ފުރިހަމަ ދައުލަތެއްގެ ތެރެއިން ރައްޔިތުންނަށް ލިބިދޭންޖެހޭ ހައްގުތައް ކަށަވަރު ކުރެވޭނީ ދައުލަތުގެ ހުރިހާ މުއައްސަސާއަކުންވެސް ގާނޫނުގެ ބާރު ނަގަހައްޓައިގެންކަމަށް އުއްތަމަފަނޑިޔާރު އަހްމަދު މުއުތަސިމު އަދުނާނު ވިދާޅުވެއްޖެއެވެ.
ފާއިތުވި އަހަރު ކުރެވިފައިވާ މަސައްކަތްތައް ފާހަގަކުރުމަށާއި، ފާއިތުވި އަހަރުގެ ތަޖުރިބާގެ އަލީގައި ޝަރުއީ އަދި އިދާރީ ގޮތުން ލަނޑުދަޑިތަކެއް ކަނޑައެޅުމަށް ބޭއްވި ގަޟާއީ އަހަރު 2025 އިފްތިތާހުކުރުމުގެ ރަސްމިއްޔާތުގައި އިއްތަމަފަނޑިޔާރު ވިދާޅުވީ ކޯޓުތަކުގައި ހުރި ތަފާތު އެކި މައްސަލަތައް އަވަސްކޮށް ގާނޫނު ނަގަހައްޓައި ކުރިއަރުވަން ޝަރުއީ ދާއިރާއިން މުހިއްމު މަސައްކަތްތަކެއް ކުރަމުން އަންނަކަމަށެވެ.
މީގެ އިތުރުން އުއްތަމަ ފަނޑިޔާރު ވިދާޅުވީ ރާއްޖޭގެ ޖުޑިޝަރީ މިހާރަށްވުރެ ހަރުދަނާކުރުމަށް މި ކުރާ މަސައްކަތް ކާމިޔާބު ވާނީ ވެރިކަން ހިންގުމުގެ ބާރާއި ގާނޫނު ހެދުމުގެ ބާރާއި މިނިވަން މުއައްސަސާތަކާއި މުސްތަގިއްލު ކޮމިޝަންތަކާއި މަގާމުތަކުގައި ތިއްބެވި ބޭފުޅުން ގުޅިގެން، ޖުޑިޝަރީގެ މިޝަންކަމުގައިވާ ގާނޫނުގެ ވެރިކަން ނެގެހެއްޓުމުގައި ރައްޔިތުންގެ އިތުބާރު ލިބި މުޖުތަމައުގައި ހަމެޖެހުން ގާއިމްވެގެންކަމުގައެވެ.
އިތުރަށް އުއްތަމަ ފަނޑިޔާރު ވިދާޅުވީ ކުރިއަށް އޮތްތަނުގައިވެސް ގާނޫނީ ވެރިކަން ނެގެހެއްޓުމުގެ މަސައްކަތް ހިކުމަތްތެރިކަމާއި ވިސްނުންތެރިކަމާއެކު ފަނޑިޔާރުން ކުރައްވާނެ ކަމުގެ ޔަގީންކަން އެބައޮތްކަމަށެވެ. ޓެކްނޮލޮޖީގެ އެހީއާއެކު މިދިޔަ އަހަރު ޝަރީޢަތްތައް އަވަސްކުރެވި ޝަރުއީ ދާއިރާގެ ދުވެލި ހަލުވި ކުރެވުނު ކަން ފާހަގަކުރައްވަމުން އުއްތަމަ ފަނޑިޔާރު ވިދާޅުވީ އުންމީދަކީ މިއަހަރުވެސް ޝަރުއީ ދާއިރާގައި ޓެކްނޮލޮޖީ ބޭނުންކުރާ މިންވަރު އިތުރުކުރުންކަމަށެވެ.
