ހިއުމަން ރައިޓްސް ކޮމިޝަން (އެޗްއާރުސީއެމް) ގެ ނައިބު ރައީސްކަމަށް އެ ކޮމިޝަންގެ މެންބަރު މުއުމިނާ ވަހީދު އައްޔަންކުރަން ފެންނަ ކަމަށް ރުހުންދީފިއެވެ.
އެޗްއާރުސީއެމްގެ ނައިބުގެ މަގާމު ހުސްވީ އެ މަގާމު ފުރުއްވަމުން ގެންދެވި ޑރ. އަހްމަދު އަދުހަމް އަބްދުﷲ އިސްތިއުފާދެއްވުމާ ގުޅިގެންނެވެ.
ދައުރުން ބޭރުން ބޭއްވި މަޖިލީހުގެ ޖަލްސާގައި މުއުމިނާ އަށް ރުހުންދިނުމަށް ފެނޭތޯ ވޯޓަށް އެހުމުން، ވޯޓުގައި ބައިވެރިވި 67 މެންބަރުން ވެސް ވޯޓު ދެއްވީ މުއުމިނާ އަށް ރުހުން ދޭން ފެންނަ ކަމަށެވެ.
އެޗްއާރުސީއެމްގެ ވަޒީފާ އާ 2004 ވަނަ އަހަރު ގުޅުނު މުއުމިނާ ވަނީ މެދުނުކެނޑި ނުވަ އަހަރު އެ ކޮމިޝަނަށް ހިދުމަތްކުރެއްވުމަށް ފަހު ޓްރީޓޮޕް ހޮސްޕިޓަލާއި އިކޮނޮމިކް މިނިސްޓްރީގައި މަސައްކަތްކުރައްވައިފައެވެ. އެޗްއާރުސީއެމްގެ މެންބަރު ކަމަށް އޭނާ އައްޔަންކުރެއްވީ ސެޕްޓެމްބަރު 8، 2020 ގައެވެ.
މުއުމިނާގެ އިތުރުން މިހާރު އެޗްއާރްސީއެމްގައި ތިއްބަވަނީ:
- ކޮމިޝަންގެ ރައީސް މަރިޔަމް މުނާ
- އައިމިނަތު ޝިފާއަތު އަބްދުއްރައްޒާގު
- ސަމާއު އަހްމަދު ނަޖީބް
- އިސްމާއީލް ހަބީބު
