ޖުލައި މަސް ނިމުމުގެ ކުރިން ރ. އަދި ބ. އަތޮޅުގައި ރާއްޖެ ޓްރާންސްޕޯޓް ލިންކް (އާރްޓީއެލް)ގެ ހިދުމަތް އާރްޓީއެލްގެ ހިދުމަތް ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މި ފަދައިން ވިދާޅުވީ، މާޅޮސްމަޑުލު އުތުރުބުރީގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އުނގޫފާރަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވާ ރޭ ދެއްކެވި ވާހަކަފުޅުގައެވެ.
މި އަހަރުގެ ޖޫން މަސް ނިމުމުގެ ކުރިން ރ.އަތޮޅުގައި އަދި ޖުލައި މަސް ނިމުމުގެ ކުރިން ބ. އަތޮޅުގައި އާރްޓީއެލްގެ ހިދުމަތް ފައްޓަވާނެ ކަމަށް ރައީސް ވަނީ އިއުލާންކުރައްވާފައެވެ. އަދި ރ. އުނގޫފާރު އާބަން ސެންޓަރެއްގެ ގޮތުގައި ތަރައްގީކުރުމަށް އަދުގެ ސަރުކާރުން ކުރަމުން ގެންދާ މަސައްކަތްތައް ވެސް ރައީސްގެ ވާހަކަފުޅުގައި ވަނީ ހިއްސާކުރައްވާފައެވެ.
އެގޮތުން މެދު އަދި ދުރު ރާސްތާ ވިސްނުންފުޅުގެ ތަރައްގީގެ މާސްޓާ ޕްލޭންގެ މަސައްކަތްތައް ކުރެވެމުން ދާއިރު، ހުރިހާ ދާއިރާއަކުން އެންމެ މަތީ ފަންތީގައި ހިދުމަތް ލިބޭ ރަށަކަށް ރ. އުނގޫފާރު ވެގެންދާނެ ކަމުގެ އުންމީދު، ރައީސް ވަނީ އެ ރަށުގެ ރައްޔިތުންނަށް ދެއްވާފައެވެ.
ގޮންޖެހުންތަކާ ކުރިމަތިވި ކަމުގައިވީ ނަމަވެސް، މޫސުމީ ގޮތުން ފުރުސަތު ފަހިވުމާއެކު ރ. އުނގޫފާރުގެ ބިން ހިއްކުމުގެ މަސައްކަތްތައް ފުރިހަމަކޮށް ނިންމަވައިދެއްވާނެ ކަމަށް ރައީސް ވަނީ ވިދާޅުވެފައެވެ. އަދި އެ މަނިކުފާނުގެ ވެރިކަމުގެ މި ދައުރުގައި، ރ. އުނގޫފާރުގައި 500 ހައުސިންގް ޔުނިޓްގެ މަސައްކަތް ކުރައްވާނެ ކަމަށް ވެސް ރައީސް ވިދާޅުވިއެވެ.
ތައުލީމީ ދާއިރާއަށް ބޭނުންވާ ތަރައްގީ ހޯދައިދިނުމަށް މަސައްކަތްޕުޅު ކުރައްވާނެ ކަމުގެ ޔަގީންކަން ދެއްވާ ރައީސް ވިދާޅުވީ އާބަން ސެންޓަރެއްގެ ފެންވަރުގައި ރަށް ތަރައްގީވެގެން އަންނައިރު، 1 ދަންފަޅިއަށް ކިޔަވައިދެވޭނެ ގޮތަށް ތައުލީމީ ދާއިރާއަށް ބޭނުންވާ ތަރައްގީ ގެނެސްދެއްވާނެ ކަމަށެވެ.
މީގެއިތުރުން ރަށުގެ ސިއްހީ ދާއިރާއަކީ ވެސް އެންމެ މަތީ ފަންތީގައި ހިދުމަތްދޭ ދާއިރާއަކަށް ހެދެމަށްޓަކައި މަސައްކަތްކުރަމުން ގެންދާނެ ކަމުގެ ފުރިހަމަ ޔަގީންކަން ރައީސް ވަނީ ދެއްވާފައެވެ. އެގޮތުން، 3 އަހަރު ދުވަހުގެ ޕްލޭނެއްގެ ދަށުން އުނގޫފާރުގެ ހޮސްޕިޓަލަކީ ޓާޝަރީ ފެންވަރުގެ ހޮސްޕިޓަލަކަށް ބަދަލު ކުރެވިގެންދާނެކަން ރައީސް ފާހަގަކުރެއްވިއެވެ.
