ރ. މަޑުއްވަރީގެ އިހްތިސޯސްގައި އުފުލަންދޫ، އަދި އެ އަތޮޅުގެ މީދޫގެ އިހްތިސޯސްގައި ތާވަތާ ހިމަނުއްވަން ރައީސް ޑރ. މުހައްމަދު މުއިއްޒު ނިންމަވައި އެކަން އިއުލާންކުރައްވައިފިއެވެ.
ރ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅުގެ މަޑުއްވަރީ އަށް ވަޑައިގެން ދެއްކެވި ވާހަކަފުޅުގައި ރައީސް ވިދާޅުވީ އެ ރަށުގެ ބިން ހިއްކުމުގެ މަޝްރޫއުގެ އަމަލީ މަސައްކަތް މި އަހަރު ފަށައި މި ދައުރުގެ ތެރޭ ފުރިހަމަކުރައްވާނެ ކަމަށެވެ. މަޑުއްވަރީގެ ބިން ހިއްކައި ނިމުމުން، އެ ރަށު ބަނދަރުގެ ބެކްފިލްނުކޮށް ހުރުމުން ދިމާވާ މައްސަލައާއި ރަށްގިރުމުގެ މައްސަލަ ހައްލުވެގެން ދާނެ ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ މަޑުއްވަރީ އަށް އެންމެ ހަ ހެކްޓަރު އިތުރުކޮށްގެން އެ ރަށުގެ ބިމުގެ މައްސަލަ ހައްލުނުވާނެ ކަމަށާއި، ރަށުގައި އިގްތިސޯދީ މަސައްކަތްތައް ކުރާ ތަންތަން ރަށުން ބޭރަށް ބަދަލުކުރުމަކީ އާންމު ސިއްހަތަށް ވެސް އޮތް އެންމެ ރަނގަޅު ހައްލު ކަމަށެވެ.
އެއާއެކު މަޑުއްވަރީގެ އިހްތިސޯސްގައި އުފުލަންދޫ ހިމަނައި މީދޫގެ އިހްތިސޯސްގައި ތާވަތާ ހިމަނުއްވަން ނިންމެވިކަން ހާމަކުރައްވައި، އެކަމާ ގުޅޭ ލިޔެކިއުންތައް ހަމަޖެހުމުން މީހުން ދިރިއުޅޭ ސަރަހައްދުގައި ހުންނަން ނުޖެހޭ ތަންތަން އެ ރަށްރަށަށް ބަދަލުކުރެއްވުމަށް ރައީސް އެދިވަޑައިގަތެވެ.
ގެދޮރުވެރިކަމުގެ މަޝްރޫއުތަކަށް އަލިއަޅުވާލައްވައި ރައީސް ވިދާޅުވީ، މަޑުއްވަރީގެ ހައުސިން ޔުނިޓުތައް ހިމެނޭ ގޮތަށް ގެދޮރުވެރިކަމުގެ މަޝްރޫއު ހިންގާނެ ފަރާތެއް ހޯދުމަށް ކުރިއަށް ހުރި ދުވަސްތަކުގައި އިއުލާނުކުރައްވާނެ ކަމަށެވެ.
