ރާއްޖޭގެ ފުރަތަމަ ޑިވެލޮޕްމަންޓް ބޭންކު (ޑީބީއެމް)ގެ މަސައްކަތްތައް ކުރިއަށްދަނީ ތިން މަރުހަލާއަކަށް ބަހާލައިގެން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
އެކްސްގައި ހިއްސާ ކުރެއްވި ޕޯސްޓެއްގައި ސައިދު ވިދާޅުވީ، ބޭންކުގެ ހިދުމަތް ދޭން ފަށަން ރާވާފައި ވަނީ ތިން މަރުހަލާއަކަށް ބަހާލައިގެން ކަމަށާއި މިހާރު ކުރަމުން ދަނީ އެތަނުގެ އިދާރީ އޮނިގަނޑު އެކުލަވައިލުމުގެ މަސައްކަތްކަތް ކަމަށެވެ. މިނިސްޓަރު ވިދާޅުވި ގޮތުގައި އެ މަސައްކަތް ޝެޑިއުލާ އެއްގޮތަށް ކުރިއަށް އެބަދެއެވެ.
ޑީބީއެމްގެ ވިޔަފާރި މޮޑެލްގައި އިސްކަން ދެނީ އިންސްޓިއުޝަނަލް އިންވެސްޓަރުންނާއި ބޮޑެތި އުމްރާނި މަޝްރޫއުތަކަށް ކަން ފާހަގަ ކުރައްވާ ސައީދު ވިދާޅުވީ މަރުހަލާއެއްގައި ރީޓެއިލް ހިދުމަތްތައް ތައާރަފު ކުރުމަށް ރާވާފައިވާ ކަމަށެވެ. އަދި މަރުހަލާތަކަކަށް ބަހާލައިގެން މިކަން ކުރުމުގެ އުސޫލެއް ގެންގުޅެނީ އިގުތިސާދު ހަރުދަނާކޮށް، ވަރުގަދަ ކުރުމަށް މަސައްކަތް ކުރާ ވިސްނުމުގެ ތެރެއިން ކަމަށްވެސް ސައީދު ވިދާޅުވިއެވެ.
ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ރާއްޖޭގެ ޑިވެލޮޕްމެންޓް ބޭންކު، "ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް"ގެ ނަމުގައި ކުންފުނި އުފައްދާވާފައި ވަނީ ހުސްވި އަހަރުގެ މޭމަހުގެ 16 ވަނަ ދުވަހުއެވެ. އަދި މި ބޭންކު ހިންގަން ބޭނުންވާ ލައިސެންސް މޯލްޑިވްސް މަނިޓަރީ އޮތޯރިޓީން ދޫކުރީ އޮކްޓޯބަރު 13، 2024 ގައެވެ. މިއީ ސަރުކާރުގެ ސައްތައިންސައްތަ ހިއްސާ އެކުލެވިގެން އުފައްދާ ކުންފުންޏެކެވެ.
މިއީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިގްތިސޯދީ އަދި އިޖުތިމާއީ ތަރައްގީއަށް އިންވެސްޓުކުރުމުގެ އިތުރުން އުމްރާނީ ތަރައްގީއަށް ބޭނުންވާ ފައިސާ ހޯދުމުގެ އިތުރުން ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރޫއުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ހައްލުކުރުމަށް ރައީސް އުފެއްދެވި ކުންފުންޏެކެވެ.
ޑިވެލޮޕްމަންޓް ބޭންކް ވުޖޫދުވުމުން ރިސޯޓް ތަރައްގީކުރުމަށް ދޫކޮށްފައިވާ ރަށްތަކުގެ ތެރެއިން ނުހެދި ހުރި ރަށްތަކުގެ ފައިސާ އަނބުރާ ލިބުމަށް އެތައް ގުނައެއް ފަސޭހަ ވެގެންދާނެ ކަމަށް މިނިސްޓަރު މީގެ ކުރިން ވަނީ ވިދާޅުވެފައެވެ. ސައީދު ވިދާޅުވިގޮތުގައި އެފަދަ 75 ރަށް މިހާރު ވެސް އެބަހުއްޓެވެ.
