އަމާޒަކީ މިހާރު ފަށާފައިވާ "ކޫލް ސްކޫލް" ޕްރޮޖެކްޓްގެ ދަށުން ރާއްޖޭގެ ހުރިހާ ސްކޫލެއް އޭސީ ކުރުން ކަމަށާއި އަމާޒަކީ ސެޕްޓެމްބަރު މަހާ ހަމައަށް މަސައްކަތް ނިންމާލުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރ. ހުޅުދުއްފާރުގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަމުން ރައީސް ވިދާޅުވީ ގަބޫލުކުރައްވާ ސިޔާސަތަކީ އިމާރާތްތަކެއް އެޅުމަށްވުރެ ގައުމަކަށް ތަރައްގީ ގެނެވޭނީ ޒުވާން ޖީލަށް ރަނގަޅު ގޮތުގައި ތައުލީމާއި ތަރުބިއްޔަތުދީގެން ކަމަށެވެ.
އެހެންކަމުން ސްކޫލު އިމާރާތްތައް ނުވަތަ ސްކޫލަށް ބޭނުންވާ ވަސީލަތްތައް ފޯރުކޮށްދިނުމަކީ ހަގީގީ ވަށާޖެހޭ ތަރައްގީއަށް އެންމެ މުހިންމު އެއް ކަންތައް ކަމަށާއި ހަރުދަނާ ގޮތެއްގައި ރަނގަޅު ފެންވަރެއްގައި ހިތްހަމަޖެހޭ މާހައުލެއްގައި ކިޔަވާދެވޭނެ ގޮތް ފަހިކޮށްދިނުމަށް މަސައްކަތް ކުރަމުންދާކަން ރައީސް ފާހަގަކުރެއްވިއެވެ.
އެގޮތުން ހިތްހަމަޖެހޭ މާހައުލަކަށް ކްލާސްރޫމްތައް ހެދުމަށްޓަކައި ކްލާސްރޫމްތައް އޭއާކޮންޑިޝަންކޮށް، ފިނި ކުރުމަކީ މުހިންމު ކަމެއްކަން ގަބޫލުކުރައްވާ ކަމަށް ރައީސް ވިދާޅުވިއެވެ. އަދި ރާއްޖޭގެ ހުރިހާ ކްލާސްރޫމްތަކެއް އޭސީކުރުމަށް ފަށާފައިވާ މަޝްރޫއުގެ ދަށުން ރާއްޖޭގެ ހުރިހާ ރަށެއްގެ ސްކޫލުތައް އިއާދަކުރަނިވި ހަކަތައިގެ ބޭނުންކޮށްގެން އޭސީކޮށްދީ ފިނިކޮށްދެއްވާނެ ކަމަށް ރައީސް ވަނީ ވިދާޅުވެފައެވެ.
ރައީސް ވިދާޅުވީ އަމާޒަކީ ވީހާވެސް އަވަހަކަށް މަސައްކަތް ނިންމާލުން ކަމަށެވެ. ސެޕްޓެމްބަރު މަހާ ހަމައަށް ވެސް މަސައްކަތް ނިންމާލެވޭތޯ މަސައްކަތް ކުރަމުންދާ ކަމަށާއި މުޅި ރާއްޖޭގެ ހުރިހާ ސްކޫލެއް އޭސީކޮށް ނިންމާލުމަށް 6 ނުވަތަ 8 މަސް ދުވަސް ހޭދަވާނެ ކަމަށް ރައީސް ވިދާޅުވިއެވެ.
"ކޫލް ސްކޫލް" ޕްރޮޖެކްޓް އިފްތިތާހުކޮށްފައިވަނީ މިދިޔަ އަހަރުގެ ޖޫން މަހުގައެވެ.
