ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެސްޓޯނިއާއަށް ކުރެއްވި ދަތުރުފުޅު ކާމިޔާބު ކަމާއެކު ނިންމަވާލައްވައިފިއެވެ.
އެ ގައުމަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، ރައީސް ރޭ މާލެ ވަޑައިގެންފައިވާއިރު އެމަނިކުފާނު އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ އެ ދަތުރުފުޅުން ވަރަށް ގިނަ ކަންކަން ހާސިލް ކުރެއްވުނު ކަމަށެވެ.
އަދި އެ ދަތުރުފުޅަށް ދައުވަތު ދެއްވައި އެ ގައުމަށް ވަޑައިގަތުމާއެކު ދެންނެވި ހޫނު މަރުހަބާ އާއި މެހެމާންދާރީ އަދާކުރެއްވި ގޮތާއި ރޭއްވެވި ރަނގަޅު އިންތިޒާމުތަކަށް ރައީސް ވަނީ އެސްޓޯނިއާގެ ރައީސް ޑރ. އަލާ ކާރީސް އަށް ހާއްސަ ޝުކުރު އަދާކުރައްވާފައެވެ. އަދި ހަމަ އެހެންމެ އެކި ދާއިރާތަކުން ސޮއިކުރެވުނު އެމްއޯޔޫތަކާއި ބައްދަލުވުންތަކުން ފައިދާ ކަށަވަރުކޮށްދިން ކަމަށާއި، މި ދަތުރަކީ ދެ ގައުމުގެ ގުޅުމުގެ އާ ދައުރެއްގެ ފެށުން ކަމަށް ވެސް އެމަނިކުފާނު ވަނީ ވިދާޅުވެފައެވެ.
އެސްޓޯނިއާގެ އީޖާދީ، ޑިޖިޓަލް ބަދަލުވުމަކީ ހަރުދަނާ އަދި ދެފުށް ފެންނަ ވެރިކަމެއް ހިންގުމުގައި ދުނިޔޭގެ ފެންވަރުގައި ވެސް ފާހަގަކޮށްލެވޭ ބެންޗުމާކެއްކަން ފާހަގަ ކުރައްވާ ރައީސް ވަނީ އެ ގައުމުގެ އިޖާދީ ކުރިއެރުންތައް ބަލައި ތަޖުރިބާކޮށްލެއްވުމުގެ ފުރުސަތު ފަހިކޮށްދެެއްވި ކަމަށްޓަކައި ޝުކުރު އަދާކުރައްވައިފަ އެވެ.
ރާއްޖޭގެ ޑިޖިޓަލް ގަވާނަންސް ހަރުދަނާކުރުމަކީ، ސަރުކާރުން ހާއްސަ އިސްކަމެއް ދޭ ކަމެއް ކަމަށާއި މި ދަތުރުފުޅުން އެކަންކަން ހާސިލްވެގެން ދިޔަ ކަމަށް ރައީސް ވަނީ ވިދާޅުވެފައެވެ.
މިއީ ރާއްޖޭގެ ރައީސަކު އެސްޓޯނިއާއަށް ކުރެއްވި ފުރަތަމަ ރަސްމީ ދަތުރުފުޅަށްވާއިރު މި ދަތުރުފުޅުގައި އެމަނިކުފާނުގެ އަރިހުގައި، ރާއްޖާގެ ފަންނިއްޔާތުގެ މާހިރުންގެ މައްޗަށް އެކުލެވިގެންވާ މަތީ ފަންތީގެ ވަފުދެއް ބައިވެރިވެވަޑައިގެންނެވި އެވެ.
