ޑިއުޓީގައި ތިބޭ ވަގުތު ފުލުހުން ފޯނަށް ގެއްލި ތިބޭ ކަމުގެ ޝަކުވާ ލިބޭ ކަމަށް ވިދާޅުވެ، ޑިއުޓީގެ ބޭނުމަށް ނޫނީ ފޯނުގެ ބޭނުން ނުކުރުމަށް ފުލުހުންގެ ކިބައިން ކޮމިޝަނަރު އަލީ ޝުޖާއު އެދިވަޑައިގެންފިއެވެ.
ފުލުހުންގެ ހިދުމަތާ އަލަށް ގުޅުނު ފުލުހުންނަށް ހިންގި 38 ވަނަ ޕޮލިސް އިނީޝިއަލް ޓްރެއިނިން ކޯހުގެ ދަސްވެނިވުމުގެ ރަސްމިއްޔާތުގައި ވާހަކަ ދައްކަވަމުން ޝުޖާއު ވަނީ، ޑިއުޓީގެ ވަގުތުގައި ބައެއް ފުލުހުން ފޯނާ ކުޅެން ތިބޭ ކަމަށް އާންމުންގެ ފަރާތުން ޝަކުވާ ލިބެމުންދާ ކަމަށް ވިދާޅުވެ ކަންބޮޑުވުން ފާޅުކުރައްވައިފައެވެ.
"މަގުމަތީގަ ހިނގާ އެއްވެސް ކަމަކަށް ފަރުވާ ނުބަހައްޓާ ތިބެނީ ފޯނަށް ގެއްލިފައޭ، މިކަން ރަނގަޅުކުރަން އެބަ ޖެހޭ،" ޑިއުޓީގެ ވަގުތުގައި އާންމުންނަށް ހިދުމަތްކުރުމަށް ސަމާލުކަން ދިނުމަށް އޭނާ އެދިވަޑައިގަތެވެ.
މީގެ އިތުރުން އާންމުންނާ މުހާތަބުކުރާއިރު ރިވެތި ބަހުރުވައިން މުއާމަލާތްކުރުމަށާއި، ފުލުހުންގެ ބާރުތައް ޒިންމާދާރުކަމާ އެކީ ބޭނުންކުރުމަށް ވެސް ފުލުހުންގެ ކިބައިން ކޮމިޝަނަރު އެދިވަޑައިގަތެވެ.
"ފުލުހުންނަށް ގާނޫނީގޮތުން ލިބިދޭ ބާރަކީ ހިތުހުރި ގޮތަކަށް ބޭނުންކުރަން ޖެހޭ ބާރެއް ނޫން، އަބަދު ވެސް ބަލަން ވާނީ ބާރުގެ ބޭނުންނުކޮށް ދިމާވާ ކަންކަން ހައްލުކުރުމަށް، މަގު ދައްކައިދޭ ބަޔަކަށް ވުމަށް، އިސްލާހުވުމަށް ފުރުސަތުދޭ ބަޔަކަށް ވުމަށް،" އޭނާ ވިދާޅުވިއެވެ.
ޝުޖާއު ވިދާޅުވީ ފުލުހުންގެ ހިދުމަތުގެ ފެންވަރު ރަނގަޅުކޮށް ފުޅާކުރުމަށްޓަކައި ފުލުހުންނަށް ބޭނުންވާ ތަމްރީނު ރާއްޖެއިންނާއި ބޭރު ގައުމުތަކުން ދީ، އެކި ސަރަހައްދުތަކުގައި ފުލުހުން ތަމްރީނުކުރާ މަރުކަޒުތައް ގާއިމްކުރުމުގެ މަސައްކަތްކުރަމުން ދާ ކަމަށާއި، މަގްސަދަކީ ފުލުހުންގެ ހިދުމަތް ރަނގަޅުކޮށް އާންމުން ބަލައިގަންނަ ހިދުމަތަކަށް ފުލުހުންގެ ހިދުމަތް ހެދުން ކަމަށެވެ.
ފުލުހުން ބުނީ ފުލުހުންގެ ހިދުމަތާ އަލަށް ގުޅުނު ފުލުހުންނަށް ހިންގި އިނީޝިއަލް ކޯހުގައި ބައިވެރިވި 140 ދަރިވަރުންގެ ތެރެއިން 127 ފުލުހަކު ދަސްވެނިވެފައިވާ ކަމަށެވެ. އެއީ ފިރިހެން 90 ފުލުހުންނާއި އަންހެން 37 ފުލުހުން ކަމަށް، ފުލުހުން ބުންޏެވެ.
