ރާއްޖޭގައި، ޗައިނާ މާކެޓުގެ ޑިމާންޑު އެބައޮތް ކަމަށާއި މޯލްޑިވިއަންއިން ޗައިނާއަށް ފެށި ދަތުރުތައް ކާމިޔާބު ދަތުރުތަކަކަށް ވެގެންދާނެކަމަށް ރާއްޖެއިން ޗައިނާއަށް ކަނޑައަޅާފައި ހުންނަވާ ސަފީރު ޑރ. ފަޒީލް ނަޖީބު ވިދާޅުވެއްޖެއެވެ.
ޕީއެސްއެމް އަށް ދެއްވި އިންޓަވިއުއެއްގައި ސަފީރު ވިދާޅުވީ ޗައިނާ މާކެޓްއަކީ ރާއްޖެއަށް ގިނަ އަދަދަކަށް ފަތުރުވެރިން ލިބޭނެ މާކެޓެއް ކަމަށެވެ. މިއީ ރާއްޖޭގެ ފަތުރުވެރިކަމަށް އަދި އިގްތިސާދަށް ވަރަށް ކާމިޔާބު ދަތުރުތަކަކަށް ވެގެންދާނެކަން ފާހަގަކުރައްވަމުން ސަފީރު ވިދާޅުވީ ދުނިޔޭގައި އޮތް މިޑްލް ކްލާސް އެންމެ ބޮޑު މާކެޓަކީ ޗައިނާ މާކެޓު ކަމަށެވެ.
މީގެ އިތުރުން ސަފީރު ވިދާޅުވީ ޗައިނާގެ ޓީވީތަކާއި ނޫސްތަކުން ރާއްޖެއަށް ވަރަށް ބޮޑު ސަމާލުކަމެއް ދޭ ކަަމށާއި މިއީ މުޅި ދިވެހިރާއްޖެއަށް ލިބޭ ކުރިއެރުމަކަށްވާނެ ކަމަށެވެ. އެހެންކަމުން މޯލްޑިވިއަންގެ އެ މަސައްކަތަށް ދިވެހި އެންމެހައި ރައްޔިތުން އެއްބާރުލުން ދިނުމަށް އެދިވަޑައިގަންނަވާ ކަމަށެވެ.
މޯލްޑިވިއަންގެ ސީދާ ދަތުރުތައް ޗައިނާގެ ބެއިޖިންއަށް މިމަހުގެ 24ވަނަ ދުވަހު ފަށާފައިވާއިރު، މޯލްޑިވަން އިން ކޮންމެ ހަފްތާއަކު ބެއިޖިންއަށް ދަތުރެއް ކުރުމަށް ވަނީ ހަމަޖެހިފައެވެ. މީގެ އިތުރުން މޯލްޑިވިއަން އިން ޗެންޑޫއަށްވެސް ޝެޑިއުލް ދަތުރުތައް ފަށާފައިވާއިރު، މިމަހުގެ 27 ވަނަ ދުވަހު ޝަންހާއީއަށް ވެސް ދަތުރުތައް ފެށުމަށް ވަނީ ހަމަޖެހިފައެވެ.
