާނޫނު އަސާސީ އިސްލާހުކުރުމަކީ މަޖިލީހަށް ލިބިދޭ ބާރެއްކަން ފާހަގަ ކުރައްވާ ފާތިމަތު ހަލީމް ވިދާޅުވީ ގާނޫނު އަސާސީއަށް މަޖިލީހުން ބަދަލު ގެނެސްފައިވަނީ އެ މަޖިލީހުގެ ގަވާއިދުތަކުގެ އިޖުރާއަތުތައް ފުރިހަމަކޮށް އެ މަޖިލީހުގެ 78 މެންބަރުންގެ ވޯޓުން ކަމަށެވެ. އަދި އެއީ ރައީސުލްޖުމްހޫރިއްޔާ ތަސްދީގު ކުރައްވާފައިވާ ބިލަކަށްވުމުން އެ އިސްލާހަކީ ގާނޫނު އަސާސީގައި ބަޔާންކޮށްފައިވާ އިޖުރާއަތާ އެއްގޮތަށް ގެނެސްފައިވާ އިސްލާހެއް ކަމަށް އޭނާ ވިދާޅުވިއެވެ.
ހަމައެހެންމެ ގާނޫނުއަސާސީއަށް އިސްލާހު ގެންނަ ބިލްތަކަކީ ގާނޫނެއް ގޮތަށް ބަޔާން ކޮށްފައިވީ ނަމަވެސް، އެއީ ގާނޫނެއްގެ ދަރަޖަ ދެވޭނެ އެއްޗެއް ނޫންކަން ފާހަގަ ކޮށް ފާތިމަތު ވިދާޅުވީ އެ އަށް ގާނޫނެއްގެ ދަރަޖަ ދޭ ނަމަ އިޖުރާއީ ބޮޑެތި މައްސަލަތައް ވެސް ނުކުންނާނެ ކަމަށެވެ.
ވަކީލް އެހެން ވިދާޅުވުމުން ގާނޫނުއަސާސީ އަށް ގެންނަ އިސްލާހުތަކުގެ މައްސަލަތައް ބެލޭނީ ކޮން ކޯޓަކަށްތޯ ފަނޑިޔާރު އައިޝާ ޝުޖޫން ސުވާލު ކުރެއްވި އެވެ. އެއާއެކު ފާތިމަތު ވިދާޅުވީ ގާނޫނުއަސާސީއަށް އިޖުރާއަތުގެ ތެރެއިން އުސޫލާ އެއްގޮތަށް ގެންނަ އިސްލާހުތައް އެއްވެސް ކޯޓަކަށް ބެލޭނެ ކަމަށް ގަބޫލު ނުކުރައްވާ ކަމަށެވެ.
ނަމަވެސް މިކަމާ ދެކޮޅަށް އަލީ ހުސެއިންގެ ފަރާތުން ވަކާލާތު ކުރައްވާ ވަކީލް މަހްފޫޒު ސައީދު ވިދާޅުވީ، މިއީ ދުސްތޫރީ މައްސަލައެއް ކަމަށާއި ރައްޔިތުންގެ މަޖިލީހުން ފާސްކުރާ ގާނޫނެއް ނުވަތަ ގާނޫނެއްގެ ބައެއް ވިޔަސް ގާނޫނުއަސާސީއާ ހިލާފުވޭތޯ ބަލައި ގޮތް ނިންމުމުގެ ބާރު ސުޕްރީމް ކޯޓަށް ލިބިގެންވާއިރު އެއީ މި މައްސަލަ އެ ކޯޓަށް ބެލޭނެ ސަބަބެއް ކަމަށެވެ.
އޭނާ ވިދާޅުވި ގޮތުގައި ގާނޫނުއަސާސީއަށް އިސްލާހު ގެންނަ ގާނޫނުތަކާއި އެހެން ގާނޫނުތަކާ ތަފާތު ވާނެ ކަމެއް ނުވަތަ ފަރަގެއް އޮތް ކަމަކަށް ގާނޫނުއަސާސީގައި ބަޔާންކޮށްފައި ނުވެއެވެ.
ސުޕްރީމް ކޯޓަށް އަލީ ހުސައިން ހުށަހެޅުއްވި މައްސަލާގައި އެދިވަޑައިގެންފައިވަނީ ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހަކީ ބާތިލް އެއްޗެއް ކަމަށް ކަނޑައަޅައިދިނުމަށެވެ. އަދި ގާނޫނުއަސާސީއަށް ގެނައި އިސްލާހު ގާނޫނުއަސާސީގެ 26 ވަނަ މާއްދާ އާއި، ގާނޫނުއަސާސީގެ 75 ވަނަ މާއްދާ އާއި، 90 ވަނަ މާއްދާއާ ވެސް ފުށުއަރާ ކަމަށާއި އެ އިސްލާހުގެ ސަބަބުން ތިން ބާރު ވަކިވެފައިވާ ރިޔާސީ ނިޒާމު ތައާރަޒުވާނެ ކަމަށްވެސް އޭނާ ބުނެފައި ވެއެވެ.
ޕާޓީ ބަދަލުކުރާ މެމްބަރުންގެ ގޮނޑި ގެއްލޭ ގޮތަށް އެންޓި ޑިފެކްޝަން ގާނޫނެއް 2018 ވަނަ އަހަރު ރައްޔިތުންގެ މަޖިލީހުން ކުރިން ފާސްކުރި ނަމަވެސް ފަހުން ވަނީ އެ ގާނޫނު އުވާލާފައެވެ.
