އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައި ހުރި ގިނަ އަދަދެއްގެ ބަނގުރާ ނައްތާލައިފިއެވެ.
ފުލުހުން ބުނީ މި ބަނގުރާ ނައްތާލެވިފައިވަނީ އިއްޔެ ދޫނިދޫގައި ކަމަށާއި، ނައްތާލެވުނު ބަނގުރަލުގެ ތެރޭގައި ޓޫރިސްޓު ޕޮލިސް އަދި ހުޅުމާލެ ޕޮލިސް ސްޓޭޝަނުގެ ބެލުމުގެ ދަށަށް ގެނެވިފައިވާ ބަނގުރަލާއި ތުހުމަތުކުރެވޭ ފަރާތެއް ނެތްގޮތަށް ގެނެވިފައިވާ އިންސިޑެންޓުތަކުގެ ބަނގުރާ ހިމެނޭ ކަމަށެވެ. އަދި ކޭސްކޮށްފައިވާ މައްސަލަތަކުގެ ތަހުލީލު މަރުހަލާ ނިމިފައިވާ މައްސަލަތަކުގެ ބަނގުރާ ވެސް އިއްޔެ ނައްތާލެވިފައިވާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ ނައްތާލެވިފައިވަނީ:
- 2185 ބްރޭންޑެޑް ފުޅި
- 213 ޕެޓް ފުޅި
- 2001 ދަޅު ބިޔަރު
- އެހެނިހެން ތަކެތީގެ ގޮތުގައި 81 އައިޓަމް
ފުލުހުން ބުނީ މި ތަކެތި ނައްތާލެވިފައިވަނީ ފުލުހުންގެ ބެލުމުގެދަށަށް ގެނެވޭ ބަނގުރާއާއި ބަނގުރާގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަަމަލުކުރާނެ ގޮތުގެ ގަވާއިދުގެ ދަށުން ކަމަށެވެ.
ފުލުހުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މި އަހަރުގެ މިހާތަނަށް މަސްތުވާތަކެއްޗާއި ގުޅޭ 97 މައްސަލައެއް ފުލުހުންނަށް ވަނީ ރިޕޯޓުކޮށްފައެވެ.
