ފަގީރުންނާއި މިސްކީނުންގެ ދަފުތަރުގައި އަލަށް ރަޖިސްޓްރީވާ ވުމަށް އަނެއްކާވެސް ފުރުސަތެއް ހުޅުވާލައިފިއެވެ.
މޯލްޑިވްސް ޒަކާތު ހައުސް އިން ބުނީ 'ފަގީރުންނާއި މިސްކީނުންގެ ދަފުތަރު އެކުލަވަލައިލުމުގެ އުސޫލު' ގައިވާ ގޮތަށް އެ ދަފުތަރުގައި ރަޖިސްޓްރީވާން 19 މެއި 2024 ވަނަ ދުވަހުން ފެށިގެން ހުޅުވާލާފައިވާ ކަމަށާއި، ފިތުރު ޒަކާތުގެ ފައިސާ ބަހާނީ އެ އަހަރެއްގެ ރޯދަ މަހުގެ 1 ވަނަ ދުވަހާ ހަމައަށް ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވާ މީހުންގެ މެދުގައި ކަމަށެވެ.
އެއާއެކު ޒަކާތު ހައުސް އިން ވަނީ ދަފްތަރުގައި ރަޖިސްޓްރީވެފައިވާ ފަރާތްތަކާއި އަލަށް ރަޖިސްޓްރީވާ ފަރާތްތަކަށް އެކަން ހަނދާންކޮށްދީފައެވެ.
ޖޫން 2016 ވަނަ އަހަރުން ފެށިގެން މުދަލު ޒަކާތް ބަލައިގަންނަމުން އަންނަނީ މީރާ އިންނެވެ. އެ ކުންފުނިން ވަނީ އޮންލައިންކޮށް ޒަކާތް ދެއްކޭ ގޮތް ހަމަޖައްސާފައެވެ.
ނިސާބު ހަމަވާ ވަރަށް އަތުގައި ފައިސާ ހުރެ ހިޖުރީ ގޮތުން އަހަރެއް ވުމުން އޭގެ 40 ބައިކުޅަ އެއްބައި މުދަލު ޒަކާތުގެ ގޮތުގައި ނެރުން، ދީނީ ގޮތުން ވާޖިބުވެއެވެ. ޕަސެންޓުގެ ގޮތުން ނަމަ އެއީ 2.5 ޕަސެންޓެވެ. ޒަކާތު ހައުސް އިން ޖެނުއަރީ 22 ވަނަ ދުވަހުން ފެށިގެން މުދަލު ޒަކާތް ވާޖިބުވާ ނިސާބަކީ 8800.05 ރ. ކަމަށް ކަނޑައަޅާ އެކަން ވަނީ އިއުލާނު ކޮށްފައެވެ.
ކޮންމެ އަހަރަކުވެސް އިސްލާމިކް މިނިސްޓްރީން މުދަލު ޒަކާތް ވާޖިބުވާ ނިސާބެއް ކަނޑައަޅައެވެ. މޯލްޑިވްސް ޒަކާތު ހައުސް އިން ބުނީ ޒަކާތުގެ މައިގަނޑު މަގްސަދު ތަކުގެ ތެރޭގައި އިޖްތިމާއީ ހަމަހަމަކަން ގާއިމުކުރުމާއި ފަގީރުކަން ނައްތާލުން ހިމެނޭ ކަމަށެވެ.
