އޭސީސީ އަށް އައްޔަންކުރަން ރައީސް ޑރ. މުހައްމަދު މުއިއްޒު ފޮނުއްވި ދެ ނަމުގެ ތެރެއިން އެއް ނަން ބަދަލުކުރައްވައި އެ ނަންތައް މަޖިލީހަށް ހުށަހެޅުއްވުމުން، އެއް ދުވަހުގެ ތެރޭ އޭސީސީ އަށް މެންބަރުން އައްޔަންކުރަން ފެންނަ ކަމަށް މެންބަރުން ރުހުންދީފިއެވެ.
މި މަހުގެ ހަވަނަ ދުވަހު ރައީސް ފޮނުއްވި ސިޓީފުޅުގައިވާ ގޮތުން، އޭސީސީން ހުސްވެފައިވާ ދެ މެންބަރުންގެ މަގާމަށް އައްޔަންކުރައްވަން ފޮނުއްވި ދެ ނަމަކީ:
- އާސިޔާ އަޒީމާ، ރޯޒްވިލާ / ރ. ހުޅުދުއްފާރު
- އަހްމަދު ނާޝިދު، މއ. ގޯލްޑަން މޫން
އޭގެ ތެރެއިން އަޒީމާގެ ނަން ނަންގަވައި އޭނާގެ ބަދަލުގައި ރައީސް ފޮނުއްވީ އަހްމަދު ނާޝިދުގެ އިތުރުން ރ. އަލިފުށި / ފަސާނާ، އަބްދުﷲ ނާޝިދުގެ ނަމެވެ. ރައީސް މި ބަދަލު ގެންނެވި މީގެ ކުރިން އެމަނިކުފާނު ފޮޮނުވި ނަންތައް ދިރާސާކުރުމަށް މި މަހުގެ 16 ވަނަ ދުވަހު މިނިވަން މުއައްސަސާތަކުގެ ކޮމިޓީ އަށް ފޮނުވާފައި ވަނިކޮށެވެ.
ފާހަގަކުރެވޭ ގޮތުގައި ނަންތަކަށް ބަދަލު ގެންނަވައި ރައީސް ސިޓީފުޅު ފޮނުއްވީ ވެސް 16 ވަނަ ދުވަހުގައެވެ. އެކަމަކު އެމަނިކުފާނުގެ ސިޓީފުޅު ތަޅުމުގައި އިއްވީ މިއަދެވެ.
ދައުރުން ބޭރުން ބޭއްވި މަޖިލީހުގެ މިއަދުގެ ޖަލްސާ އަށް ފަހު މިނިވަން މުއައްސަސާތަކުގެ ކޮމިޓީން ދެ ބައްދަލުވުން ބާއްވައި، އޭގެ ތެރެއިން ބޭއްވި ފުރަތަމަ ބައްދަލުވުމުގައި ކޮމިޓީން ނިންމީ އަހްމަދު ނާޝިދަށާއި އަބްދުﷲ ނާޝިދުގެ ނަންތަކަށް ޝަކުވާ ހުށަހެޅުމަށް ހެނދުނު 11 އިން 11:30 އަށް ހުޅުވާލުމަށެވެ. އެއަށްފަހު ކޮމިޓީން ބޭއްވި ދެވަނަ ބައްދަލުވުމުގައި ދެ ބޭފުޅުންނާ އިންޓަވިއުކޮށްފައިވެއެވެ.
ކޮމިޓީން މާކްސް ދިން ގޮތަށް ބަލާލާއިރު:
- އަހްމަދު ނާޝިދު: 92.86 ޕަސެންޓު
- އަބްދުﷲ ނާޝިދު: 88.14 ޕަސެންޓު
އޭސީސީ އަށް މި ދެ ބޭފުޅުން އައްޔަންކުރުމަށް މިއަދު ހަވީރު ދައުރުން ބޭޭރުން ބޭއްވި ޖަލްސާގައި ދެ ބޭފުޅުންގެ ނަންތަކަށް ރުހުންދޭން ފެނޭތޯ ވޯޓަށް އެހުމުން، ވޯޓުގައި ބައިވެރިވި 68 މެންބަރުން ވެސް ވޯޓު ދެއްވީ ދެ ބޭފުޅުން އައްޔަންކުރަން ފެންނަ ކަމަށެވެ.
ދެ ބޭފުޅުންނަށް އައްޔަންކުރަން ނުފެންނަ ކަމަށް އެއްވެސް މެންބަރަކު ވޯޓު ނުދެއްވައެވެ.
އޭސީސީއަށް އައްޔަން ކުރަން ފޮނުވި ނާޝިދަކީ 2021 ވަނަ އަހަރުން ފެށިގެން ޕޮލިސް ބޯޑުގެ މެންބަރުކަން ކުރެއްވި ބޭފުޅެކެވެ. ޕޮލިސް ބޯޑުން ނާޝިދު ވަކިކުރީ މި ސަރުކާރުންނެވެ.
އޭސީސީން ދެ މެންބަރުން ހުސްވީ، ކޮމިޝަންގެ ނައިބު ރައީސް އަބްދުލްސަލާމާއި މެންބަރު ތޯހާ މުހައްމަދު މިދިޔަ ނޮވެމްބަރު މަހު އިސްތިއުފާ ދެއްވުމުންނެވެ. އެ ދެ މެންބަރުން އިސްތިއުފާ ދެއްވީ ކޮރަޕްޝަންގެ ގިނަ ތުހުމަތުތަކެއް ކުރެވި، ވަކިކުރަން މަޖިލީހުގެ ކޮމިޓީން ފާސްކޮށްފައި ވަނިކޮށެވެ.
