ދުންފަތް އޮޅާ ސާމާނު މަނާ ނުކުރަން ނިންމާ ކަސްޓަމްސް އިން ހިފެހެއްޓި ޝިޕްމަންޓް ދޫކޮށްލައިފިއެވެ.
ދުންފަތް ކޮންޓްރޯލްކުރުމާ ބެހޭ ގާނޫނަށް މި ފަހުން ގެނައި އިސްލާހާއެކު ދުންފަތުގެ ބާވަތްތައް ރާއްޖޭގައި އުފެއްދުމަކީ މަނާ ކަމެއް ކަމަށް ވާތީ، ދުންފަތް އުފެއްދުމަށް ބޭނުންކުރާ ބާވަތްތައް އެތެރެކޮށްފިނަމަ އެ ބާވަތްތައް ހިފަހައްޓަން މީގެކުރިން ވަނީ އަންގާފައެވެ. އެއާއެކު މި މަހުގެ 2 ވަނަ ދުވަހު ގެނައި އެފަދަ ޝިޕްމަންޓްތައް ކަސްްޓަމްސްއިން ވަނީ ހިފަހައްޓާފައެވެ.
ދުންފަތް ކޮންޓްރޯލްކުރުމާ ބެހޭ ގާނޫނަށް ސަރުކާރުން މިފަހުން ގެނައި އިސްލާހުގައިވާ ގޮތުން:
- ރާއްޖޭގައި ދުންފަތުގެ ބާވަތްތަކުގެ ގަސް ހެއްދުމާއި ދުންފަތް އުފެއްދުން މަނާ
- ދުންފަތް ގަސް ހެއްދުމަށް ބޭނުންކުރެވޭނެ ބައިތައް އެތެރެކުރުންވެސް މަނާވާނެ އެވެ.
"ދަ ޕްރެސް" އަށް މައުލޫމާތު ލިބިފައިވާ ގޮތުގައި ދުންފަތް އޮޅާ ސާމާނާއި، އޭގެ ފިލްޓަރުގެ އިތުރުން އޮޅާ ކަރުދާސް ޝިޕްމަންޓްތައް ކަސްޓަމްސް އިން މިހާރު ދޫކޮށްލުމާއެކު މިފަދަ ތަކެތީގެ ވިޔަފާރި ކުރާ ފިހާރަތަކުގެ ކައިރީގައި ވަނީ ބޮޑު ކިއުތައް ހަދާފައެވެ.
މިކަމާ ގުޅޭގޮތުން ކަސްޓަމްސްގެ ބަހެއް އަދި ވަނީ ލިބޭގޮތް ނުވެފައެވެ.
